ރައީސް މުއިއްޒުގެ ކޮއްކޯފުޅަކު ޔާމީންގެ ޙުކުމަށް ނުފޫޒު ފޯރުވަން މަސައްކަތްކުރައްވާފައިވޭ - މެންބަރު ޔައުޤޫބް

ހައިކޯޓުގައި މިހާރު ކުރިއަށްދާ އާރަށު ޚިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީންއާ ދެކޮޅަށް ޙުކުމް ކުރުމަށް ބާރުއެޅުމަށް ދެ ފަހަރެއްގެ މަތީން ރައީސް ޑރ.މުހައްމަދު މުއިއްޒުގެ ކޮއްކޯފުޅަކު މަސައްކަތް ކުރައްވާފައިވާ ކަަމަށް ރައްޔިތުންގެ މަޖިލީހުގެ ދާންދޫ ދާއިރާގެ މެންބަރު ޔައުޤޫބް އަބްދުﷲ ތުހުމަތުކުރައްވައިފިއެވެ.

މެންބަރު ޔައުޤޫބް މިފަދައިން ވިދާޅުވީ އަންގާރަ ދުވަހު މަޖިލީހުގައި ވާހަކަފުޅު ދައްކަވަމުންނެވެ. ޔައުޤޫބް ވަނީ މިނިވަން މުއައްސަސާތައް މަސައްކަތް ކުރަމުން ދަނީ ސަރުކާރުގެ ސެކްޝަންތަކުގެ ގޮތުގައިކަމަށް ވިދާޅުވެފައެވެ. އަދި ނިމިދިޔަ ހަފްތާގައި ދެ ފަހަރެއް މަތިން ރައީސް މުޢިއްޒުގެ ކޮއްކޯފުޅަކު، ރައީސް އޮފީހުގެ ވަޒީރަކު މެދުވެރިކުރައްވައިގެން ކޯޓުތަކަށް ނުފޫޒު ފޯރުވަން މަސައްކަތް ކުރައްވާފައިވާ ކަމަށް އޭނާ ވިދާޅުވިއެވެ. ޔައުޤޫބް އެއްވެސް ބޭފުޅެއްގެ ނަންފުޅު ހާމައެއް ނުކުރައްވައެވެ. އަދި މިފަދަ ތުހުމަތުތަކެއް މެންބަރު ޔައުޤޫބް ކުރައްވާފައިވާއިރު، ވަޒީރުންގެ ފެންވަރުގައި ރައީސްގެ ތިމާގެ ބޭފުޅުން އެބަތިއްބެވިއެވެ.

މެންބަރު ޔައުޤޫބުގެ މި ވާހަކަފުޅާ ގުޅޭ އިތުރު ތަފްސީލް ހޯދުމަށް އޭނާއަށް ގުޅުމަށް ރާއްޖެއެމްވީއިން ކުރި މަސައްކަތް ވަނީ ކާމިޔާބުވާގޮތް ނުވެފައެވެ.

ދާންދޫ ދާއިރާގެ މެންބަރު ޔައުޤޫބްގެ ވާހަކަފުޅުގައި އޭސީސީއިން މަސައްކަތް ކުރަނީ ސަރުކާރާ ގުޅިގެން، ކުރިއަށް އޮތް ރައްޔިތުންގެ މަޖިލީހުގެ އިންތިޚާބު ސަރުކާރަށް ހޯދައިދިނުމަށްކަމަށް ވެސް ވިދާޅުވިއެވެ. ޔައުޤޫބް ވިދާޅުވީ ކުރީ ސަރުކާރުން ދީފައިވާ ފްލެޓުތައް ނުދީ ވަނީ އެ ތަންތަން ބޭނުން ބަޔަކަށް ދިނުމަށް މަގުފަހިކުރުމަށް ކަމަށެވެ. އަދި އެކަން ބޭނުން ކުރާނީ މި ސަރުކާރުގެ ކެންޑިޑޭޓުންނަށް އިންތިޚާބު ކާމިޔާބުކޮށްދިނުމަށް ކަމަށް ވެސް އޭނާ ތުހުމަތުކުރެއްވިއެވެ. އަދި ސަރުކާރުން މަސައްކަތް ކުރަމުން ދަނީ އޭސީސީއާ ގުޅިގެން ގޯތިތަކާއި ފްލެޓުތައް އަތުލީ ސަރުކާރުން ނޫން ކަމަށް އާއްމުންނަށް ދައްކަން ކަަމަށް ވެސް އޭނާ ވިދާޅުވިއެވެ. އެ މަަސައްކަތް ކުރަނީ އޭސީސީގެ ބޮލުގައި އަޅުވައިގެން ކަމަށް ޔައުޤޫބް ވިދާޅުވިއެވެ.

މި ސަރުކާރުގެ ހައުސިންގ މިނިސްޓަރު ޑރ. އަލީ ހައިދަރު އަހުމަދު ނޫސްވެރިންނަށް މައުލޫމާތުދެއްވަމުން ނިމިިދޔަ ސަރުކާރުން ދިން ގޯތިތަކާއި ފްލެޓުތައް އެގޮތަށް ނުދެވޭނެ ކަމަށް ވިދާޅުވި ކަމަށާއި އޭގެ ފަހުން މަޖިލީހުގެ ކޮމިޓީގައި ވާހަކަފުޅުދެއްކެވީ ތަފާތުކޮށް ކަމަށް ޔައުޤޫބް ވިދާޅުވިއެވެ. އެކި ފަހަރު އެކިގޮތަށް ވާހަކަފުޅު ދައްކަވާކަމާއި މިނިސްޓަރު އިތުރުފުޅުހައްދަވާކަން މިހާރު ހާމަވެފައިވާ ކަމަށް ވެސް ޔައުޤޫބް ވިދާޅުވިއެވެ. އެހެންކަމުން އޭނާ އަށް އެމްޑީޕީގެ މެންބަރުން އިތުބާރު ކުރަން ޖެހޭ ސަބަބެއް ނެތް ކަމަށް މެންބަރު ޔައުޤޫބް ވިދާޅުވިއެވެ.

މީގެއިތުރުން ޔައުޤޫބް ވަނީ ހައުސިންގ މިނިސްޓަރަށް އޮތް އިތުބާރު ދެ ފަހަރެއްގެ މަތިން އާއްމުންނަށް ގެއްލިފައިވާ ކަމަށާއި އޭނާ އަށް ރުހުންދޭން ދަތިކަމަށް ވިދާޅުވެފައެވެ. އޭގެ ތެރެއިން ފުރަތަމަ ފަހަރަކީ މިނިސްޓަރު ބޭއްވެވި ފުރަތަމަ ނޫސްވެރިންގެ ބައްދަލުވުން ކަމަށާއި ދެވަނަ ފަހަރަކީ މަޖިލީހުގެ ކޮމިޓީގައި އޭނާ ވާހަކަދެއްކެވި ގޮތް ކަމަށް ވެސް ޔައުޤޫބް ވިދާޅުވިއެވެ.