ރައީސް މުއިއްޒު، ތުރުކީގެ ރައީސާ ބައްދަލުކުރައްވައިފި
މި ދަތުރުފުޅަކީ މި މަހުގެ 26-29 އަށް ކުރައްވާ ދަތުރުފުޅެއް
ރައީސް މުއިއްޒު، ރައީސް އުރުދުޣާން އާ ބައްދަލުކުރައްވަނީ
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތުރުކީވިލާތުގެ ރައީސް ރަޖަބް ޠައްޔިބް އުރްދުޣާންއާ ބައްދަލުކުރައްވައިފިއެވެ.
މި ބައްދަލުކުރެއްވުން އޮތީ ހޯމަ ދުވަހު ތުރުކީވިލާތުގެ އަންކާރާގައި ހުންނަ އެ ޤައުމުގެ ރައީސްގެ ގަނޑުވަރުގައެވެ. މިއީ ރައީސް މުއިއްޒު ވެރިކަމާ ހަވާލުވެވަޑައިގެންނެވުމަށްފަހު ކުރެއްވި ފުރަތަމަ ދަތުރުފުޅެވެ.
މި ބައްދަލުކުރެއްވުމުގައި ރައީސް މުއިއްޒު ވަނީ ދެ ޤައުމުގެ ގުޅުމުގެ މައްޗަށް އަލިއަޅުއްވާލައްވާފައެވެ. އެގޮތުން، މި ދައުރުގައި އެކި ދާއިރާތަކުން ދެ ޤައުމުގެ ގުޅުން އިތުރަށް ބަދަހި ކުރެއްވުމަށް މަސައްކަތް ކުރައްވާނެ ކަމަށް އެމަނިކުފާނު ވިދާޅުވިއެވެ. މި ދާއިރާތަކުގެ ތެރޭގައި ޓްރޭޑާއި އިންވެސްޓްމަންޓާއި އިއާދަކުރަނިވި ހަކަތައާއި މަތީ ތައުލީމު ހިމެނެއެވެ.
ތުރުކީގެ ރައީސް އުރުދުޣާން ވަނީ ރިޔާސީ އިންތިޚާބުގައި ރައީސް މުއިއްޒު ހޯއްދެވި ކާމިޔާބީއަށް މަރުހަބާ ވިދާޅުވެފައެވެ. އަދި އެމަނިކުފާނުގެ ފުރަތަމަ ރަސްމީ ދަތުރުފުޅުގެ ގޮތުގައި ތުރުކީއަށް ވަޑައިގަތުމުން ޝުކުރުވެރިވެވަޑައިގަންނަވާ ކަމަށާއި މި ދަތުރުފުޅުގެ ސަބަބުން ދެ ޤައުމުގެ ގުޅުން އިތުރަށް ބަދަހިވެގެންދާނެ ކަމަށް ޣުރުދުޣާން ވިދާޅުވިއެވެ.
މީގެ އިތުރުން ދެ ރައީސުން ވެސް ވަނީ އިސްރާއީލުން ފަލަސްތީނަށް ދެމުން އަންނަ ހަމަލާތައް ކުށްވެރިކުރައްވާފައެވެ. އަދި މިހާރު ހަމަލާތައް މެދުކަނޑާލާފައިވާއިރު އޭގެ ސަބަބުން ހަމަލާތައް އެއްކޮށް ހުއްޓިގެންދާނެ ކަމަށް އުއްމީދު ކުރައްވާ ކަމަށް ވިދާޅުވިއެވެ.
ރައީސް ތުރުކީއަށް ކުރައްވަމުން ގެންދަވާ މި ދަތުރުފުޅުގައި އެމަނިކުފާނުގެ އަނބިކަނބަލުން ސާޖިދާ މުޙައްމަދު އާއި ވަޒީރުން ހިމެނޭ އިސް ވަފުދެއް ބައިވެރިވެވަޑައިގަންނަވައެވެ. މި ދަތުރުފުޅަކީ މި މަހުގެ 26-29 އަށް ކުރައްވާ ދަތުރުފުޅެކެވެ.
