ބެކަމްގެ ޚާއްސަ މި ބޫޓު ގަންނާނީ ކިހާވަރަކަށް؟

އިނގިރޭސި ކުރީގެ ކެޕްޓަން ޑޭވިޑް ބެކަމް އަކީ ދުނިޔޭގައި އުފެދުނު އެންމެ މަޝްހޫރު އެއް ފުޓްބޯޅަ ކުޅުންތެރިޔާ އެވެ. އޭނާގެ ޖާޒީތަކާއި ބޫޓުތަކާއި ބޭނުންކުރި އަންނައުނާއި ތަކެއްޗަކީ ދުނިޔޭގެ ނީލަމުގައި އަގުބޮޑުކޮށް ވިއްކާލަވޭ ތަކެއްޗެވެ. މިހާރު ވިއްކާލަން މަސައްކަތް ކުރަނީ ގައުމީ ޓީމަށް 100 ވަނަ މެޗު ކުޅުނުއިރު 29 މާޗް 2008ގައި ފްރާންސާ ދެކޮޅަށް ބެކަމް އަރައިގެން ހުރި ރަންކުލައިގެ ބޫޓެވެ.

ކުޅިވަރު ސާމާނު ވިއްކާ މަޝްހޫރު ކުންފުނި އެޑިޑާސްއިން އުފެއްދި މި ބޫޓަކީ އެކުންފުނީގެ ޕްރެޑޭޓާ ބްރޭންޑްގެ ބޫޓެކެވެ. ބެކަމްގެ 100 ވަނަ މެޗާ ދިމާކޮށް އޭނާ އަށް ހާއްސަކޮށް ތައްޔާރުކުރި ބޫޓަށް ދީފައިވާ ނަމަކީ "ގޯލްޑަން އެޑިޑާސް ޕްރެޑޭޓާސް" އެވެ. މި ބޫޓުގައި އެއިރު ބެކަމްގެ ތިބި ތިން ކުދިން ކަމަށްވާ ބުރޫކްލީން އާއި ރޯމިއޯ އަދި ކްރޫޒްގެ ނަން ވެސް ޖަހާފައިވެ އެވެ.

ބެކަމްގެ ބޫޓު ނީލަން ކިއުން އޮންނާނީ ޑިސެމްބަރު މަހުގެ ފަސް ވަނަ ދުވަހު އޮންނަ ގްރެހަމް ބަޑް އޮކްޝަނުގަ އެވެ. މި ބޫޓުގެ ނީލަން ފަށާނީ 5798 ޑޮލަރުންނެވެ. ނީލަން އިންތިޒާމް ކުރާ ފަރާތުން އަންދާޒާ ކުރަނީ މި އަގު 12000 ޑޮލަރު ފަހަނަ އަޅައިދާނެ ކަމަށެވެ.

މި ބޫޓު ވިއްކައިގެން ލިބޭ ފައިސާ ހަރަދުކުރާނީ ޗެރިޓީ އުސޫލުންނެވެ.