ލެވަކޫސަނަށް ހުއްޓުމެއް ނެތް، މޮޅާއެކު އެއް ވަނަ އަށް

ޖަރުމަނު ލީގުގައި ވާޑާ ބްރެމަނާ ދެކޮޅަށް ކުޅުނު މެޗުން މޮޅުވެ، ބަޔާ ލެވަކޫސަން ލީގު ތާވަލްގެ އެއް ވަނަ އަށް ޖެހިލައިފި އެވެ.

ބްރެމަންގެ ދަނޑުގައި އެ ޓީމާ ދެކޮޅަށް ހޮނިހިރު ދުވަހުގެ ރޭ ނިކުތްއިރު، ލެވަކޫސަން އޮތީ ދެ ވަނައިގަ އެވެ. އެއީ އެންމެ ފަހުގެ ޗެމްޕިއަން ބަޔާން މިއުނިކަށް ވުރެ އެއް މެޗު މަދުން ކުޅެގެންނެވެ. މެޗުގެ އަދަދު ހަމަކޮށް، އެއް ވަނަ އަށް ޖެހިލަން ލިބުނު ފުރުސަތުގައި ލެވަކޫސަނުން ވަނީ 3-0 އިން މެޗު ކާމިޔާބު ކޮށްފަ އެވެ.

މެޗު ފަށައިގެން ނުވަ ވަނަ މިނެޓުގައި ލެވަކޫސަން އަށް ލީޑު ލިބުނީ، ބްރެމަންގެ އޮލީވިއޭ ޑެމަން އަތުން ބައި ކޮޅަށް ވަތް ލަނޑުންނެވެ. އޭގެ ފަހުން މެޗުގެ ފުރަތަމަ ހާފު ނިމުމުގެ ކުރިން އެ ޓީމުން ވަނީ ދެ ވަނަ ލަނޑާއެކު، ލީޑު ފުޅާ ކޮށްފަ އެވެ. ފުރަތަމަ ހާފުގެ 42 ވަނަ މިނެޓުގައި އެ ޓީމުގެ ދެ ވަނަ ލަނޑު ޖެހީ ޖެރެމީ ފްރިޕޮންގް އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ޕިއެރޯ ހިންކެޕީ އެވެ. ލެވަކޫސަންގެ ތިން ވަނަ ލަނޑު މެޗުގެ 76 ވަނަ މިނެޓުގައި، އަމީން އަދުލީ ތަނަވަސްކޮށްދިން ފުރުސަތެއްގައި ޖެހީ އެލެކްސް ގްރިމާލްޑޯ އެވެ.

މޮޅާއެކު ލެވަކޫސަން އެއް ވަނައިގައި އޮތީ މިހާތަނަށް ކުޅުނު 12 މެޗުން 34 ޕޮއިންޓު ހޯދައިގެންނެވެ. 11 މެޗުން އެ ޓީމު މޮޅުވެފައިވާއިރު، އަނެއް މެޗު ނިމުނީ އެއްވަރުވެގެންނެވެ. މި ސީޒަންގެ ޖަރުމަނު ލީގުގައި މިހާތަނަށް ކުޅުނު އެއްވެސް މެޗަކުން އެ ޓީމު ބަލިވެފައެއް ނުވެ އެވެ. ލެވަކޫސަން އަންނަނީ މި ސީޒަންގައި މޮޅު ކުޅުމެއް ދައްކަމުންނެވެ.