ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ކެބިނެޓަށް އައްޔަން ކުރައްވާފައިވާ ވަޒީރުންނަށް ރުހުން ދިނުމާ ގުޅޭ ގޮތުން އެމްޑީޕީ ޕާލަމަންޓްރީ ގްރޫޕް (ޕީޖީ)ގައި މަޝްވަރާ ކޮށްފިއެވެ.
"ރާއްޖެ ޓީވީ" އަށް މައުލޫމާތު ލިބިފައިވާ ގޮތުގައި އެމްޑީޕީގެ ޕީޖީގެ މެމްބަރުން ވަނީ ވަރަށް ފުޅާ ދާއިރާއެއްގައި މިކަމާ ގުޅޭގޮތުން މަޝްވަރާ ކޮށްފައެވެ. މި މަޝްވަރާތަކުގައި ވަޒީރުންގެ މަޖިލީހަށް ރައީސް މުއިއްޒު އައްޔަން ކުރައްވާފައިވާ ވަޒީރުންނާ ގުޅިގެން ހުރި ކަންބޮޑުވުންތައް މެންބަރުން ވަނީ ފާޅު ކުރައްވައިފައެވެ.
އެމްޑީޕީ ޕީޖީގެ ގިނަ މެންބަރުން ވަނީ މަޖިލީހުގެ ތަޅުމުގައި ކޮންމެ ވަޒީރަކަށް ވަކިން ރުހުން ދިނުމަށް ވޯޓަށް އެހުމަށް ތާއީދު ކުރައްވާފައެވެ.
އައު ސަރުކާރުގެ ހައުސިންގ މިނިސްޓަރު ކަމަށް އައްޔަން ކުރައްވާފައިވާ ޑރ. ޢަލީ ހައިދަރަށް ރުހުން ދޭން ވޯޓު ނުދެއްވާނެ ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއީލް އަޙްމަދު ނަސީމް ވަނީ 21 ނޮވެމްބަރުގައި ބޭއްވި މަޖިލީހުގެ ޖަލްސާގައި ވިދާޅުވެފައެވެ. މީކާއިލް ވަނީ ހައިދަރަށް ގަލޮޅު ދެކުނު ދާއިރާ އާއި މާލޭގެ ރުހުން ނެތް ކަން ފާހަގަކުރައްވާފައެވެ.
ވަޒީރުންގެ ތެރޭގައި ރުހުން ނުދޭން އެމްޑީޕީގެ ޕީޖީ ގްރޫޕަށް އެއްބަސްވެވޭނެ ބަޔަކު ތިބޭނެކަން މަކުނުދޫ ދާއިރާގެ މެންބަރު މުހައްމަދު ރާއީ ވެސް ވަނީ އެމްޑީޕީން އުކުޅަހުގައި ބޭއްވި ޤައުމީ މަޖިލީހުގައި ފާހަގަކުރައްވާފައެވެ. އެގޮތުން، ވަޒީރުންގެ މަޖިލީހުގައި، ރައްޔިތުންގެ މަޖިލީހުގައި މެންބަރުންގެ ގޮތުގައި ކުރިން ތިއްބެވި 4 ބޭފުޅުން ހިމެނޭކަން ކަމަށާއި އެ ބޭފުޅުންނަކީ މެންބަރުކަމުގައި ތިއްބެވިއިރު ވެސް ޤާނޫނީ ހުވައެއް ކުރައްވައިގެން ތިއްބަވައި ދޮގު ވާހަކަތައް ދެއްކެވިކަން ރައްޔިތުންނަށް މިހާރު ސާފުވަމުންދާ ބައެއް ކަމަށް މެންބަރު ރާއި ވިދާޅުވިއެވެ. އެހެންވެ އަނެއްކާވެސް އިތުރު ދޮގު ހުވައެއް ކުރަން އެ ބޭފުޅުންނަށް ފުރުސަތު ދޭންވީތޯ އޭނާ ސުވާލު އުފެއްދެވިއެވެ.
ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު، ވަޒީރުންގެ މަޖިލީހުގެ މެންބަރުންގެ ގޮތުގައި ޢައްޔަންކުރައްވާފައިވާ 22 ބޭފުޅުންގެ ނަންފުޅު ރައްޔިތުންގެ މަޖިލީހުގެ ރުހުން ހޯދުމަށްޓަކައި މަޖިލީހަށް ފޮނުއްވެވީ 20 ނޮވެމްބަރުގައެވެ.
