ކުނޫޒްއަށް ފުލުހުން ވަދެއްޖެ
25 ޖުލައި 2017 | އަންގާރަ 16:41ކުނޫޒް ބަލައި ފާސްކުރަން ކްރިމިންލް ކޯޓުން ނެރެފައިވަނީ 72 ގަޑިއިރުގެ އަމުރެއް
ފުލުހުން ކުނޫޒް ސަރަހައްދުގައި ހަރަކާތްތެރި ވަނީ
މާފަންނު ކުނޫޒްއަށް ފުލުހުން ވަދެއްޖެއެވެ.
ކޯޓް އަމުރެއްގެ ދަށުން ފުލުހުން މާފަންނު ކުނޫޒްއަށް ވަދެފައި ވަނީ އެ ސަރަހައްދު ބަލައި ފާސްކުރުމަށެވެ.
ކޯޓު އަމުރުގައިވާ ގޮތުން ޖުމްހޫރީ ޕާޓީ އާއި އެމްޑީޕީ އާއި އަދާލަތު ޕާޓީ އާއި އަދި މިނޫން ވެސް ބައެއް ފަރާތްތަކުން އިސްކޮށް ތިބެ ދިވެހިރާއްޖޭގައި ޤާނޫނީ ގޮތުން އުފެދިފައިވާ ސަރުކާރު ހިންގުމަށް ދަތިކުރުމާއި، ސަރުކާރު ވައްޓާލުމަށް ސައްލާކޮށް، ރާވާއި، އަދި ރައްޔިތުން މަޖިލީހުން ކުރާ ރަސްމީ މަސައްކަތްތަކަށް ހުރަސް އެޅުމަށް މަސައްކަތްކުރަމުންދާ ކަމަށް ތުހުމަތުކުރެވޭތީ ކުނޫޒް ބަލައި ފާސްކުރުމަށް އަމުރުނެރެފައިވާ ކަމަށެވެ.
މި އަމުރުގައިވާ ގޮތުން ކުނޫޒުން ބަލައި ފާސްކުރަން ހަމަޖެހިފައި ވަނީ ސަރުކާރު ބަދުނާމުވާ ގޮތަށް ލިޔެފައިވާ ލިޔެކިޔުންތަކާއި ބެނާތަކާއި ފޮތިތަކާއި އަދި ސީސީޓީވީ ފޫޓޭޖްއެވެ. އަދި ކޯޓް އަމުރުގައި ބުނެފައިވަނީ ކުނޫޒް ބަލައި ފާސްކުރުމަށް ހަމަޖެއްސީ ފުލުހުންގެ އިންޓެލިޖަންސްއަށް ލިބުނު ސިއްރު މައުލޫމާތަކާއި ގުޅިގެން ކަމަށެވެ.
ކުނޫޒް ބަލައި ފާސްކުރަން ކްރިމިންލް ކޯޓުން ނެރެފައިވަނީ 72 ގަޑިއިރުގެ ކޯޓް އަމުރެކެވެ.
ފުލުހުން ވަނީ އެ ސަރަހައްދު ނުފެންނަހާ ދުރަށް މީހުންނާއި ނޫސްވެރިން ދުރަށް ޖައްސާފައެވެ.
