ޤާނޫނުގައި މަޖިލިސް އިންތިޚާބު ބާއްވާ ތާރީޚު ދިމާވަނީ ރަމަޟާން މަހަށް، އީސީން އެދެނީ އެކަން ބަދަލުކޮށްދިނުމަށް

ޤާނޫނުގައި މަޖިލިސް އިންތިޚާބު ބާއްވާ ތާރީޚު ދިމާވަނީ ރަމަޟާން މަހުގެ ތެރެއިން ދުވަހެއް ކަމަށް ވާތީ އެކަން ބަދަލުކުރެވޭނެ ގޮތެއް އޮތްތޯ ބަލާދިނުމަށް އިލެކްޝަންސް ކޮމިޝަން (އީސީ) އިން އެދިއްޖެއެވެ.

ބުދަ ދުވަހު ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީގައި ވާހަކަފުޅު ދައްކަވަމުން އިލެކްޝަންސް ކޮމިޝަންގެ ރައީސް ފުއާދު ތައުފީގް ވިދާޅުވީ ޤާނޫނާއި އެއްގޮތަށް އެ އިންތިޚާބު ބާއްވާނަމަ، އިންތިޚާބު ބާއްވަން ޖެހެނީ 30 މާރޗްގައި ކަަމަށެވެ. އަދި އެއީ ރަމަޟާން މަސް ކަމަށް ވުމާއެކު އެކަން ވެގެންދާނީ އާއްމުންނަށް ވަރަށް ބޮޑު ތަކުލީފަކާއި ކުރިމަތިލާން ޖެހޭނެ ކަމަކަށް ކަމަށް ފުއާދު ވިދާޅުވިއެވެ. އެހެންކަމުން އެއީ އިލެކްޝަންސް ކޮމިޝަންގެ ކަންބޮޑުވުމެއް ކަމަށާއި އެ ވާހަކަ ކުރިން ވެސް ކަމާއި ގުޅުން ހުރި އިދާރާތަކާއި ހިއްސާކޮށްފައިވާނެ ކަމަށް ފުއާދު ވިދާޅުވިއެވެ. އެގޮތުން އެކަމާއި ގުޅުން ހުރި ނުރަސްމީ މަޝްވަރާތައް މީގެ ކުރިން ވެސް ކުރިއަށް ގެންދަވާފައިވާކަން ފުއާދު ފާހަގަކުރެއްވިއެވެ.

ފުއާދު ވަނީ ގާނޫނުގައި ބުނެފައިވާ ގޮތަށް އިންތިޚާބު ބާއްވާ ނަމަ އެ ތާރީޚު ދިމާވަނީ ރަމަޟާން މަހުގެ ފަހު 10 އަށް ވުރެ ކުޑަ ތަންކޮޅެއް ކުރީގެ ތާރީޚަކަށް ކަމަށް ވެސް ވިދާޅުވެފައެވެ. ރަމަޟާން މަހުގެ ތެރޭގައި ކެމްޕެއިން ކުރަން އުނދަގޫވާނެ ކަމަށް އޭނާ ވަނީ ވިދާޅުވެފައެވެ. އެެހެންކަމުން އެއީ ޕާޓީތަކަށް ވެސް ދިމާވާނެ ގޮންޖެހުމެއް ކަމަށް ފުއާދު ވިދާޅުވިއެވެ. ހަމައެހެންމެ އީސީގެ ސްޓާފުންނަށް ވެސް އެ ދުވަސްކޮޅު މަސައްކަތް ކުރަން އުނދަނގޫވާނެ ކަން ފުއާދު ފާހަގަކުރެއްވިއެވެ. އަދި ވަގުތީ ސްޓާފުން ހޯދުމަށް ވަކިން ބޮޑަށް ގޮންޖެހުންތައް ދިމާވާނެ ކަމަށް ޤަބޫލުކުރައްވާ ކަމަށް ފުއާދު ވިދާޅުވިއެވެ.

އެ ކޮމިޓީގައި ވާހަކަފުޅު ދައްކަވަމުން އީސީގެ ނާއިބުރައީސް އިސްމާއީލް ހަބީބް ވަނީ ގާނޫނުގައި ބަޔާންކުރާ މުއްދަތުތަކަށް ބަލައިގެން އިންތިހާބަށް ތައްޔާރުވާ ނަމަ އިންތިހާބަށް ކުރިމަތިލުމަށް ހުޅުވާލެވޭނީ ޖެނުއަރީ 30ގައި ކަމަށް ވިދާޅުވެފައވެެ. އަދި ކެނޑިޑޭޓުންނަށް ދޭންޖެހޭ 14 ދުވަހުގެ މުއްދަތު ދިނުމަށް ފަހު ކެންޑިޑޭޓު ނަމްބަރު ތަރުތީބު ކުރުމުގެ ކަންތައް ކުރިއަށްގެންގޮސް ލިސްޓު ތަރުތީބުކޮށް އިއުލާނުކުރެވޭނީ ފެބްރުއަރީ 17 ވަނަ ދުވަހު ކަމަށް އޭނާ ވަނީ ވިދާޅުވެފައެވެ. އެހެންކަމުން އިންތިހާބު ބޭއްވޭނެ އެންމެ ފަހު ތާރީހެއް ކަމަށް އޭނާ ވިދާޅުވީ މާޗް 30، 2024 ކަމަށާއި އެ ދުވަސް ދިމާވަނީ ރަމަޟާން މަހުގެ 20 ވަނަ ދުވަހަށް ކަމަށް ހަބީބު ވިދާޅުވިއެވެ. އެއީ އިންތިޚާބާއި ގުޅުން ހުރި މަސައްކަތަކަށް ދިމާވާނެ ގޮންޖެހުމެއްކަން ހަބީބް ވަނީ ފާހަގަކުރައްވާފައެވެ.

އީސީން އިތުރަށް ބުނީ ހިނގަމުންދާ މަޖިލީހުގެ ދައުރު ހަމަވުމުގެ 30 ދުވަސް ކުރިން މަޖިލިސް އިންތިހާބު ބާއްވަން ޖެހޭ ކަމަށެވެ. ޤާނޫނު ބުނާ ގޮތުން މަޖިލިސް އިންތިހާބާ ގުޅޭ އެންމެހާ ކަންތައްތައް ނިންމަންޖެހޭ އެންމެ ފަހު ތާރީޚަކީ އޭޕްރީލް 28، 2024 އެވެ.

މަޖިލިސް އިންތިޚާބާއި މެދު ޚިޔާލު ހޯދުމަށް އީސީއިން ސިޔާސީ ޕާޓީތަކާއެކު މަޝްވަރާކުރަން ވެސް ވަނީ ހަމަޖެހިފައެވެ.