ސްޕޭނާއި ބާސެލޯނާގެ މިޑްފީލްޑަރު ގަވީ ހަނާންޑޭޒްގެ ކަކުލަށް އަނިޔާވެ މި ސީޒަނުގައި ނުކުޅެވޭނެކަން ކަށަވަރުވެއްޖެ އެވެ.

ޔޫރޯ ކޮލިފައިންގައި އާދީއްތަ ދުވަހު ގެ ރޭ ޖޯޖިއާ އަތުން ސްޕޭން މޮޅުވި މެޗުގައި އޭނާގެ ކަކުލަށް ލިބުނު އަނިޔާގެ ސަބަބުން ގަވީ ދަނޑުން ބޭލީ ސިއްހީ މާހިރުންގެ އެހީގައި އަށިގަނޑުގަ އެވެ.

މި އަނިޔާގެ ސަބަބުން އޭނާ އަށް ގާތްގަނޑަކަށް 7 މަހާއި 9 މަހާ ދެމެދު ކުޅުމާ ދުރުގައި ހުންނަންޖެހޭނެ އެވެ. އުމުރުން 19 އަހަރުގެ ގަވީ އަކީ ސްޕޭނާއި ބާސެލޯނާގެ އެންމެ އުއްމީދީ މިޑްފީލްޑަރެވެ.

އޭނާ އަށް އަނިޔާވުމުން ސްޕޭނުގެ ކުޅުންތެރިންނަށް ލިބުނު ހައިރާންކަމުގައި މެޗަށް ފަހު އެންމެންތިބީ މޯޅިވެފަ އެވެ. ސްޕޭނާއި ބާސެލޯނާގެ ފޯވަޑް ފެރަން ޓޮރޭޒް ބުނީ މެޗަށް ފަހު ޗޭންޖިން ރޫމް ހީވީ ސަހަރާއެއްހެން ކަމަށެވެ.

ގަވީގެ އަނިޔާގެ ސަބަބުން ބާސެލޯނާ އަށް ވަނީ ގިނަ މައްސަލަތައް ކުރިމަތިވެފަ އެވެ. ސްޕޭންގެ ފެޑަރޭޝަނުން ގަވީގެ ބަދަލުގައި އައު ކުޅުންތެރިއަކު ޖަހަން ފުރުސަތު ދިން ނަމަވެސް ގަވީ ފެންވަރުގެ ކުޅުންތެރިއަކު ހޯދަން ވަނީ ދަތިވެފަ އެވެ.

ބާސެލޯނާއިން ބުނީ ގަވީގެ ކަކޫ މި ހަފުތާގެ ތެރޭގައި އޮޕަރޭޝަން ކުރާނެ ކަމަށެވެ.