ކުޅިވަރު ވުޒާރާގެ ސްޓޭޓް މިނިސްޓަރަކަށް ސަލްސާ އާމިރު

އައު ސަރުކާރުން އުފެއްދި ކުޅިވަރާއި ހަށިހެޔޮކަމާ ބެހޭ ވުޒާރާގެ ސްޓޭޓް މިނިސްޓަރަކަށް އިބްރާހީމް އާމިރު (ސަލްސާ) ހަމަޖައްސަވައިފި އެވެ.

އެ މަގާމަށް އާމިރު އައްޔަން ކުރައްވާފައި ވަނީ ހޯމަ ދުވަހު، ރައީސުލްޖުމްޙޫރިއްޔާގެ އޮފީހުގައި އޮތް ޚާއްސަ ރަސްމިއްޔާތެއްގަ އެވެ. އާމިރު އަށް މަގާމުގެ ލިޔުން ހަވާލުކޮށްދެއްވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެވެ. އެ މަގާމަށް އާމިރު އައްޔަން ކުރައްވާފައިވާއިރު، ކުޅިވަރު ވަޒީރަކަށް އައްޔަން ކުރައްވާފައި ވަނީ ޢަބްދުﷲ ރާފިޢު އެވެ.

އާމިރު އަކީ ދިވެހި ރާއްޖޭގެ ކުޅިވަރުގައި، ޚާއްސަކޮށް ފުޓުބޯޅައިގައި މަސައްކަތް ކުރައްވާފައިވާ ބޭފުޅެކެވެ. އެގޮތުން އާމިރު ވަނީ، 2008 ވަނަ އަހަރު އެކުލަވާލި ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިންޓަރިމް ކޮމެޓީގެ ވައިސް ޗެއާމަންކަން އަދާކުރައްވާފަ އެވެ. އޭގެ އިތުރުން، ޤައުމީ ފިރިހެން ފުޓުބޯޅަ ޓީމުގެ މެނޭޖަރުކަމާއި، 2013 ވަނަ އަހަރު އޮތް މަހިންދަ ރާޖްޕަކްސާގެ ޗެމްޕިއަންކަން ހޯދި ޓީމުގެ މެނޭޖަރުކަން ކުރެއްވި އެވެ. ހަމައެއާއެކު، މޯލްޑިވްސް ސްޕޯޓްސް ކޯޕަރޭޝަންގެ ބޯޑު މެންބަރުކަން ވެސް އާމިރު އަދާކުރެއްވި އެވެ. މީގެ އިތުރުން އާމިރު އަކީ ކުލަބު ވެލެންސިއާ އަށް ކުޅުނު ކުޅުންތެރިޔެކެވެ.

ކުޅިވަރުގެ އިތުރުން އާމިރު އަކީ ވިޔަފާރީގައި ވެސް މަސައްކަތް ކުރައްވަމުން އަންނަ ފަރާތެކެވެ. އެގޮތުން އާމިރު އަކީ ސަލްސާ އިންވެސްޓުމަންޓުގެ ޗެއާމަން އެވެ. މިފަހުން އާމިރު އިސްކޮށް ހުންނަވާ ވަނީ، ސޭވް އެފްއޭމްގެ ނަމުގައި ޚާއްސަ ޙަރަކާތެއް ފައްޓަވައިފަ އެވެ. އެއީ އެފްއޭއެމްގެ ހިންގުމުގައި ގިނަގުނަ މައްސަލަތަކެއް ދިމާވެ، އެ އިދާރާ ބަނގުރޫޓުވާން ކައިރިވެ، ފުޓުބޯޅައިގެ ފޯރި ދަށްވަމުން ދާތީ، އެކަންކަމަށް ޙައްލު ހޯދުގެ މަޤްސަދުގައި ފެއްޓެވި ޙަރަކާތެކެވެ.