ފްރާންސް އިން ގިބްރޯލްޓާ ކޮޅަށް ލަނޑު ފުންޏެއް

ޔޫރޯ ފުޓުބޯޅަ މުބާރާތުގެ ކޮލިފިކޭޝަންގައި ގިބްރޯލްޓާއާ ދެކޮޅަށް ކުޅުނު މެޗުން، ފްރާންސް 14 ލަނޑުގެ މޮޅެއް ހޯދައިފި އެވެ.

ހޮނިހިރު ދުވަހުގެ ރޭ، ގިބްރޯލްޓާއާ ދެކޮޅަށް ނުކުތްއިރު ވެސް ފްރާންސް ވަނީ އަންނަ އަހަރު ޖަރުމަނުގައި އޮންނަ ޔޫރޯ ފުޓުބޯޅަ މުބާރާތުގެ ޖާގައެއް ކަށަވަރު ކޮށްފަ އެވެ. މެޗުގެ ފުރަތަމަ ހާފުގައި ފްރާންސް އިން ހަތް ލަނޑު ޖެހިއިރު، ދެ ވަނަ ހާފުގައި ވެސް ވަނީ ހަތް ލަނޑު ޖަހައިފަ އެވެ.

ފުރަތަމަ ހާފުގައި ފްރާންސްގެ ލަނޑުތައް ޖެހީ މާކަސް ތުރަމް، ވަރޭން ޒެއިރް އެމެރީ، ކީލިއަން އެމްބާޕޭ، ޖޮނަތަން ކްލައުސް، ކިންގްސްލީ ކޯމަން އަދި ޔޫސުފް ފޮފާނާ އެވެ. އަނެއް ލަނޑަކީ ގިބްރޯލްޓާގެ އީތަން ސަންޓޯސް އަތުން ބައި ކޮޅަށް ވަން ލަނޑެކެވެ. ދެ ވަނަ ހާފުގައި ފްރާންސްގެ ލަނޑުތައް ޖެހީ، އެޑްރިއަން ރާބިއޮޓް، ކޯމަން، އޮސްމާން ޑެމްބެލޭ، އެމްބާޕޭ އަދި އޮލީވިއޭ ޖިރޫޑް އެވެ. މީގެ ތެރެއިން އެމްބާޕޭ އަދި ޖިރޫޑް ވަނީ ދެ ވަނަ ހާފުގައި ދެ ލަނޑު ޖަހައިފަ އެވެ. މެޗުގެ ފުރަތަމަ ހާފުގައި ޖެހި ލަނޑާއެކު، އެމްބާޕޭ ވަނީ ހެޓްރިކް ހަމަކޮށްފަ އެވެ.

ކޮލިފިކޭޝަންގައި ފްރާންސް ހިމެނޭ ގްރޫޕް ބީގެ އެއް ވަނައިގައި އެ ޓީމު އޮތީ މިހާތަނަށް ކުޅުނު ހަތް މެޗުން ވެސް މޮޅުވެ، 21 ޕޮއިންޓު ހޯދައިގެންނެވެ. ކޮލިފިކޭޝަންގައި ފްރާންސްގެ ފަހު މެޗުގައި ނުކުންނާނީ ގްރީސްއާ ދެކޮޅަށެވެ.