އެމްޑީޕީ ޕީޖީ ގްރޫޕުގެ ލީޑަރުކަމަށް 3 މެމްބަރުން ވާދަކުރައްވަނީ، އިންތިޚާބު ބުރާސްފަތި ދުވަހު
18 ނޮވެމްބަރު 2023 | ހޮނިހިރު 17:13އިންތިޚާބު އޮންނާނީ ބުރާސްފަތި ދުވަހުގެ 14:00ން 16:00ށް
އެމްޑީޕީގެ ޕީޖީގެ ލީޑަރުކަމަށް ވާދަކުރައްވާ ތިން މެމްބަރުން
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޕީޖީ ގްރޫޕުގެ ލީޑަރު ހޮވުމަށް ބާއްވާ އިންތިޚާބު، އަންނަ ބުރާސްފަތި ދުވަހު ބާއްވަން ނިންމައިފިއެވެ.
އެމްޑީޕީން ހޮނިހިރު ދުވަހު ބުނީ، ހުސްވެފައިވާ ޕާލިމަންޓަރީ ގްރޫޕްގެ ލީޑަރު ހޮވުމަށް ބާއްވާ އިންތިޚާބު، 23 ނޮވެމްބަރ 2023ވާ ބުރާސްފަތި ދުވަހުގެ 14:00ން 16:00ށް، އެމްޑީޕީ އޮފީހުގެ ޖަލްސާކުރާ މާލަމުގައި (ގ. ނިއުޝާ / 3ވަނަ ފަންގިފިލާގައި) އޮންނާނެ ކަމަށެވެ. މި އިންތިޚާބުގައި ތިން މެމްބަރުން ވާދަކުރައްވާ ކަމަށްވެސް އެ ޕާޓީން ބުނެއެވެ.
އެމްޑީޕީ ޕީޖީ ގްރޫޕުގެ ލީޑަރަކު އައްޔަންކުރުމަށް އިންތިޚާބު ބާއްވަން ނިންމާފައިވަނީ، ޕީޖީ ގްރޫޕުގެ ލީޑަރުގެ ގޮތުގައި ހުންނެވި އައްޑޫ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް، މަޖިލީހުގެ ރައީސްކަމަށް އިންތިޚާބުވުމާއެކު އެ މަގާމުން އިސްތިއުފާ ދެއްވުމާ ގުޅިގެންނެވެ. އެމްޑީޕީއަކީ މަޖިލީހުގެ މެޖޯރިޓީ ޕާޓީއެވެ.
މި އިންތިޚާބުގައި ވާދަކުރައްވަނީ:
ކެންޑިޑޭޓް ނަންބަރު 1- މުހައްމަދު ރަޝީދު ހުސައިން, އަލިފުށީ ދާއިރާ
ކެންޑިޑޭޓް ނަންބަރު 2- އަބްދުލް ޣަނީ އަބްދުލްހަކީމް، ކުރެންދޫ ދާއިރާ
ކެންޑިޑޭޓް ނަންބަރު 3- އަބްދުﷲ ޖާބިރު، ކާށިދޫ ދާއިރާ
