އަދުލު އިންސާފު ނިޒާމުގެ ތެރެއަށް ސަރުކާރުގެ ކުޑަ ވެސް ނުފޫޒެއް ވަންނާނެ ޖާގައެއް ނުދޭނަން: ރައީސް މުއިއްޒު
17 ނޮވެމްބަރު 2023 | ހުކުރު 13:13ރާއްޖޭގެ ބާރުތަކުގެ މިނިވަންކަން ކަށަވަރުކުރާނެ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު
އަދުލު އިންސާފުގެ ނިޒާމުގެ ތެރެއަށް ސަރުކާރުގެ ކުޑަ ވެސް ނުފޫޒެއް ވަންނާނެ ޖާގަ ނުދޭނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ހުކުރު ދުވަހުގެ ހަވީރު ރައީސްކަމުގެ ހުވާކުރައްވާ ތަގުރީރުދެއްވަމުން ، ރައީސް މުއިއްޒު ވިދާޅުވީ ރާއްޖޭގެ ބާރުތަކުގެ މިނިވަންކަން ކަށަވަރުކުރައްވާނެ ކަމަށެވެ.
ޚާއްސަކޮށް އަދުލު އިންސާފުގެ ނިޒާމުގެ ތެރެއަށް ސަރުކާރުގެ ކުޑަ ވެސް ނުފޫޒެއް ވަންނާނެ ޖާގަ ނުދޭނެ ކަމަށާއި، މީގެ މާނައަކީ ދިވެހި ރައްޔިތުންނާއި ދިވެހި ދައުލަތަށް ހިޔާނަތްތެރިވާ ފަރާތްތަކާއި މެދު ސަރުކާރު ލޯ މަރާލުން ނޫން ކަމަށް ރައީސް މުއިއްޒު ވިދާޅުވިއެވެ.
ރައްޔިތުންނަށް ވެވަޑައިގެންނެވި ވައުދުތައް ފުއްދަވާނެ ކަމުގެ ޔަގީންކަން ދެއްވައި ރައީސް މުއިއްޒު ވިދާޅުވީ ދެމެހެއްޓެބިވި އަދުލުވެރި ތަރައްގީގެ ނިޒާމެއް ބޭނުންވާ ކަމަށާއި، އެކަމަށް އަމާޒުތަކެއް ކަނޑައަޅުއްވައި ކަންކަން ކުރިއަށްދާނީ ދިވެހިންގެ ހިޔާލުތަކާއި އެކުގައި ކަމަށެވެ. އަދި ކުރިއަށް އޮތީ ދިވެހިންނަށް އުޖާލާ ދުވަސްތަކެއް ކަމަށާއި، ރައްޔިތުން ބާރުވެރިކުރުވުމުގެ ގޮތުން، ޒުވާނުންނާއި އަންހެނުނަށް އަމަލީ މައިދާނުގައި ކުރިއަށްދިއުމަށް ޒަމާނީ ޓެކްނޮލޮޖީ މެދުވެރިކޮށް ވިޔަފާރި ކުރުމަށް ފަހިކޮށްދެއްވާނެ ކަމަށް ރައީސް މުއިއްޒު ވިދާޅުވިއެވެ.
