ޣައްޒާގެ 35 ހޮސްޕިޓަލުތަކުގެ ތެރެއިން، ޚިދުމަތް ދެވެނީ 9 ހޮސްޕިޓަލުން

ޣައްޒާގައި ހުންނަ 35 ހޮސްޕިޓަލުގެ ތެރެއިން، ކުޑަކޮށް ނަމަވެސް ޚިދުމަތް ދެވޭ ވަރުވަނީ އެންމެ ނުވަ ހޮސްޕިޓަލުން ކަމަށް ޣައްޒާގެ ހެލްތް މިނިސްޓްރީން ބުނެފި އެވެ.

ޣައްޒާގެ ހެލްތް މިނިސްޓްރީގެ ތަފާސް ހިސާބުތައް ރިޕޯޓުކުރަމުން އަލް-ޖަޒީރާ އިން ރިޕޯޓުކޮށްފައިވާ ގޮތުން، 35 ހޮސްޕިޓަލުގެ ތެރެއިން 9 ހޮސްޕިޓަލު ކުޑަކޮށް ނަމަވެސް މަސައްކަތް ކުރާއިރު، ދެން ހުރި ހުރިހާ ހޮސްޕިޓަލުތަކެއް ވަނީ ޚިދުމަތް ނުދެވޭ ވަރަށް ހަލާކުވެފައި އެވެ.

އެގޮތުން ޣައްޒާގެ އެންމެ ބޮޑު ހޮސްޕިޓަލް، އައްޝިފާ ހޮސްޕިޓަލުން އެކަނި ވެސް، ތެޔޮ ނުލިބުމުގެ ސަބަބުން ނޮވެމްބަރު މަހުގެ 11 ވަނަ ދުވަހުން ފެށިގެން ދުވަސް ނުފުރާ ތިން ކުދިންނާއެކު 40 މީހަކު މަރުވެފައިވާ ކަމަށް އެ މިނިސްޓްރީން ބުންޏެވެ.

އެގޮތުން އެ ހޮސްޕިޓަލުގެ ބޭރުން އިޒްރޭލުގެ ޑްރޯންތަކުން އެ ހޮސްޕިޓަލް ގައި ހަރަކާތްތެރިވާ މީހުންނަށް އަމާޒުކޮށް ބަޑި ޖެހުމުގެ ސަބަބުން، އެ ހޮސްޕިޓަލުތަކުގެ ޑިޕާޓްމަންޓްތަކާއި އިމާރާތްތަކުގެ މެދުގައި މެޑިކަލް ޓީމުތަކަށް ހިނގާ ބިނގާވެ އުޅެން ދަތިވެ، އެހީތެރިކަން ފޯރުކޮށްދޭން ވެސް ދަތިވެފައިވާ ކަމަށް އެ މިނިސްޓްރީން ބުންޏެވެ.

އެ މިނިސްޓްރީން ބުނި ގޮތުގައި، އެ ހޮސްޕިޓަލުން އެކަނި ވެސް މަރުވި މީހުންގެ ތެރޭގައި މެޑިކަލް ސްޓާފުންގެ 202 މީހަކާއި ސިވިލް ޑިފެންސްގެ 26 މީހަކު ހިމެނެ އެވެ. އަދި 200 އަށް ވުރެ ގިނަ ސިއްހީ ހިދުމަތްތެރިން ވަނީ ޒަހަމްވެފަ އެވެ.

އެގޮތުން މުޅި ޣައްޒާގެ ޖުމްލަ އަދަދުތަކުން އެ މިނިސްޓްރީން ބުނި ގޮތުގައި، ބުދަ ދުވަހުގެ ނިޔަލަށް ފަލަސްތީނުން މަރުވި މީހުންގެ އަދަދު 11،470 އަށް އަރާފައިވާއިރު އޭގެ ތެރެއިން 4،407 މީހުންނަކީ ކުޑަކުދިންނެވެ. އަދި 29،000 އަށް ވުރެ ގިނަ މީހުން ވަނީ ޒަހަމްވެފަ އެވެ.

އަދި ބުދަ ދުވަހުގެ ނިޔަލަށް ޣައްޒާގެ އާންމުންގެ 3،640 އަށް ވުރެ ގިނަ މީހުން ގެއްލިފައިވާ އިރު، އޭގެ ތެރޭގައި 1،770 ކުޑަކުދިން ވެސް ހިމެނެ އެވެ.

މީގެ އިތުރުން، ޣައްޒާގެ ހައުސިން ޔުނިޓްތަކުގެ 58 އިންސައްތަ ހަލާކުކޮށްފައިވާ ކަމަށް ވެސް އެ މިނިސްޓްރީން ބުންޏެވެ.