މަޖިލިސް ބަންދުކުރި މައްސަލައިގައި އެމްއެންޑީއެފުން ބަހެއް ނުބުނެ ހިމޭނުން!

ރައްޔިތުންގެ މަޖިލީހުގެ އިދާރާގައި ތަޅު އަޅުވައި މެމްބަރުން ވަނުން މަނާކުރި މައްސަލަ އާއި މަޖިލީހުގެ އިދާރާއަށް ފުލުހުން ވައްދައިގެން މަޖިލީހުގެ ކަރާމާތް ނަގައިލި މައްސަލައިގައި އެމްއެންޑީއެފުން ބެހެއް ނުބުނެ ހިމޭންވެއްޖެ އެވެ.

ފުލުހުންގެ ތަރުޖަމާނު އަހްމަދު ޝިފާން ވިދާޅުވީ ފުލުހުން މަޖިލީހަށް ވަނީ ފުލުހުންގެ އެހީތެރިކަމަށް ސިފައިން އެދުުމުންނާއި މަޖިލީހުގެ މެމްބަރުންގެ ގޮތުގައި ނެތް ބަޔަކު ނެރުމަށް ކަމަށެވެ.

"މަޖިލިސްގެ ސެކިއުރިޓީއަކީ ސިފައިން ބަލަހައްޓާ ޓާސްކެއް. ގާނޫނީ ގޮތުން ސިފައިންނަށް ފުލުހުންގެ ކިބައިން އެހީތެރިކަމަށް އެދެވޭ. އަދި ފުލުހުންނަށް އެހީތެރިކަން ވެސް ފޯރުކޮށްދެވޭނެ. ފުލުހުން މަޖިލީހުގައި ހަރަކާތްތެރިވީ ސިފައިން ފުލުހުންގެ ކިބައިން އެދިފައިވާ ގޮތަށް،" ޝިފާނު ވިދާޅުވި އެވެ.

މިކަންކަމާ ގުޅޭ ގޮތުން ބަހެއް ހޯދުމަށް ޗީފް އޮފް ޑިފެންސް ފޯސް އަހްމަދު ޝިޔާމް އަދި އެމްއެންޑީއެފްގެ މީޑިއާ އޮފިޝަލަށް ގުޅައިގެން އަދި މެސެޖްކޮށްގެން ވެސް ބަހެއް ނުލިބުނެވެ.

މަޖިލީހުގެ އިދާރާއަށް ފުލުހުން ވަނީ، މެމްބަރުންގެ ގޮތުގައި ހިމެނިވަޑައިނުގަންނަވާ ބޭފުޅުން ކޮޅެއް މަޖިލީހުގެ އިދާރާއިން ނެރުމަށް ކަމަށް ޝިފާން ވިދާޅުވިޔަސް، ފުލުހުން ފުރަތަމަ މަޖިލީހުގެ އިދާރާއަށް ވަނުމަށް ފަހު ނެރުނީ، އިލެކްޝަނުން ގޮނޑި ގެއްލުވާލި މެމްބަރުންނެއް ނޫނެވެ.

ފުލުހުން މިހެން ބުނިއިރު ގޮނޑި ގެއްލިފައިވާ ކަމަށް ކަނޑައަޅާފައިވާ މެމްބަރުންގެ މައްސަލަ އޮތީ ސުޕްރީމް ކޯޓަށް ހުށަހަޅައިފަ އެވެ. ގާނޫނު އަސާސީގެ 74 ވަނަ މާއްދާގައި ބުނެފައިވާ ގޮތުން އިންތިހާބުކުރާ ގޮނޑިއަކާމެދު ހިލާފު އުފެދިއްޖެ ނަމަ އެ ގޮނޑި ގެއްލުނުކަން ކަނޑައަޅާނީ ސުޕްރީމް ކޯޓުން ނެވެ.