އިލެކްޝަންސް ކޮމިޝަންގެ މެންބަރުކަމުގެ އިތުރު ދައުރެއް ދިނުމަށް އަލީ ނަޝާތަށް ރައްޔިތުންގެ މަޖިލީހުން ރުހުންދީފިއެވެ.

މަޖިލީހުން ރުހުން ދީފައިވަނީ އަލީ ނަޝާތު އެ ކޮމިޝަންގެ މެންބަރުކަމަށް އިތުރު ދައުރަކަށް ޢައްޔަން ކުރެއްވުމަށް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވި ނަން ރައްޔިތުންގެ މަޖިލީހުގެ މިނިވަން މުއައްސަސާތަކާބެހޭ ކޮމެޓީން ދިރާސާކުރުމަށްފަހު މަޖިލީހުގައި ބުދަ ދުވަހު ނެގުނު ވޯޓުގައެވެ.

އިލެކްޝަންސް ކޮމިޝަންގެ މެންބަރުކަމުގެ މަޤާމުގައި ހުންނެވި ނަޝާތުގެ ދައުރު ހަމަވާން ކައިރިވެފައި ވާތީ އެ ކޮމިޝަނުގެ މެންބަރުކަމަށް ކުރިމަތިލުމަށް ހުޅުވާލި ފުރުސަތުގައި ކުރިމަތިލީ ފަރާތްތަކުގެ ނަޝާތު އެ މަޤާމަށް އައްޔަން ކުރުމަށް ރައީސަށް ފެނިވަޑައިގަންނަވާތީ އޭނާ އެ މަޤާމަށް އައްޔަން ކުރުމަށް ރުހުން ހޯދުމަށް ފޮނުވީ މެއި 29 ގައެވެ.

ޢަލީ ނަޝާތުއަކީ 2018 ވަނަ އަހަރުން ފެށިގެން އިލެކްޝަންސް ކޮމިޝަންގެ މެންބަރެއްގެ ގޮތުގައި ހުންނެވި ބޭފުޅެކެވެ. އޭނާގެ ދައުރު ހަމަވެފައިވަނީ 25 ޖުލައި 2023 ގައެވެ.

ނަޝާތަށް ރުހުން ދިނުމާއި ގުޅޭގޮތުން މަޖިލީހުގައި ނެގުނު ވޯޓުގައި ބައިވެރިވެވަޑައިގެންނެވި 51 މެންބަރުންގެ ތެރެއިން 42 މެންބަރުން ވަނީ ރުހުން ދިނުމަށް ފެންނަ ކަމަށް ވޯޓު ދީފައެވެ. ނުފެންނަ ކަމަށް ވޯޓު ދީފައިވަނީ 9 މެންބަރުންނެވެ.