ޝެންގެން ސަރަހައްދުގައި ހިމެނޭ ގައުމުތަކަށް ދާ ދިވެހިންނަށް އީ-ވިސާއަށް އެދެވޭ ގޮތް ހަދަން ނިންމައިފިއެވެ.
މި ބަދަލު އަންނާނެކަމަށް ފޮޮރިން މިނިސްޓަރު ޢަބްދުﷲ ޝާހިދު އަންގާރަ ދުވަހު ވިދާޅުވީ، ޝެންގެން ސަރަހައްދަށް ވިސާ ނެގުމަށް އޮންލައިންކޮށް އެދެވޭނެގޮތަށް، ވިސާއާބެހޭ އައު ގަވާއިދުތަކެއް ފާސްކުރުމަށް ޔޫރަޕިއަން ކައުންސިލުން ނިންމުމާ ގުޅިގެންނެވެ. އެ ނިންމުމަށް އެމަނިކުފާނު ވަނީ މަރުހަބާ ވިދާޅުވެފައެވެ.
ޝާހިދު ވިދާޅުވީ، މި ނިޒާމު ފެށުމަށްޓަކައި ފުރިހަމަކުރަންޖެހޭ އިޖުރާއަތުތައް ފުރިހަމަވުމުން، ޝެންގެން ވިސާއަށް އެދޭ ދިވެހިންނަށް އީ-ވިސާ ލިބޭނެ މަގުފަހިވެގެންދާނެ ކަމަށެވެ. އެހެންވެ، ޔޫރަޕިއަން ކައުންސިލަށް އެމަނިކުފާނު ވަނީ ޝުކުރު އަދާކުރައްވާފައެވެ.
ޔޫރަޕިއަން ކައުންސިލުގެ މި ނިންމުމާއެކު، އިދާރީ ތައްޔާރީތަކަށްފަހު އެކަން ތަންފީޒުކުރެވޭނެ ތާރީޚެއް އިއުލާންކުރާނެއެވެ. މި އިންތިޒާމު ހަމަޖެހިގެން ދިއުމުން، ޝެންގެން ވިސާ ހޯދުމަށް ދިވެހިން ބޭރުގެ އެއްވެސް ގައުމަކަށް ދާން ނުޖެހޭނެކަމަށާއި ރާއްޖޭގައި ތިބެގެން އޮންލައިންކޮށް ވިސާއަށް އެދެވޭނެކަމަށް ފޮރިން މިނިސްޓްރީން ބުނެއެވެ.
ޝެންގެން ވިސާއަކީ ޔޫރަޕުގެ 25 ގައުމެއް ހިމެނޭ ޝެންގެން ސަރަހައްދަށް ދަތުރުކުރުމަށް ނަގާ ވިސާއެކެވެ. މި ވިސާއާއެކު، އެ ސަރަހައްދުގެ އެއް ގައުމަކަށް ވިސާއާއެކު ވަނުމަށްފަހު، 90 ދުވަހުގެ ތެރޭގައި އެ ސަރަހައްދުގެ ހުރިހާ ގައުމަކަށްވެސް ބޯޑަރު ކޮންޓްރޯލަކާނުލައި ވަދެވޭނެއެވެ.
ޔޫރަޕުގެ ގައުމުތަކަށް ދަތުރުކުރާ ދިވެހިންނަށް ވިސާގެ ލުއި ފަސޭހަ ގޮތްތަކެއް ހަމަޖެއްސުމަށް ޔޫރަޕިއަން ޔޫނިއަންއާއެކު ފޮރިން މިނިސްޓްރީން ވަނީ ފާއިތުވި ފަސް އަހަރު ދުވަހުގެ ތެރޭގައި ގިނަ މަސައްކަތްތަކެއް ކޮށްފައެވެ.
އެ މިނިސްޓްރީން ކުރި މަސައްކަތުގެ ނަތީޖާއެއްގެ ގޮތުން، މިހާރު ކުރިން ވިސާ ނެގުމަކާނުލައި، ދިވެހި ޕާސްޕޯޓުގައި 101 ގައުމަކަށް ދަތުރުކުރެވެއެވެ. މިއީ މި ސަރަހައްދުގެ އެންމެ ބާރުގަދަ ޕާސްޕޯޓެކެވެ.
