ރާއްޖޭގައި ތިބެގެން ފްރާންސް، ސްޕެއިން އަދި ޕޯޗުގަލްގެ ޝެންގެން ވިސާ ނެގޭ ގޮތް ހަދައިފި
ވީއެފްއެސް މާލެ ހުޅުވީ 1 މާރިޗު 2020ގައި
ފޮރިން މިނިސްޓްރީ
ފްރާންސް، ސްޕެއިން އަދި ޕޯޗުގަލްއަށް ދާ ދިވެހިންނަށް މާލެއިން ޝެންގެން ވިސާ ނެގޭނެ ގޮތް ފޮރިން މިނިސްޓްރީން ހަމަޖައްސައިފިއެވެ.
ޝެންގެން ވިސާއަކީ ޔޫރަޕުގެ 25 ގައުމެއް ހިމެނޭ ޝެންގެން ސަރަހައްދަށް ދަތުރުކުރުމަށް ނަގާ ވިސާއެކެވެ. މި ވިސާއާއެކު އެ ސަރަހައްދުގެ އެއް ގައުމަކަށް ވިސާއާ އެކު ވަނުމަށް ފަހު، 90 ދުވަހުގެ ތެރޭގައި އެ ސަރަހައްދުގެ ހުރިހާ ގައުމަކަށްވެސް ބޯޑަރު ކޮންޓްރޯލަކާ ނުލައި ވަދެވޭނެއެވެ.
ފޮރިން މިނިސްޓްރީން އާދީއްތަ ދުވަހު ނެރުނު އިއުލާނެއްގައި ބުނީ ޔޫރަޕްގެ ޤައުމުތަކަށް ދަތުރުކުރާ ދިވެހިންނަށް ލުއިފަސޭހަކަމާއެކު ވިސާއަށް އެޕްލައިކުރެވޭ އިންތިޒާމު ހަމަޖެއްސުމަށް ހުޅުވި ވީއެފްއެސް ގްލޯބަލް ޖޮއިންޓް ޝެންގެން ވިސާ އެޕްލިކޭޝަން ސެންޓަރު (ވީއެފްއެސް މާލެ) ގެ ސަބަބުން ޝެންގެން ވިސާ ހޯދުމަށް މީގެ ކުރިން އުފުލާންޖެހުނު ތަކުލީފުތައް ނައްތާލެވި، ވަރަށް ބޮޑު ލުއިފަސޭހައެއް ލިބިގެންދިޔަކަމަށް ދެކޭ ކަމަށެވެ. ވީއެފްއެސް މާލެ ހުޅުވީ 1 މާރިޗު 2020ގައެވެ.
ވީއެފްއެސް މާލެ ސެންޓަރުން ޔޫރަޕުގެ ގިނަ ޤައުމުތަކަކަށް ޝެންގެން ވިސާއަށް ރާއްޖެއިން އެޕްލައިކުރުމުގެ ފުރުސަތު ވަނީ ތަނަވަސްވެފައެވެ. މި ޚިދުމަތް އިތުރަށް ފުޅާކުރުމަށް ޝެންގަން ޒޯނުގައި ހިމެނޭ ގައުމުތަކުގެ ޚާރިޖީ ވުޒާރާތަކާއެކު ކުރެވުނު ކާމިޔާބު މަޝްވަރާތަކުގެ ނަތީޖާއެއްގެ ގޮތުން ވީއެފްއެސް މާލެ ވިސާ ސެންޓަރާ ރަސްމީކޮށް ސްވިޓްޒަލެންޑުން 21 އޮގަސްޓު 2023ގައި ގުޅިފައިވާ ކަމަށް ފޮރިން މިނިސްޓްރީން ބުންޏެވެ.
ސްވިޒަލެންޑުން ވީއެފްއެސް މާލެ ސެންޓަރާ ގުޅުމުން އެ ސެންޓަރު މެދުވެރިކޮށް ސްވިޒެލެންޑާއި ޕޮލެންޑާއި ލަގްޒެމްބަރގް އަދި ސްލޮވީނިއާ ޝެންގެން ވިސާއަށް އެދި ހުށަހެޅޭނެއެވެ.
މީގެ އިތުރުން އާދީއްތަ ދުވަހުން ފެށިގެން ފްރާންސާއި ސްޕެއިން އަދި ޕޯޗުގަލްގެ ޝެންގެން ވިސާއަށް ވެސް އެ ސެންޓަރު މެދުވެރިކޮށް ހުށަހެޅޭ އިންތިޒާމު ހަމަޖެހިފައިވާ ކަމަށް ފޮރިން މިނިސްޓްރީން ބުންޏެވެ.
ވީއެފްއެސް މާލެ ސެންޓަރު ހުޅުވުމުގެ ކުރިން ދިވެހިން، ޝެންގެން ވިސާ ނަގަން ޖެހެނީ އަވަށްޓެރި ސްރީލަންކާ އަށް ނުވަތަ އިންޑިއާއަށެވެ.
