ޝެންގެން ވިސާގެ ލުއިތަކާއި ގުޅޭގޮތުން މަޝްވަރާކޮށްފި

ޔޫރަޕަށް ދަތުރުކުރާ ދިވެހިންނަށް ޝެންގެން ވިސާ ހޯދުމުގައި މިހާރަށް ވުރެ ލުއިފަސޭހަ ގޮތްތަކެއް ހަމަޖައްސަވައި ދެއްވުމަށް ފޮރިން މިނިސްޓަރު އަބްދުﷲ ޝާހިދު އެދިވަޑައިގެންފިއެވެ.

އިލެކްޓޯރަލް ކެމްޕެއިން ބިޑް ކޮމިޓީގެ ރައީސް ޑރ ގައެޓާނޯ ކަސްޓެލިނީ ކަރިއަލްއާ ބުދަ ދުވަހު މިނިސްޓަރު ވަނީ ބައްދަލު ކުރައްވާފައެވެ. އެގޮތުން މި ބައްދަލުކުރެއްވުމުގައި މިނިސްޓަރު ޝާހިދު ވަނީ ޔޫރަޕަށް ދަތުރުކުރާ ދިވެހިންނަށް ޝެންގެން ވިސާ ހޯދުމުގައި މިހާރަށް ވުރެ ލުއިފަސޭހަ ގޮތްތަކެއް ހަމަޖައްސައިދެއްވުމަށް އެދިވަޑައިގެންފައެވެ.

މިއީ ޑރ ގައެޓޯނާ ޑިސެމްބަރު މަހުގެ 5 ވަނަ ދުވަހުން ފެށިގެން 7 ވަނަ ދުވަހަށް ރާއްޖެއަށް ކުރެއްވި ދަތުރުފުޅުގެ ތެރެއިން ބޭއްވެވި ބައްދަލުކުރެއްވުމެކެވެ.

މިނިސްޓްރީ އޮފް ފޮރިން އެފެއާޒުގައި އޮތް މި ބައްދަލުކުރެއްވުމުގައި މިނިސްޓަރު ޝާހިދު ވަނީ އިޓަލީއާއި ޔޫރަޕިއަން ޔޫނިއަންއާ ދެމެދު ރާއްޖެއިން ބާއްވާ ގުޅުމުގެ މުހިއްމުކަމުގެ މައްޗަށް އަލިއަޅުވާލައްވާފައެވެ. އެގޮތުން ރާއްޖޭގެ ފަތުރުވެރިކަން އަލުން ފަށައިގަތުމުގައި އިޓަލީގެ ބައިވެރިވުން އޮތް މިންވަރަށްވެސް މިނިސްޓަރު ވަނީ އަލިއަޅުވާލައްވާފައެވެ.

މިނިސްޓަރު ވަނީ ޔޫރަޕަށް ދަތުރުކުރާ ދިވެހިންނަށް ޝެންގެން ވިސާ ހޯދުމުގައި މިހާރަށް ވުރެ ލުއިފަސޭހަ ގޮތްތަކެއް ހަމަޖައްސަވައި ދެއްވުމަށާއި، ރާއްޖެއިން ބާނާ މަހަށް ޔޫރަޕްގެ މާކެޓްގައި ފުރުސަތުތައް ފަހިކޮށް ދިނުމުގެ ގޮތުން، ރާއްޖެއިން ޔޫރަޕަށް އެކްސްޕޯޓްކުރާ މަހުގެ ބާވަތްތަކުން ނަގާ ޓެރިފް ނުވަތަ ޑިއުޓީ ކުޑަކުރުމާ ގުޅޭގޮތުން މަޝްވަރާ ކުރައްވާފައެވެ.

އިޓަލީވިލާތުން ޝެންގެން ވިސާ ރާއްޖެއިން ލިބޭނެ ގޮތް ހަމަޖެއްސެވުމުން ރާއްޖެއިން ޔޫރަޕުގެ ފަސް ގަޢުމެއްގެ ޝެންގެން ވިސާ ލިބިގެން ދާނެއެވެ. އެއީ ޖަރުމަނުވިލާތާއި ޗެކްރިޕަބްލިކު، އޮސްޓަރިޔާއާއި ހަންގޭރީ އަދި އެންމެ ފަހުން ހަމަޖެހުނު އިޓަލީ ވިލާތެވެ.

އޭގެ އިތުރުން، ދެ ޤައުމުގެ ގުޅުން މިހާރަށްވުރެ ބޮޑަށް ބަދަހި ކުރެވޭނެ ގޮތްތަކާއި ގުޅޭގޮތުންވެސް މި ބައްދަލުކުރެއްވުމުގައި ވަނީ މަޝްވަރާ ކުރައްވާފައެވެ.

މި ބައްދަލުކުރެއްވުމުގައި މިނިސްޓަރުގެ އިތުރުން މިނިސްޓަރ އޮފް ސްޓޭޓް ފޮރ ފޮރިން އެފެއާޒް އަހުމަދު ޚަލީލުއާއި، ޖޮއިންޓް ސެކެޓަރީ މަރިޔަމް މިފްދާ ނައީމްގެ އިތުރުން، އެސިސްޓެންޑް ޑިރެކްޓަރ މުހައްމަދު ޝައްފާއު އިބްރާހިމްއާއި، އެސިސްޓެންޑް ޑިރެކްޓަރ އައިޝަތު ރަޔަހީން ބައިވެރިވެވަޑައިގެންފައިވެއެވެ.

ޑރ ގައެޓޯނާގެ އަރިހުގައި އިޓަލީން ރާއްޖެއަށް ކަނޑައަޅުއްވާފައިވާ ސަފީރު ރީތާ ޖޫލިއާނާގެ އިތުރުން، އޮނަރަރީ ކޮންސުލް ރިޕްރެޒެންޓޭޓިވް އޮފް އިޓަލީ އިން މޯލްޑިވްސް، ޖޯޖިއާ މަރާޒީ ބައިވެރިވެވަޑައިގެންފައިވެއެވެ.