ސަޕްލިމެންޓްރީ ބަޖެޓުގެ މަސައްކަތް މާދަމާ ފަށާ ކޮމިޓީއަށް ފޮނުވަން ފާސްކޮށްފި
ސަޕްލިމެންޓްރީ ބަޖެޓުގެ މަސައްކަތަށް ކޮމިޓީގައި ހޭދަކުރާނީ 2 ދުވަސް
ރައްޔިތުންގެ މަޖިލީހުގެ ޖަލްސާއެއްގެ ތެރެއިން - ސަޕްލިމެންޓްރީ ބަޖެޓުގެ މަސައްކަތް ކުރިއަށްގެންދާނެ ގޮތް ވަނީ ފާސްކޮށްފައި
ސަޕްލިމެންޓްރީ ބަޖެޓުގެ މަސައްކަތް ބުދަ ދުވަހު ފަށާ ކޮމިޓީއަށް ފޮނުވަން ފާސްކޮށްފިއެވެ.
މިއަހަރަށް އިތުރަށް 6.509 ބިލިއަން ރުފިޔާ ބޭނުންވާނެ ކަމަށް ފިނޭންސުން ލަފާކޮށް މަޖިލީހަށް ސަޕްލިމެންޓްރީ ބަޖެޓް ހުށަހެޅީ އޮކްޓޯބަރު 18 ވަނަ ދުވަހުއެވެ. ސަޕްލިމަންޓްރީ ބަޖެޓުގައި މައިގަނޑުގޮތެއްގައި ޚަރަދުކުރުމަށް ކަނޑައަޅާފައިވަނީ، ޕީއެސްއައިޕީއާއި އާސަންދަ އަދި ސަބްސިޑީއަށް ކުރާ ޚަރަދުތަކާއި ސަރުކާރު ހިއްސާވާ ކުންފުނިތަކަށް ދޫކުރާ ކެޕިޓަލް ކޮންޓްރިބިއުޝަނަށެވެ.
އެގޮތުން، ސަބްސިޑީއަށް 1.85 ބިލިއަން ރުފިޔާ އިތުރަށް ހޭދަވާނެ ކަމަށް ލަފާކޮށްފައިވާއިރު އާސަންދައަށް 1.26 ބިލިއަން ރުފިޔާ އަދި ޕީއެސްއައިޕީ މަޝްރޫއުތަކަށް 1.78 ބިލިއަން ރުފިޔާ އިތުރަށް ހޭދަވާނެކަމަށް ވަނީ ލަފާކޮށްފައެވެ.
ފިނޭންސް މިނިސްޓްރީން ބުނީ މިއަހަރު ޕީއެސްއައިޕީ މަޝްރޫއުތައް ހިންގުން ހަލުވިވެ، ބަޖެޓުކުރި މިންވަރަށްވުރެ ބޮޑަށް އެނޫން ޚަރަދުތައްވެސް ހިނގައި، ބަޖެޓު ފާސްކުރިއިރު ޚަރަދު ކުޑަކުރުމަށް ރާވާފައިވާ ގިނަ ފިޔަވަޅުތައް ރާވާފައިވާ ގޮތަށް ތަންފީޒުވެފައި ނުވާކަމަށެވެ. އެހެންކަމުން، އެކަންކަމުން ލިބޭނެ ކަމަށް އަންދާޒާކުރާ ސޭވިންގް މިހާރު ދަށްވެފައިވާކަމަށް ވެސް އެ މިނިސްޓްރީން ބުނެއެވެ.
ސަޕްލިމެންޓްރީ ބަޖެޓުގެ މަސައްކަތް ބުދަ ދުވަހު ކުރިއަށް ގެންގޮސް، އެދިވަޑައިގަންނަވާ ކޮންމެ މެންބަރަކަށް 5 މިނެޓް އަދި ރިޕޯޓަށް 2 މިނެޓް ދެއްވުމަށްފަހުގައި، ކޮމިޓީގެ 2 ދުވަހުގެ މަސައްކަތް ހިންގުމަށްފަހުގައި ކޮމިޓީ ރިޕޯޓުގެ މަރުހަލާ ނިންމާ ބަޖެޓް ފާސްކުރުމަށް ހުށަހެޅީ ބާރަށު ދާއިރާގެ މެންބަރު މުހައްމަދު އަބްދުﷲއެވެ. މި ހުށަހެޅުމަށް ތާއިދު ކޮށްފައިވަނީ ހެންވޭރު ދެކުނު ދާއިރާގެ މެންބަރު ހުސައިން ޝަހީމެވެ.
ސަޕްލިމެންޓްރީ ބަޖެޓަށް ބަހުސްކުރުން އެއްދުވަހަށް ކުރިއަށް ގެންގޮސް އެ ބަހުސްގައި އެދިވަޑައިގަންނަވާ ކޮންމެ މެންބަރަކަށް 5 މިނެޓުގެ ފުރުސަތެއް ދީ، ބަހުސައްފަހު ބަޖެޓް ދިރާސާކުރާ ކޮމިޓީއަށް ފޮނުވާ، ކޮމިޓީގައި ދެދުވަހުގެ މަސައްކަތް ހިނގުމަށްފަހުގައި ކޮމިޓީގެ ރިޕޯޓަށް ބަހުސް ކުރަން އެދިވަޑައިގަންނަވާ ކޮންމެ މެންބަރަކަށް 2 މިނެޓުގެ ފުރުސަތެއް ދިނުމަށް ބާރަށު ދާއިރާގެ މެންބަރު އަހުމަދު އަބްދުﷲ ހުށަހަޅުއްވާ، ހެންވޭރު ދެކުނު ދާއިރާގެ މެންބަރު ހުސައިން ޝަހީމް ތާއިދުކުރެއްވި ހުށަހެޅުމާއި ގުޅޭގޮތުން ނެގުނު ވޯޓުގައި ބައިވެރިވި މެންބަރުންގެ އަގުލަބިއްޔަތުން ވަނީ އެގޮތަށް ފާސްކޮށްފައެވެ.
މި ވޯޓުގައި ބައިވެރިވެވަޑައިގެންނެވީ 38 މެންބަރުންނެވެ. އެހެންކަމުން ބުދަ ދުވަހުގެ މަޖިލީހުގެ ޖަލްސާގެ އެޖެންޑާގައި މި މަސައްކަތް ހިމަނާ ސަޕްލިމެޓްރީ ބަޖެޓުގެ ބަހުސް ފެށުމަށް ވަނީ ހިމަނާފައެވެ.
