އެފްއޭއެމަށް ލިބޭ ފައިސާ އަމިއްލަ ފަރާތްތަކަށް ޖަމާވާކަމުގެ ހެކި އެބަ ހުރި: ފުލުހުން

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)އާ ދެކޮޅަށް ދިވެހި ފުލުހުން ކުރިއަށް ގެންދަ ތަހުގީގުގައި، އެ އިދާރާ އަށް ލިބެމުން އަންނަ ފައިސާ އަމިއްލަ އެކައުންޓުތަކަށް ޖަމާވާ ކަމުގެ ހެކި ފެންނަން ހުރި ކަމަށް، ފުލުހުން ބުނެފި އެވެ.

އެފްއޭއެމްގެ މާލީ މައްސަލައާ ގުޅިގެން ފުލުހުން ވަނީ މިދިޔަ އޮކްޓޫބަރު އެ އިދާރާ އަށް ވަދެ، ބަލައި ފާސް ކުރުން ކުރިއަށް ގެންގޮސްފަ އެވެ. އެއަށްފަހު ތަހުގީގަށް ބޭނުންވާ ބައެއް ސާމާނު ފުލުހުން ވަނީ ގެންގޮސްފަ އެވެ.

އެކަމާ ގުޅިގެން މީޑިއާ ތަކަށް ފުލުހުން ބުނީ، އެ އިދާރާ އިން ކުރިއަށް ގެންދާ ތަހުގީގަކީ އެފްއޭއެމްގެ މައްޗަށް ހިންގާ ތަހުގީގެއް ނޫން ކަމަށެވެ. އަދި އެ ތަހުގީގަކީ ސީދާ އެފްއޭއެމްގެ ރައީސް ބައްސާމް އަދީލް ޖަލީލާއި، އެ އިދާރާގެ އިސްވެރިންގެ މައްޗަށް ފަރުދީ ގޮތުން ކުރެވޭ ޖިނާއީ ތަހުގީގެއް ކަމަށެވެ. މީގެ އިތުރުން އެފްއޭއެމަށް ފުލުހުން ވަދެ ބަލައި ފާސް ކުރަން ޖެހުނީ އެތަނުގައި ހުރި ލިޔެ ކިޔުންތަކާއި، ޑިޖިޓަލް ވަސީލަތްތަކުގައި އެ މައްސަލަތަކާއި ގުޅޭ ހެކި ގަރީނާ ލިބެން ހުރި ކަމަށް ޤަބޫލު ކުރެވޭ އެކަށީގެންވާ ސަބަބުތައް ހުރުމުން، ތަހުގީގު ބޭނުމަށް އެ ގަރީނާ ހޯދުމަށް ކަމަށް ވެސް ފުލުހުން ވަނީ ބުނެފަ އެވެ.

މީގެ އިތުރުން، ތަހުގީގުގައި މިހާތަނަށް ކުރެވުނު މަސައްކަތުގައި އެފްއޭއެމަށް ބޭރުގެ ބައެއް އިދާރާތަކުން ލިބޭ ފައިސާ، އަމިއްލަ އެކައުންޓުތަކަށް ޖަމާކޮށް ބޭނުންކޮށްފައިވާކަން އެނގޭ ސާފު ހެކި އެފްއޭއެމްގެ ބޭންކު ސްޓޭޓެމަންޓުން ފެންނަން ހުރި ކަމަށް ވެސް ފުލުހުން ވަނީ ބުނެފަ އެވެ. އެހެންކަމުން، އެފްއޭއެމްގެ މާލީ މުއާމަލާތްތަކަށް ތަފްސީލީ ގޮތެއްގައި ބަލަން ޖެހޭނެތީ، ޕްރޮސެކިއުޓާ ޖެނަރަލް (ޕީޖީ) އޮފީހުގެ ލަފަޔާއެކު، އެފްއޭއެމްގެ ޚާއްސަ އޯޑިޓެއް ހެދުމަށް އޮޑިޓަރ ޖެރަނަލްގެ އޮފީހުގައި އެދިފައިވާނެ ކަމަށް ވެސް ފުލުހުން ބުނެ އެވެ. އަނެއްކޮޅުން، ބޭރުގެ އިދާރާތަކުން އެފްއޭއެމަށް ލިބުނު ފައިސާ ނަހަމަ ގޮތުގައި ބޭނުންކުރި ގޮތް، ބޭންކު ސްޓޭޓްމަންޓުތަކުން ސާފުކޮށް ފެންނަން ހުރުމާއެކު، އެ މުއާމަލާތްތަކާއި ގުޅޭ ތަހުގީގުގެ ބައިގައި ވަކިން ދައުވާ ކުރުމާމެދު ޕީޖީ އޮފީހާއެކު ފުލުހުން އަންނަނީ މަޝްވަރާ ކުރަމުންނެވެ.

މި މައްސަލައާ ގުޅިގެން އެފްއޭއެމުން ވެސް ވަނީ ނޫސް ބަޔާނެއް ނެރެފަ އެވެ. އެ ބަޔާނުގައި އެފްއޭއެމުން ވަނީ އެ އިދާރާއާ ދެކޮޅަށް ކުރާ ތުހުމަތުތައް ދޮގު ކޮށްފަ އެވެ. އަދި އެ އިދާރާ އަށް އެއްވެސް ގޮތަކުން ލިބެމުން އަންނަ ފައިސާ އަކަށް، އެ އިދާރާގެ އެއްވެސް އިސްވެރިޔަކު އަދި މުވައްޒަފަކު ވެސް ޚިޔާނާތްތްތެރިވެފައި ނުވާނެ ކަމަށް ވެސް ވަނީ ބުނެފަ އެވެ.