މިއަދަކީ މަޖިލީހުގެ ޑިމޮކްރަޓިކް ތާރީޚުގައި ލަދުވެތި، ކަޅު ދުވަހެއް - ފައްޔާޒް
ނަޝީދު މަގާމުން ވަކިކުރުމުގެ ގަރާރު ހުށަހަޅާފައި ވަނީ ގަވައިދާ ޚިލާފަށް ކަމަށް އަފީފް ވަނީ ނިންމަވާފައި
އެމްޑީޕީގެ ޗެއަރޕާސަން ފައްޔާޒު އިސްމާއީލް
މިއަދަކީ މަޖިލީހުގެ ޑިމޮކްރަޓިކް ތާރީޚުގައި ލަދުވެތި، ކަޅު ދުވަހެއް ކަމަށް އެމްޑީޕީގެ ޗެއަރޕަރސަން ފައްޔާޒް އިސްމާއީލް ވިދާޅުވެއްޖެއެވެ.
ފައްޔާޒް މި ފަދައިން ވިދާޅުވީ އާދިއްތަ ދުވަހު މަޖިލީހުގެ ޖަލްސާގައި، ރިޔާސަތު ބެލެހެއްޓެވި ވިލުފުށީ ދާއިރާގެ މެންބަރު ހަސަން އަފީފް ޤަވާއިދާއި ޚިލާފަށް މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ތަޅުމުން ބޭރުކޮށްލައްވާފައި ވާތީ އެކަމަށް އިޝާރާތްކުރައްވައެވެ. ފައްޔާޒް ވިދާޅުވީ އަފީފްގެ އެ އަމަލާއެކު މަޖިލީހުގެ ކުރީގެ ރައީސް އަބްދުﷲ މަސީހުގެ ޙުދުމުހުތާރުކަން ފަނޑުވެގެން ގޮސްފައިވާ ކަމަށެވެ. އަދި އާދިއްތަ ދުވަހު އަފީފް އަމަލުކުރެއްވި ގޮތަކީ ވަރަށް ލަދުވެތި އަދި ފިނޑި ގޮތެއް ކަަމަށް ފައްޔާޒް ވިދާޅުވިއެވެ. ފައްޔާޒް ވަނީ ނޯ ކޮންފިޑެންސް ވޯޓު ކުރިއަށް ނުގެންދެވޭނެ ގޮތް ހެދުމަށް އަފީފް އާދިއްތަ ދުވަހު އަމަލުކުރެއްވި ގޮތުގެ ސަބަބުން މި ދުވަހަކީ ރާއްޖޭގެ ޕާލިމަންޓްރީ ޑިމޮކްރަސީގައި ކަޅު ދުވަހެއް ކަމަށެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެ މަގާމުން ވަކިކުރުމުގެ ގަރާރު ހުށަހަޅާފައި ވަނީ ގަވައިދާ ޚިލާފަށް ކަމަށް ނިންމައި އެ ގަރާރު އަލުން ހުށަހެޅުމަށް މަޖިލީހުގެ ރިޔާސަތުގައި އިންނެވި ހަސަން އަފީފް ވަނީ އަންގަވާފައެވެ. އަފީފް އެގޮތަށް ނިންމެވީ ދަ ޑިމޮކްރަޓްސްގެ މެންބަރުން ހުށަހެޅުއްވި ނިޒާމީ ނުކުތާ އެއް ބަލައިގަތުމަށް ފަހުގައެވެ. ޑިމޮކްރަޓްސް އަށް ނިސްބަތްވާ މެދު ހެންވޭރު ދާއިރާގެ މެންބަރު އަލީ އާޒިމް ވަނީ އެ ގަރާރުގައި ދީބާޖާ ނެތުމުން ގަރާރުގެ ސިފަ ނެތް ކަމަށް ވިދާޅުވެފައެވެ.
ނަމަވެސް އެ މައްސަލަ އަފީފަށް ބޭރު ނުކުރެއްވޭނެ ކަމަށް މަޖިލީހުގެ އަމީން އާއްމާއި ކައުންސެލް ޖެެނެރަލް ވިދާޅުވެފައިވާ ކަމަށް އެމްޑީޕީގެ މެންބަރުން ގެންދަވަނީ ވިދާޅުވަމުންނެވެ.
