އިސްރާއީލުން ފަލަސްތީނުގެ ރައްޔިތުންގެ މައްޗަށް ހިންގަމުންދާ އިންސާނިއްޔަތާ ޚިލާފު ޖަރީމާތައް ދިގުލައިގެން ގޮސް، މެދު އިރުމަތީގެ ހަމަނުޖެހުން ބޮޑުވުމުގެ ސަބަބުން، ދުނިޔޭގެ ބާޒާރުގައި ތެލުގެ އަގު މައްޗަށް ހިނގައިދާނެކަމަށް ވޯލްޑް ބޭންކުން ބުނެފިއެވެ.

އިސްރާއީލުގެ ޖަރީމާތަކުގެ ސަބަބުން ދިމާވެދާނެ އިގުތިސާދީ ނުރައްކާތަކާ ބެހޭގޮތުން ވޯލްޑް ބޭންކުން ނެރުނު އެސެސްމެންޓް ރިޕޯޓުގައި ވަނީ، ތެލުގެ އަގަށް އަތުވެދާނެ ބަދަލުގެ މައްޗަށް އިޝާރާތްކޮށްފައެވެ.

އެގޮތުން އެ ބޭންކުން ލަފާކުރާ ގޮތުގައި އެ ހަނގުރާމައިގެ ސަބަބުން ދުނިޔޭގެ ތެލުގެ ސަޕްލައި، ދުވާލަކަށް 6 މިލިއަން ފީފާއާއާ 8 މިލިއަން ފީފާއާ ދެމެދުގެ އަދަދަކަށް މަދުވާނެއެވެ.

މިހެން މިކަން ހިނގައިފިނަމަ، އެ ބޭންކުން ލަފާކުރާގޮތުގައި އެއީ ދުނިޔޭގައި މިހާތަނަށް ތެލުގެ އަގު މައްޗަށް ނުދާނެ ވަރަށް ދާނެ ހާލަތެކެވެ. އެގޮތުން މިހާރުގެ އަގާ އަޅާބަލާއިރު 75 އިންސައްތައަށް ތެލުގެ އަގު ބޮޑުވާނެކަމަށް އެ ބޭންކުން ލަފާކުރެއެވެ.

ދުނިޔޭގައި މިހާތަނަށް ތެލުގެ އަގު އެންމެ މައްޗަށް ރިކޯޑު ކުރެވިފައިވަނީ 2008 ވަނަ އަހަރުއެވެ. އެ އަހަރު ފީފާއެއް 147 ޑޮލަރަށް އެރިކަން ފާހަގަކުރަމުން ވޯލްޑް ބޭންކުން ބުނީ، މި އަހަރު އެފަދަ ހާލަތެއް ދިމާވެއްޖެނަމަ އެ ހާލަތު ވެގެންދާނީ، 1970 ވަނަ އަހަރުތަކުގެ ތެރޭގައި ދިމާވި ތެލުގެ ހާލަތާ އެއްފަދަ ހާލަތަކަށް ކަމަށެވެ.

މި ރިޕޯޓުގައި، 1970ގެ އަހަރުތަކުން ފެށިގެން ސަރަހައްދީ ހަމަނުޖެހުންތައް ހިމެނޭ ތިން ހާލަތެއްގެ މައްޗަށް ބިނާކޮށް ތިން ރިސްކް ސިނާރިއޯއެއް ފާހަގަކޮށްފައިވާއިރު، އޭގެ ވަރުގަދަކަމާއި އޭގެ ނަތީޖާތައް ގޯސްވަމުންދާކަން އެ ރިޕޯޓުގައި ވެއެވެ.

އެގޮތުން 2011 ވަނަ އަހަރު ލީބިޔާ ދާޚިލީ ހަނގުރާމައިގެ ތެރޭގައި، ދުވާލަކު ގާތްގަނޑަކަށް ފަސް ލައްކަ ފީފާއާ 2 މިލިއަން ފީފާއާ ދެމެދުގެ އަދަދަކަށް ތެލުގެ އުފެއްދުން ދަށްވުމުގެ ސަބަބުން، ތެލުގެ އަގު 93 ޑޮލަރާ 102 ޑޮލަރާ ދެމެދުގެ އަދަދަކަށް ބޮޑުވިކަން ފާހަގަކޮށްފައި ވެއެވެ. މީގެ އިތުރުން، 2003 ވަނަ އަހަރު އިރާގު ހަނގުރާމައިގެ ސަބަބުން ދުނިޔޭގެ ތެލުގެ ސަޕްލައި ދުވާލަކު 3 މިލިއަން ފީފާއާ 5 މިލިއަން ފީފާއާ ދެމެދުގެ އަދަދަކަށް މަދުވުމުގެ ސަބަބުން، ފީފާއެއްގެ އަގު 109 ޑޮލަރާ 121 ޑޮލަރާ ދެމެދުގެ އަދަދަކަށް އުފުލުނުކަން ވެސް ފާހަގަކޮށްފައި ވެއެވެ.

އެހެންކަމުން އިސްރާއީލުން ފަލަސްތީނުގެ ޣައްޒާއަށް ދެމުންދާ ހަމަލަތާއް ދިގުލައިގެން ހިނގައްޖެނަމަ، އެފަދަ ހާލަތެއް މެދުވެރިވުމުގެ ފުރުސަތު އޮތްއިރު، ތެލުގެ އަގު ބޮޑުވުމަކީ ކާބޯތަކެތީގެ އަގު ބޮޑުވާނެ ކަމެއް ކަމަށްވެސް އެ ބޭންކުން ބުނެއެވެ.