ކުޑަކުއްޖާއަށް އަނިޔާކުރި މެއިޑްގެ ބަންދުގެ މުއްދަތު ޖަހައިފި

މާލޭގެ ގެއެއްގައި ކުޑަކުއްޖަކު ބަލަން ގެނެސްފައި ހުރި މެއިޑް އެ ކުޑަކުއްޖާއަށް އަނިޔާކުރި މައްސަލައިގައި ބަންދުގެ މުއްދަތު ޖަހައިފިއެވެ.

ދިވެހި ފުލުހުންގެ ހިދުމަތުން އެދިގެން ބަންދުކުރުމަށް އަމުރު ނެރެފައިވަނީ އިންޑިއާގެ ރައްޔިތެއްކަމަށްވާ ސަންދީޕް ކައުރު (22އ) އެވެ. އޭނާ ބަންދުގައި ބެހެއްޓުމަށް އަމުރުކުރި ސަބަބެއްގެ ގޮތުގައި ބުނެފައިވަނީ ކުށްކުރިކަމަށް ތުހުމަތުކުރެވޭ ކޮންމެވެސް މިންވަރެއްގެ ހެކި ހުށަހެޅުމުންނެވެ. އޭގެ ތެރޭގައި ހުށަހަޅާ ފަރާތުން ބުނާ ބުނުމާއި، ވީޑިއޯ ކްލިޕާއި، ހުށަހަޅާ ފަރާތުގެ ބަޔާނާއި، ކުއްޖާގެ މަންމަގެ ބަޔާން އަދި ފުލުހުންގެ ބަޔާން ހިމެނެއެވެ.

ބަންދުގައި ބަހައްޓަންޖެހޭ ހާލަތުގެ ގޮތުގައި ބުނެފައިވަނީ ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 49 ވަނަ މާއްދާ އާއި ޖިނާއީ އިޖްރާއަތުގެ ގާނޫނުގެ 59 ވަނަ މާއްދާއާއި، 60 ވަނަ މާއްދާގެ (ޅ) އަށް ރިއާޔަތްކޮށް، އޭނާ ބަންދުން ދޫކޮށްލައިފިނަމަ، މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށްޓަކައި ކަމުގައި ވަނީ ބުނެފައެވެ.

އަދި ބަންދުގައި ބަހައްޓަންޖެހޭ ހާލަތެއް އޮތްކަމަށް ދެކޭ ސަބަބުގެ ގޮތުގައި ބުނެފައިވަނީ ޝަރީއަތްކުރުމާއި ބެހޭ ޖިނާއީ އިޖުރާއަތުގެ ގަވާއިދުގެ 13 ވަނަ މާއްދާގެ (ނ) ގެ 2 އަދި 3 ވަނަ ނަންބަރުގައި ހުރި ކަންކަން ފުރިހަމަވާކަމަށް ބެލެވޭތީކަމަށް ބުނެފައިވެއެވެ.

ސަންދީޕް ކައުރުގެ ބަންދުގެ މުއްދަތަށް 15 ދުވަސް ދީފައިވާ އިރު މި މުއްދަތު ހަމަވާނީ މި މަހުގެ 24 ވަނަ ދުވަހުއެވެ.