އިރުވައި މޫސުމުގައި ހިޖުރަ ކުރާ ދޫނިތައް ނުހިފަން އީޕީއޭއިން ހަނދާންކޮށްދީފި

އިރުވައި މޫސުމާ ދިމާކޮށް ރާއްޖެއަށް ހިޖުރަކުރާ ދޫނިތައް ނުހިފުމަށް އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) އިން ހަނދާންކޮށްދީފިއެވެ.

އެ އިދާރާއިން ބުރާސްފަތި ދުވަހު ނެރުނު ބަޔާނެއްގައި ބުނީ އެހެން އަހަރުތަކާ އެއްގޮތަށް މިއަހަރުގެ އިރުވައި މޫސުމާ ދިމާކޮށް ވެސް ދުނިޔޭގެ އެކި ކަންކޮޅުތަކުން ވަރަށް ގިނަ ބާވަތްތަކުގެ ދޫނި ރާއްޖެއަށް ހިޖުރަކުރަމުން އަންނަ ކަމަށެވެ. މިގޮތަށް ހިޖުރަކުރާ ދޫނިތަކަކީ ރާއްޖޭގެ "ތިމާވެށި ރައްކާތެރިކޮށް ބެލެހެއްޓުމާ ބެހޭ ގާނޫނު" ގެ ދަށުން ހެދިފައިވާ "ގުދުރަތީ ގޮތުގައި ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރާ ދިރޭ ތަކެއްޗާ ބެހޭ ގަވާއިދު" ގެ ދަށުން ހިމާޔަތް ކުރެވިފައިވާ ދިރުންތައް ކަމަށާއި އެފަދަ ދޫނިތައް ހިފައި އެތަކެތި ގެންގުޅުމަކީ މަނާ ކަމެއް ކަމަށް އީޕީއޭއިން ބުނެއެވެ.

އީޕީއޭއިން ބުނި ގޮތުގައި ރާއްޖޭގައި ފެންނަ ގިނަ ބާވަތްތަކުގެ ދޫންޏަކީ މޫސުމާ ގުޅިގެން ރާއްޖެއަށް ހިޖުރަކުރާ ބާވަތްތަކުގެ ދޫންޏެވެ. އެހެންވެ އެތަކެތި ރައްކާތެރިކުރުމަކީ ރާއްޖޭގެ ދިރުންތަކުގެ ސިންދަފާތު ނުވަތަ ގުދުރަތީ ވެށީގެ މުއްސަނދިކަން ރައްކާތެރިކުރުމަށް އެޅޭ މުހިންމު ފިޔަވަޅެއް ކަން އެ އިދާރާއިން ފާހަގަކުރެއެވެ.

އިރުވައި މޫސުމާ ގުޅިގެން ރާއްޖެއަށް ތަފާތު ބާވަތްތަކުގެ ދޫނި ހިޖުރަކުރާއިރު މި ދުވަސްވަރާ ދިމާކޮށް އެފަދަ ދޫނިތައް، ވިޔަފާރީގެ ބޭނުމަށާއި މުނިފޫހިފިލުވުމަށް ހިފާ ގެންގުޅޭކަން ފާހަގަކުރެވޭ ކަމަށް އީޕީއޭއިން ބުނެއެވެ. އެ އިދާރާއިން މިހެން ބުނެފައިވާއިރު ރާއްޖެއަށް އައި ގުޑުގުޑާ ދޫނިތަކެއް ވެސް ހިފައި އޭގެ ވިޔަފާރި ކުރުމާއި ގެންގުޅުން ފަދަ ކަންކަން މީގެ ކުރިން ވަނީ ފެންމަތިވެފައެވެ. މިފަދަ އަމަލުތަކުން ދުރުވެ، ހެދިފައިވާ ގާނޫނާއި ގަވާއިދުތަކަށް އެންމެންވެސް އަމަލުކުރުމަށް އީޕީއޭއިން ބާރު އަޅައެވެ.

ގަވާއިދާ ޚިލާފަށް ދޫނިތައް ހިފައި، ގެންގުޅޭ ފަރާތެއް އެނގޭނަމަ އީޕީއޭ (7980379 ނުވަތަ secretriate@epa.gov.mv) އާ އެ މައުލޫމާތު ހިއްސާ ކުރުމަށް އެ އެޖެންސީއިން އެދެއެވެ.

ހިޖުރަ ކުރާ ދޫނިތަކުގެ އިތުރުން ބަލިވެފައިވާ ނުވަތަ އަނިޔާވެފައިވާ އަތްމަތީ ދޫންޏެއް ފެނިއްޖެނަމަ އަމަލު ކުރަންވީ ގޮތް ވެސް އީޕީއޭއިން ވަނީ ހިއްސާކޮށްފައެވެ. އެގޮތުން ދޫނީގެ ހާލަތު ބެލުމަށް ކައިރިއަށްގޮސް އުދުހޭތޯ ޔަގީން ކުރުމަށާއި އެ ދޫނި ބަލިކަން ފާހަގަކުރެވޭނަމަ ދޫނީގެ ފޮޓޯއާއި ފެނުނު ތަނުގެ މައުލޫމާތު އީޕީއޭގެ ހޮޓްލައިން 7980379 އާ ހިއްސާ ކުރުމަށް ވަނީ އެދިފައެވެ.

ގުދުރަތީ މާހައުލުގައި ދިރިއުޅޭ ދޫނިތަކަށް ކާންނުދިނުމަށް އީޕީއޭއިން ވަނީ އިލްތިމާސްކޮށްފައެވެ. އެފަދަ ދޫނިތަކަށް ކާންދިނުމަކީ އެތަކެތީގެ ގުދުރަތީ ސިފަތަކަށް ނުވަތަ އިންސްޓިކްޓަށް ބަދަލު އައިސް އިންސާނުންގެ ފަރާތުން ޖެހޭ ބަލިތަކަށް ހުށަހެޅިގެންދާ ކަމެއް ކަން އެ އިދާރާއިން ފާހަގަކުރެއެވެ.

މީގެ އިތުރުން އެފަދަ ދޫނިތައް ހިފައި އޮޅުކޮށްގެން ގެންގުޅުމަކީ އެ ދޫނިތަކުގެ އާބާދީއަށް އޭގެން ނޭދެވޭ އަސަރު ފޯރާނެ ކަމެއް ކަން ވެސް އީޕީއޭއިން ފާހަގަކުރެއެެވެ.