ބިދޭސީ މަސައްކަތްތެރިންގެ ހައްގުތައް ކަށަވަރުކުރުމާއި ގުޅޭ ހާއްސަ ވެބިނަރއެއް ބޭއްވުމަށް ހަމަޖެހިއްޖެ އެވެ.
ޑިރެކްޓް ޑިމޮކްރެސީ ގްލޯބަލް މޯލްޑިވްސް (ޑީޑީޖީއެމް) ގެ ފަރާތުން ބާއްވާ މި ވެބިނަރ ބޭއްވުމަށް ހަމަޖެހިފައިވަނީ އާދީއްތަ ދުވަހު އެވެ. ފޭސްބުކުން ލައިވް ކުރުމަށ ހަމަޖެހިފައިވާ ވެބިނަރގައި ރާއްޖެ އަށް ދިމާވެފައިވާ ހިއުމަން ޓްރެފިކިންގގެ މައްސަލަތަކާއި، ލިޔެކިޔުމެއްނެތި އުޅޭ ބިދޭސީންގެ މައްސަލައިގައި ސިޔާސަތުތަކަށް ގެންނަން ޖެހޭ ބަދަލުތަކާއި ގުޅޭގޮތުން މި ވެބިނަރގެ ޕެނަލިސްޓުން ބަހުސްކުރުމަށް ވަނީ ހަމަޖެހިފަ އެވެ.
ވެބިނަރގައި ޕެނަލިސްޓުންގެ ގޮތުގައި ބައިވެރިވެވަޑައިގަންނަވަނީ އަލީ ހުސެއިން ދީދީ، އާއި އެމްއެންޔޫގެ ފެކަލްޓީ އޮފް އަރޓްސްގެ ޑީން، އާސިމް އަބްދުލް ސައްތާރުގެ އިތުރުން ކުރީގެ ހެލްތު މިނިސްޓަރ ޑރ. މަރިޔަމް ޝަކީލާ ގެ އިތުރުން، މައްޗަންގޮޅި ދެކުުނު ދާއިރާގެ މެންބަރު އަހުމަދު ހައިތަމް އެވެ.
މި ވެބިނަރ މޮޑަރޭޓް ކުރައްވާނީ ޕޮލިޓިކަލް ސައިންސްގެ ދާއިރާއިން މަތީ ތައުލީމު ހާސިލުކުރައްވާފައިވާ ޑރ. ރަޝީދާ މުހައްމަދު ދީދީ އެވެ. އަދި ސައިން ލެންގުއޭޖް އިންޓަރޕްރެޓަރގެ ގޮތުގައި ހަރަކާތްތެރިވާނީ މަރިޔަމް ފަޒްނީ އެވެ.
ޑައިރެކްޓް ޑިމޮކްރެސީ ގްލޯބަލް އަކީ ޖެނީވާގައި މަރުކަޒުވެގެން ހިންގާ ތިންކް ޓޭންކެކެވެ. މި ޕްލެޓްފޯމުން ގާނޫނާއި ގަވާއިދުތަކާއި ގުޅިގެން ޕޮލިސީ ލެވަލް ޑިސްކަޝަންތަކަށް ހާއްސަކޮށްގެން، ސިޔާސަތު ކަނޑައަޅާ ފަރާތްތަކުގެ މެދުގައި މަޝްވަރާ ކުރުމުގެ ފުރުސަތު ލިބިގެންދެ އެވެ.
އެ ޖަމިއްޔާއިން ވަނީ މުޖުތަމައުގެ ތެރޭގައި ހުރި ބޮޑެތި މައްސަލަތަކަށް ހާއްސަ ސަމާލުކަމެއް ދީގެން "ސޯޝަލް ޓިއުންސް" ގެ ނަމުގައި ސިލްސިލާ ވެބިނަރތަކެއް ކުރިއަށް ގެންދިއުމަށް ނިންމާފަ އެވެ. މި ވެބިނަރތަކުގައި މަޝްވަރާކުރެވޭ ކަންކަމުގެ މައްޗަށް ތައްޔާރުކުރާ ރިޕޯޓެއް އާންމުކުރުމަށް ވެސް ވަނީ ނިންމާފަ އެވެ.
