ހުކުމް ކުރުމުން ވެސް ނަޝީދު އުޅެނީ މަގާމުގައި ބައްދައިގެން އޮންނަން- ރޮޒައިނާ
ރޮޒައިނާ ކުރެއްވި ޓުވީޓެއްގައި ވިދާޅުވީ 7 ދުވަސް ވަންދެން އެ މައްސަލަ ކުރިއަށް ގެންދިޔަ ނުދީ ހިފަހައްޓަން މަޖިލިސް ވަޓްސްއެޕް ގްރޫޕުގައި ނަޝީދު އިރުޝާދު ދެއްވި ކަމަށް
ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒައިނާ އާދަމް
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު މަގާމުން ވަކި ކުރުމުގެ މައްސަލަ ކުރިއަށް ގެންދެވޭނެ ކަމަށް ސުޕްރީމް ކޯޓުން ހުކުމްކުރުމުން ވެސް އެމަނިކުފާނު އުޅުއްވަނީ މަގާމުގައި ‘ބައްދައިގެން އޮންނަވަން’ ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.
ސުޕްރީމް ކޯޓުން ބުރާސްފަތި ދުވަހު ނިންމާފައިވަނީ ނަޝީދު ވަކި ކުރުމުގެ މައްސަލަ މަޖިލީހުގެ ނާއިބު ރައީސް ނެތަސް ކުރިއަށް ގެންދެވޭނެ ކަމަށެވެ. ރޮޒައިނާ ކުރެއްވި ޓްވީޓެއްގައި ވަނީ 7 ދުވަސް ވަންދެން އެ މައްސަލަ ކުރިއަށް ގެންދިޔަ ނުދީ ހިފަހައްޓަން މަޖިލިސް ވަޓްސްއެޕް ގްރޫޕުގައި ނަޝީދު އިރުޝާދު ދެއްވި ކަމަށެވެ. ރޮޒައިނާ ވަނީ ނަޝީދު ދައްކަވާފައިވާ ވާހަކަތަކުގެ ސްކްރީންޝޮޓެއް ވެސް ހިއްސާކުރައްވާފައެވެ.
ރޮޒައިނާ އިތުރަށް ވިދާޅުވީ ނަޝީދު ވަނީ އެ ގްރޫޕުގައި ފަނޑިޔާރުންނަކީ ލިޔަން ކިޔަން ނޭނގޭ ބައެއް ކަމަށް ވިދާޅުވެ މަލާމާތް ކުރައްވާފައި ކަމަށެވެ.
ނަޝީދުގެ އިތުބާރު ނެތް ކަމުގެ މައްސަލަ ކުރިއަށް ނުގެންދެވި ވާތީ އެ ކަމަށް ހައްލެއް ހޯދުމަށް އެމްޑީޕީން ސުޕްރީމް ކޯޓަށް ހުށަހެޅި މައްސަލަ އެ ޕާޓީ އަށް ވަނީ ކާމިޔާބުވެފައެވެ.
ސުޕްރީމް ކޯޓުން ހުކުމްކޮށްފައި ވަނީ މަޖިލީހުގެ ރައީސް ވަކިކުރުމުގެ ގަރާރު ހުށަހަޅަން ހަމަޖެހިފައިވާ ނުވަތަ ހުށަހެޅިފައިވާ ޖަލްސާގެ ރިޔާސަތު ބަލަހައްޓަން މަޖިލީހުގެ ނާއިބު ރައީސް ނެތް ހާލަތެއްގައި ރިޔާސަތު ބަލަހައްޓާނެ މެންބަރުންގެ ގޮތުގައި ކަނޑައަޅާފައިވާ މެންބަރުންގެ ތަރުތީބުން މަޖިލީހުގެ ރައީސްގެ ގަރާރުގެ މައްސަލަ ހުށަހެޅިފައިވާ ޖަލްސާ ކުރިއަށް ގެންދެވޭނެ ކަމަށެވެ.
