ޓެރަރިމް މަނާކުރުމުގެ ގާނޫނުގެ ދަށުން، މުހައްމަދު އަމީންގެ މައްޗަށް ދިވެހިރާއްޖޭގެ ކްރިމިނަލް ކޯޓުންކޮށްފައިވާ ހުކުމް ދިވެހިރާއްޖޭގެ ހައިކޯޓުގައި އިސްތިއުނާފުކުރަން ނިންމައިފިއެވެ.
އަމީންގެ އާއިލާއާއި ގާނޫނީ ވަކީލުންގެ ޓީމުން ނެރުނު ބަޔާނެއްގައި ބުނެފައިވަނީ، 23 އޮކްޓޯބަރ 2019ގައި މުހައްމަދު އަމީން ހައްޔަރުކުރެވި، ދިގު މުއްދަތަކަށް ބަންދުގައި ބަހައްޓައިގެން 4 އަހަރަށް ދިގުދަންމައިގެން ކުރިއަށްގެންދިޔަ ޝަރީއަތަކަށްފަހު، ނޮވެމްބަރު 8 2023ގައި އޭނާގެ މައްޗަށް މައްޗަށް ކޮށްފައިވާ ދައުވާތައް ސާބިތުވާކަމަށް ނިންމައި 27 އަހަރު ޖަލުގައި ބަންދުކުރުމަށް ކުރި ހުކުމަކީ، ހުށަހެޅިފައިވާ ހެކިތަކާއި ގަރީނާތަކަށް ބަލައި، އެންމެ އިންސާފުވެރި ގޮތަކަށް ކުރެވިފައިވާ ހުކުމެއްކަމަށް އާއިލާއަށް ނުފެންނަ ކަމަށެވެ.
އެ ބަޔާނުގައި ބުނެފައިވަނީ، މުޅި މައްސަލަ ބިނާކޮށްފައިވަނީ ހ. މޫންލައިޓް ވެލީ އަލީ ޝަފީއުއާ ގުޅުވައިގެން ކަމަށެވެ. އަލީ ޝަފީއުގެ އާއިލާއިން ހާމަކޮށްފައިވާގޮތުން، އޭނާއަށް ބިރުދައްކައި، އަނިޔާކޮށްގެން ބަޔާން ނަގާފައިވާކަމަށާއި، މި މައްސަލަ އެޗްއާރްސީއެމްގައި ފައިލްކޮށް، އަދި އަލީ ޝަފީއުގެ އޯޑިއޯ ބަޔާނެއްވެސް އެޗްއާރްސީއެމްގައި ވާކަމަށް އެ ބަޔާނުގައި ބުނެފައިވެއެވެ. އަދި އޭނާ ވީހާވެސް އަވަހަކަށް ރާއްޖެ ގެނައުމަށް މަސައްކަތް ކުރަމުންދާކަމަށް ވަނީ ބުނެފައެވެ. ވީމާ ސަރުކާރުން މިކަމުގައި ހައްލެއް ނުގެނެސްދީ، އަލީ ޝަފީއު މީޑިއާތަކަށް ހިއްސާކޮށްފައިވާ ބަސްތީގަތުންތައް އަމީންގެ ފަރާތުން ކޯޓަށް ހުށަހެޅިނަމަވެސް، ކްރިމިނަލް ކޯޓުން މައްސަލަ ނިންމީ އެ ކަންކަމަށް ރިއާޔަތްނުކޮށް ކަމަށެވެ. އެއީ އާއިލާއިން ކަންބޮޑުވާ ކަމެއް ކަމަށް ވަނީ ބުނެފައެވެ.
އާއިލާއަށް އެ މައްސަލައާމެދު ފާހަގަކުރެވޭ ބޭއިންސާފު ކަންކަން ހުރިކަމަށް ވަނީ ބުނެފައެވެ. އެގޮތުން ހައްޔަރުކުރުމަށްފަހު، ދައުލަތުގެ އެދުމާއެކު ދިގު މުއްދަތެއް ތަހުގީގުގައި ހޭދަކުރިކަމަށް ވަނީ ބުނެފައެވެ. އެ މުއްދަތުގައި އަމީން ހުރީ ބަންދުގައި ކަމަށާއި، ޝަރީއަތުގެ މަރުހަލާގައިވެސް ދައުލަތުން މައްސަލަ ދިގުދަންމަން މަަސައްކަތްކުރި ކަމަށް ތުހުމަތުކޮށްފައި ވެއެވެ. އަދި ކްރިމިނަލް ކޯޓުން އެކުލަވާލި ތާވަލާ އެއްގޮތަށް ޝަރީއަތްވެސް ގެންދެވިފައި ނުވާކަމަށް އާއިލާގެ ފަރާތުން ފާހަގަކޮށްފައިވެއެވެ.
ގިނަ ފަހަރު އެ މައްސަލަ ތާވަލްކޮށްފައި ހުރީ ސިޔާސީގޮތުން ރާއްޖޭގެ މަސްރަހު ހަލަބޮލިވުމުން، އެކަން އަނބުރާލުމަށް ކަމަށް އާއިލާއިން ތުހުމަތުކުރެެއެވެ. މީގެ އިތުރުން، މައްސަލައިގެ ހެކި ހުށަހެޅުމުގެ މަރުހަލާ ނިމި، ހުލާސާ ބަޔާން އިއްވާ މަރުހަލާއަށް ދިއުމަށްފަހުވެސް، ދައުލަތުގެ ފަރާތުން ނުފޫޒު ފޯރުވައި، އިތުރު ހެކިން ގެނެސްފައިވާކަމަށް އާއިލާއިން ބުނެއެވެ. އަދި ހެތްކާބެހޭ އާ ގާނޫނު ތަންފީޒުކުރެވެންދެން މައްސަލަ ދިގުދަންމައި، އެއަށް އަމަލުކުރަން ފެށުމުން އެކަމުގެ ނާޖާއިޒް ފައިދާ ދައުލަތަށް ލިބުނުކަމަށް ވަނީ ބުނެފައެވެ.
ހެތްކާބެހޭގޮތުން ދެކެވުުނު ވާހަކާގައި ދިފާއުން ބަޔާންކުރި އެއްވެސް ކަމަކަށް ރިއާޔަތް ނުކުރެވި، އޭގެ ގާނޫނީ ސަބަބު ހާމަނުކުރެވޭ ކަމަށާއި، ދިފާއުން ހުށަހެޅި ކިތާބީ ހެކި ވަޒަން ނުކުރެވުނު ސަބަބުވެސް ނުނިންމޭކަން ފާހަގަކުރައްވާފައި ވެއެވެ. އަދި ހެތްކާބެހޭގޮތުން ދިފާއުގައި އެތައް ގަޑިއިރެއް ވަންދެން އެތައްކަމެއް ފާހަގަކޮށް ވާހަކަދައްކާފައި ވާއިރު، ހުކުމް އިއްވުމުގައި ހަމައެކަނި އަމީންގެ ފަރާތުން އިންކާރުކުރިކަން ފިޔަވައި އެހެން ކަމެއް ފާހަގަކޮށްފައި ނުވާކަމަށް އެ ބަޔާނުގައި ވެއެވެ.
އެ ބަޔާނުގައި އިތުރަށް ބުނެފައިވަނީ، ދައުލަތުން ބޭނުންވާ ގޮތަށް މައްސަލަ ކުރިއަށްގެންދަން ބާރު ފޯރުވިކަމަށެވެ. މައްސަލަ ބައްލަވަމުން ގެންދެވި ގާޒީގެ ސުލޫކީ މައްސަލަތައް ނަގައި ބިރު ދެއްކުމުގެ އަމަލުތައްވެސް ދައުލަތުގެ ފަރާތުން ހިންގާފައިވާކަމަށާއި، މައްސަލަ ނިމުމާއި ގާތްވެފައި ވަނިކޮށް މައްސަލާގައި ހައްސާސް ނިންމުންތަކެއް ބޭއިންސާފުން ނިންމުމަށްފަހު، މައްސަލަ ބައްލަވަމުން ގެންދެވި ގާޒީ މައްސަލައިން ތަނާޒަލުވެވަޑައިގަތް ކަމަށް ބުނެފައިވެއެވެ. އޭގެ ފަހުން އައްޔަންކުރި ގާޒީ، ދައުލަތުގެ ނުފޫޒާއެކު ރިޓަޔަރކުރައްވާފައި ވާކަމަށް ބުނެފައިވެއެވެ.
2023ގެ ޖެނުއަރީގައި ޚުލާސާ ބަޔާން އިއްވަން ހަމަޖެހުނުނަމަވެސް އެ ކަން އިންތިހާއަށް ލަސްކުރި ކަމަށާއި، ވަރަށް ބޮޑަށް ތަފާތުކުރުން ގެންގުޅުނު ކަމަށް އޭނާގެ ފަރާތުން ވަނީ ބުނެފައެވެ.
