އިންތިގާލީ އޮފީހަކީ ސަރުކާރު ހިންގާ ތަނެއް ނޫން: ސައީދު
މިއަދު އިންޖީނުގެތަށް ބަލަހައްޓަމުންދާ ނިޒާމާއި ގާއިމުކުރާ ނިޒާމަށް ބޮޑެތި ބަދަލުތަކެއް އައިސްފަވޭ
ފެނަކަ ސައީދު
އިންތިގާލީ އޮފީހަކީ ސަރުކާރު ހިންގާ ތަނެއް ނޫންކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރު އަހުމަދު ސައީދު މުހައްމަދު ވިދާޅުވެއްޖެއެވެ.
މިދިޔަ ބުރާސްފަތި ދުވަހު އިންތިގާލީ އޮފީހުން ބޭއްވި ނޫސްވެރިންގެ ބައްދަލުވުމެއްގައި ފެނަކައިިން އެ އޮފީހާ ހިއްސާކުރި މާލީ ހިސާބުތަކަށް ރިއާޔަތްކޮށް އިންތިގާލީ އޮފީހުން ބުނެފައިވަނީ، ފެނަކައިގެ ދަރަނި އިތުރުވެ، ގިނަ އަދަދެއްގެ މުވައްޒަފުން އެ ކުންފުންޏަށް ނަގާފައިވާކަމަށެވެ.
ނަމަވެސް ބުދަ ދުވަހު ފެނަކައިން ބޭއްވި ނޫސްވެރިންގެ ބައްދަލުވުމުގައި ފެނަކަ ކޯޕަރޭޝަންގެ މެނޭޖިން ޑިރެކްޓަރު އަހުމަދު ސައީދު މުހައްމަދު ވަނީ އެ ތުހުމަތުތައް ދޮގުކުރައްވާ އެކަމަށް ރައްދު ދެއްވާފައެވެ.
އެގޮތުން، ސައީދު ވިދާޅުވީ އިންތިޚާބީ ރައީސް ގެ އޮފީހަކީ ސަރުކާރު ހިންގާ އޮފީހެއް ނޫންކަމަށާއި، އެއީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް އަލަށް އިންތިޚާބުވެ ވަޑައިގެންނެވި ރައީސުލްޖުމްހޫރިއްޔާއަށް އިދާރާތަކާއި ބެހޭ ސައްހަ މައުލޫމާތު ފޯރު ކޮށް ދިނު މަށްޓަކައި، ގާއިމްކޮށް އަދި މަސައްކަތްކުރާ އޮފީހެއްކަމަށެވެ.
ސައީދު އިތުރަށް ވިދާޅުވީ، ފެނަކައިން ކުރިއަށް ގެންދާ ފެނާ ނަރުދަމާގެ ގިނަ މަޝްރުއުތަކެއް ނިމިފައިވަނީ މިދިޔަ އަހަރުގެ މެދު ތެރެއިން އަދި މި އަހަރުގެ ކުރީކޮޅުކަމަށެވެ. އެހެންކަމުން، ނިމުނު މަޝްރޫއުތަކުގައި ހިދުމަތްތައް ކުރިއަށް ގެންދިއުމަށް އައު މުވައްޒަފުން ނަގަންޖެހުނުކަމަށް ސައީދު ވިދާޅުވިއެވެ.
މީގެއިތުރުން ސައީދު ވިދާޅުވީ، މިއަދު އިންޖީނުގެތައް ބަލަހައްޓަމުންދާ ނިޒާމާއި ގާއިމުކުރާ ނިޒާމަށް ބޮޑެތި ބަދަލުތަކެއް އައިސްފައިވާކަމަށެވެ. އެހެންކަމުން އިންޖީނުގެތައް އޮޕަރޭޓްކުރުމަށް އެތަށް މުވައްޒަފުންނެއް ނަގަންޖެހޭކަމަށްވެސް ސައީދު ފާހަގަކުރެއްވިއެވެ.
ފެނަކައިން ހިދުމަތް ހޯދުމަށް ފަހު އަމިއްލަ ކުންފުނިތަކަށް ފައިސާ ނުދޭކަމަށް ބުނެ އިންތިގާލީ އޮފީހުން ދެއްކި ވާހަކަތަކަށްވެސް ސައީދު ވަނީ ރައްދުދެއްވާފައެވެ. އެގޮތުން އޭނާ ވިދާޅުވީ، އެ ވާހަކަތަކަކީ އެއްވެސް އަސްލެއް ނެތް ވާހަކަތަކެއްކަމަށާއި، އެ ކުންފުނީގެ ހިސާބުތަކުންވެސް އެކަން ވަރަށް ސާފުކޮށް އެނގެން އޮންނާނެކަމަށެވެ. ނަމަވެސް ބައެއް ފަހަރު އެ ކުންފުނިތަކަން ހިތްހަމަޖެހޭ ވަރަށް ނުލިބި ހުރުމަކީ އެކަށީގެންވާ ކަމެއްކަމަށް ސައީދު ފާހަގަކުރެއްވިއެވެ.
