ބަލައި ފާސްކުރުމުގައި ހިފަހައްޓާ ތަކެތި 48 ގަޑިއިރުގެ ތެރޭގައި ވެރިފަރާތާއި ޙަވާލުކުރަން ޖެހޭނެކަމަށް އޮންނަ ޤަވާއިދަށް ބަަދަލުތަކެއް
ވަގުތު އިތުރުކޮށްދިނުމަށް އެދި ހުށަހަޅާ ހުށަހެޅުމާއެކު ބަލައި ފާސްކުރި ތަނުގެ ފޮޓޯ ރިޕޯޓެއް ހުށަހަޅަންޖެހޭ
އިންވެންޓްރީ ހަވާލުކުރުމުގެ ވަގުތު އިތުރުކޮށްދިނުމަށް އެދި ތަޙުޤީޤީ އިދާރާއަކުން ސަބަބު ބަޔާންކޮށް ޕީޖީގައި އެދެވިދާނެ
ފުލުހުންނާއި ޤާނޫނު ތަންފީޛުކުރާ އިދާރާތަކުން ބަލައި ފާސްކުރުމުގައި ހިފަހައްޓާ ތަކެތި 48 ގަޑިއިރުގެ ތެރޭގައި ވެރިފަރާތާއި ޙަވާލުކުރަން ޖެހޭނެކަމަށް ބަޔާންކުރާ ޤަވާއިދަށް ބަަދަލުތަކެއް ގެނެސްފިއެވެ.
ޕްރޮސެކިއުޓް ކުރުމާބެހޭ ޖިނާއީ އިޖުރާއަތުގެ ޤަވާއިދަށް 1 ވަނަ އިސްލާޙު ގެނައުމުގެ ޤަވާއިދުގައެވެ.
އެ ޤަވާއިދުގައިވާ އިންވެންޓްރީ ބެލެހެއްޓުމުގެ މާއްދާއަށް ބަދަލު ގެނެސްފައިވާއިރު، އެ މާއްދާގެ (ބ) ގައި ކުރިން އޮންނަނީ ހިފެހެއްޓޭ މުދަލުގެ އިންވެންޓްރީ އެކުލަވައިލުމަށްފަހު އެ އިންވެންޓްރީގެ ކޮޕީއެއް ބަލައި ފާސްކުރެވުނުތާ 48 ގަޑިއިރުގެ ތެރޭގައި އެ މުދަލުގެ ވެރިފަރާތަށް ނުވަތަ ވެރިފަރާތް ނެތް ހާލަތެއްގައި ވެރިފަރާތުގެ މަޞްލަޙަތު ޙިމާޔަތް ކޮށްދެވޭނެ ފަރާތަކަށް ދޭންވާނެ ކަމަށެވެ.
އެހެންނަމަވެސް އެ މާއްދާއަށް މިހާރު ވަނީ އިސްލާޙު ގެނެސްފައެވެ.
އިސްލާޙުގައިވާ ގޮތުން އެ މާއްދާގައި އެހެން ބަޔާންކޮށްފައި އޮތްނަމަވެސް، އެކަށީގެންވާ ސަބަބުތަކެއްގެ މައްޗަށް ބިނާކޮށް 48 ގަޑިއިރުގެ ތެރޭގައި އިންވެންޓްރީ ހަވާލު ކުރެވިދާނެކަމަށް ނުފެންނަނަމަ، އިންވެންޓްރީ ހަވާލުކުރުމުގެ ވަގުތު އިތުރުކޮށްދިނުމަށް އެދި ތަޙުޤީޤީ އިދާރާއަކުން ސަބަބު ބަޔާންކޮށް ޕްރޮސިކިއުޓަރ ޖެނެރަލް ގެ އޮފީހުގައި އެދެވިދާނެއެވެ.
އަދި ވަގުތު އިތުރުކޮށްދިނުމަށް އެދި ހުށަހަޅާ ހުށަހެޅުމާއެކު ބަލައި ފާސްކުރި ތަނުގެ ފޮޓޯ ރިޕޯޓެއް ހުށަހަޅަންވާނެކަމަށްވެސް ބަޔާންކޮށްފައިވެއެވެ.
އިސްލާޙުގައި ބުނެފައިވާ ގޮތުގައި މިގޮތަށް ހުށަހަޅާ ހުށަހެޅުމާއި އެ ހުށަހެޅުން ބިނާކުރި ސަބަބުތަކުގެ މައްޗަށް ބަލައި އިންވެންޓްރީ ތައްޔާރުކޮށް ހަވާލުކުރުމުގެ ވަގުތު ގިނަވެގެން 7 ދުވަހުގެ މުއްދަތަށް އިތުރުކޮށްދެވިދާނެއެވެ.
ޤާނޫނު ތަންފީޛުކުރާ އިދާރާތަކުން ބަލައި ފާސްކުރުމުގައި ހިފެހެއްޓޭ އެއްޗެހީގެ އިންވެންޓްރީއެއް އެކުލަވައިލަން އެ ޤަވާއިދުން ލާޒިމުކުރެއެވެ.
އަދި އެކަން ކުރަންވާނީ ބަލައި ފާސްކުރުމުގެ ކޯޓު އަމުރެއް ތަންފީޒުކުރާ އޮފިސަރުގެ އިތުރުން، ޤާނޫނު ތަންފީޒުކުރާ އިދާރާގެ އެހެން އޮފިސަރަކާއި، ތަކެތީގެ ވެރިފަރާތް ނުވަތަ ވެރިފަރާތް ނެތް ހާލަތެއްގައި ވެރިފަރާތުގެ މަޞްލަޙަތު ޙިމާޔަތް ކޮށްދެވޭނެ ފަރާތެއްގެ ހާޒިރުގައި ކަމަށްވެސް ބަޔާންކޮށްފައިވެއެވެ.
