ޕެޕޭ ލަނޑު ޖެހީ މަންމަގެ އުފަން ދުވަހު، މަންމަ އަށް ޚާއްސަ ކުރަން!

ޔުއެފާ ޗެމްޕިއަންސް ލީގުގައި ޕޯޓޯ އިން ރޯޔަލް އެންޓްވާޕާާ ދެކޮޅަށް ކުޅުނު މެޗުގައި ލަނޑު ޖެހީ، މަންމަގެ އުފަން ދުވަހު މަންމަ އަށް ޚާއްސަ ކުރުމުގެ ގޮތުން ކަމަށް ޕޯޗުގަލްގެ ޑިފެންޑަރު ޕެޕޭ ބުނެފި އެވެ.

ރޯޔަލް އެންޓްވާޕާ ދެކޮޅަށް އުމުރުން 40 އަހަރުގެ ޕެޕޭ ޖެހި ލަނޑާއެކު، އޭނާ އަށް ވަނީ ޗެމްޕިއަންސް ލީގުގެ ޚާއްސަ ރެކޯޑެއް ވެސް ލިބިފަ އެވެ. އެއީ ޗެމްޕިއަންސް ލީގުގައި މިހާތަނަށް ލަނޑު ޖެހީ އެންމެ ދޮށީ ކުޅުންތެރިޔާ އެވެ. އެ މެޗަށްފަހު ވާހަކަ ދައްކަމުން ޕެޕޭ ބުނީ އެ ދުވަހަކީ ވަރަށް ޚާއްސަ ދުވަހެއް ކަމަށާއި، އެއީ އޭނާގެ މަންމަގެ އުފަން ދުވަސް ކަމަށެވެ. އެހެންކަމުން، އެ މެޗުގައި ލަނޑެއް ޖަހާނެ ވާހަކަ މަންމަ ގާތު ބުނެފައިވާނެ ކަމަށާއި، އެ ލަނޑު ޚާއްސަ ކުރަނީ މަންމަ އަށް ކަމަށް ވެސް އޭނާ ބުންޏެވެ.

އިތުރަށް ޕެޕޭ ބުނީ އުމުރުން 40 އަހަރުގައި ވެސް ޗެމްޕިއަންސް ލީގުގައި ކުޅުމަކީ ވަރަށް ތަފާތު ކަމެއް ކަމަށެވެ. އެކަމަށްޓަކައި އެތައް މަސައްކަތްތަކެއްކޮށް، އެތައް ޤަުރުބާނީއެއް ވާން ޖެހޭކަން ޕެޕޭ ވަނީ ފާހަގަކޮށްފަ އެވެ. ޕެޕޭ ބުނި ގޮތުގައި އެކަން އޭނާ ކުރަނީ ފުޓުބޯޅަ އަށް އޮންނަ ލޯތްބެއްގެ ސަބަބުންނެވެ. ޕެޕޭ ފާހަގަ ކުރި ގޮތުގައި ފުޓުބޯޅަ ކުޅުމަކީ އަބަދު ވެސް އޭނާ އެންމެ ކުރަން ބޭނުންވި ކަންތަކެވެ. އުމުރުން މިހާ ހިސާބަށް އައިއިރު، ފުޓުބޯޅަ ކުޅުން ހުއްޓާލަން ޖެހޭ ދުވަސް ކައިރީގައި އޮތްކަން ފާހަގަކޮށް ޕެޕޭ ބުނީ، ލިބޭ ކޮންމެ ވަގުތުގެއްގައި މަސައްކަތް ކުރާނީ ޕޯޓޯ އަށް ކާމިޔާބު ހޯދައިދިނުމަށް ކަމަށެވެ.

ބެސިކްޓާސް ދޫކޮށް ޕެޕޭ ޕޯޓޯ އަށް ބަދަލުވީ 2019 ވަނަ އަހަރު އެވެ. އޭރު އޭނާ ޕޯޓޯ އަށް ބަދަލުވީ ދެ އަހަރާ ބައިގެ މުއްދަތަކަށެވެ. އޭގެ ފަހުން ޑެނީލޯ ޕެރެއިރާ ޕޯޓޯ ދޫކޮށް، ޕެރިސް ސެއިންޓް ޖާމަން (ޕީއެސްޖީ) އަށް ބަދަލުވުމާއެކު، 2020 ވަނަ އަހަރު ޕެޕޭ އަށް ވަނީ ޕޯޓޯގެ ކެޕްޓަން ބޭންޑު ހަވާލުކޮށްފަ އެވެ. އޭގެ ފަހުން ޕެޕޭ ވަނީ ޕޯޓޯގެ އެއްބަސްވުން އިތުރު އެއް އަހަރަށް އައުކޮށްފަ އެވެ. އެ އެއްބަސްވުމުގެ މުއްދަތު ހަމަވާން އޮތީ މިއަހަރުގެ ޖޫން މަހުގެ ނިޔަލަށެވެ. ނަމަވެސް، ޕެޕޭ ވަނީ ޕޯޓޯގެ އެއްބަސްވުން އިތުރު އެއް އަހަރަށް އައު ކޮށްފަ އެވެ. އެހެންކަމުން މިހާރުގެ އެއްބަސްވުން ހަމަވާނީ 2024 ވަނަ އަހަރުގެ ޖޫން މަހުގެ ނިޔަަލަށެވެ.