ޕޯޓޯ މޮޅުވި މެޗު ޚާއްސަވީ އުމުރުން 40 އަހަރުގެ ޕެޕޭ އަށް

ޔުއެފާ ޗެމްޕިއަންސް ލީގުގައި ރޯޔަލް އެންޓްވާޕާ ދެކޮޅަށް ކުޅުނު މެޗުން މޮޅުވެ، ޕޯޓޯ އިން ގްރޫޕް އެޗުގެ ދެ ވަނަ އަށް ޖެހިލައިފި އެވެ.

އަންގާރަ ދުވަހުގެ ރޭ ޕޯޓޯގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި ޕޯޓޯ އިން ލަނޑު ޖަހައި ލީޑު ނެގިއިރު، އަނެއް ލަނޑު ޖެހީ މެޗުގެ އިތުރު ވަގުތުގަ އެވެ.

މެޗުގެ 32 ވަނަ މިނެޓުގައި ޕޯޓޯ އަށް ލީޑު ނަގައިދިނީ ފޯވާޑް އެވަނިލްސަން އެވެ. އެއީ ރޯޔަލް އެންޓްވާޕުގެ އޭރިޔާ ތެރެއިން ޕޯޓޯގެ ކުޅުންތެރިޔަކަށް ކުރި ފައުލަކަށް ރެފްރީ ދިން ޕެނަލްޓީ އެކެވެ. މެޗުން ޕޯޓޯ އަށް ފުރިހަމަ މޮޅެއް ހޯދައިދިނީ ޕޯޗުގަލްގެ ޑިފެންޑަރު ޕެޕޭ އެވެ. އެއީ މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގައި ލަނޑު ޖަހައިގެންނެވެ. އޭނާ އެ ލަނޑު ޖެހީ ޗިކޯ ކޮންސެއިސާއޯ ތަނަވަސްކޮށްދިން ފުރުސަތެއްގަ އެވެ. އެ ލަނޑާއެކު ޕެޕޭ ވެގެން ގޮސްފައި ވަނީ ޗެމްޕިއަންސް ލީގުގައި ލަނޑު ޖެހި އުމުރުން އެންމެ ދޮށީ ކުޅުންތެރިޔާ އަށެވެ.

މޮޅާއެކު ޕޯޓޯ ދެ ވަނައިގައި އޮތީ ކުޅުނު ހަތަރު މެޗުން ހަ ޕޮއިންޓު ހޯދައިގެންނެވެ. އެއް ވަނައިގައި އޮތް ބާސެލޯނާއާ ދެމެދު އޮތީ ތިން ޕޮއިންޓުގެ ފަރަގެކެވެ. އެ ޓީމަށް ދެން އޮންނާނީ ބާސެލޯނާގެ ދަނޑުގައި އެ ޓީމާ ދެކޮޅަށް ކުޅޭ މެޗެވެ.