ރެއާލް މެޑްރިޑަށް ކުޅެމުން އަންނަ ފްރާންސްގެ މިޑްފީލްޑަރު އެޑުއާޑޯ ކަމަވިންގާ އެކުލަބާއެކު ހަދާފައިވާ އެއްބަސްވުން އައު ކޮށްފި އެވެ.

އުމުރުން 20 އަހަރުގެ ކުޅުންތެރިޔާ ރެއާލަށް ބަދަލުވީ 2021 ވަނަ އަހަރު އެވެ. ރެނޭސް ގައި ހުރުމަށް ފަހު އޭނާ ރެއާލަށް ބަދަލުވީ، ހަ އަހަރު ދުވަހުގެ އެއްބަަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވާން އޮތީ 2027 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް، އެއްބަސްވުމުގައި ބާކީ ހަތަރު އަހަރު އޮއްވާ ރެއާލުން ވަނީ ދިގު މުއްދަތަކަށް އޭނާގެ އެއްބަަސްވުން އައު ކޮށްފަ އެވެ. ރެއާލާއެކު ކަމަވިންގާ ސޮއި ކުރި އައު އެއްބަސްވުމުގެ މުއްދަތު ހަމަވާނީ 2029 ވަނަ އަހަރުގެ ޖޫން މަހުގެ ނިޔަލަށެވެ. ދިގު މުއްދަތަކަށް ކަމަވިންގާ ބަހައްޓަން ރެއާލުން ބޭނުންވަނީ، ޒުވާން އުމުރުގައި ވެސް އޭނާ ދައްކަމުން އަންނަ މޮޅު ކުޅުމުގެ ސަބަބުންނެވެ.

ކަމަވިންގާ ވަނީ މިހާތަނަށް ރެއާލަށް 114 މެޗު ކުޅެދީ، ދެ ލަނޑު ޖަހައިފަ އެވެ. އެ ކުލަބާއެކު އޭނާ ވަނީ ހަ ތައްޓެއް ކާމިޔާބު ކޮށްފަ އެވެ. އޭގެ ތެރޭގައި ހިމެނެނީ ސްޕެނިޝް ލީގު، ކޮޕަ ޑެލް ރޭ، ސްޕެނިޝް ސުޕަ ކަޕް، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް އެވެ. ކަމަވިންގާ އަކީ ރެއާލްގެ ފުރަތަމަ 11 އިން ކޯޗު ކާލޯ އަންޗެލޮޓީ އިސްކަން ދެމުން އަންނަ ކުޅުންތެރިޔެކެވެ. އެގޮތުން އޭނާގެ ހުނަރާމެދު އަންޗެލޮޓީ ވަނީ އެކި ފަހަރު މަތިން ތައުރީފު ވެސް ކޮށްފަ އެވެ.

މީގެ އިތުރުން ކަމަވިންގާ އަކީ ފްރާންސް ޤައުމީ ޓީމުގައި ވެސް ހިމެނޭ ކުޅުންތެރިޔެކެވެ. ޤައުމީ ޓީމުން އޭނާ އަށް ޖާގަ ލިބުނީ 2020 ވަނަ އަހަރު އެވެ. އޭގެ ފަހުން މިހާތަނަށް ވަނީ ޤައުމީ ޓީމަށް 13 މެޗު ކުޅެދީ، އެއް ލަނޑު ޖަހައިފަ އެވެ. ފްރާންސް އިން މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕަށް އެކުލަވާލި ސްކޮޑުގައި އޭނާ ހިމެނުނެވެ.