މިފްކޯއިން މަސް ގަންނަ އަގު ކުޑަކުރަން ނޫޅޭ ކަމަށް އެ ކުންފުނިން ބުނެފިއެވެ.
އަންގާރަ ދުވަހު އެ ކުންފުނިން މިހެން ބުނެފައިވަނީ މަސް ގަންނަ އަގު ރިވިއު ކުރުމަށް މިފްކޯއިން މަޝްވަރާ ކުރަމުން އަންނަ ކަމަށް ބުނެ ޚަބަރުތައް ފަތުރަމުންދާތީ ނެރުނު ބަޔާނެއްގައެވެ. އެގޮތުން، މަހުގެ އަގު ބޮޑުކުރި ދުވަހުން ފެށިގެން އެ ކުންފުނިން، ސަރުކާރުން ކަނޑައަޅާފައިވާ އަގުގައި މަސްވެރިން އަތުން މަސް ގަންނަމުންދާ ކަމަށާއި އެ އަގު އެއްވެސް ވަރަކަށް ކުޑަކުރަން ވިސްނުމެއް ނުގެންގުޅޭ ކަމަށް މިފްކޯއިން ވަނީ މަސްވެރިންނަށް ޔަގީންކަން ދީފައެވެ.
މަސް ގަންނަ އަގު ކިލޯއެއް 17 ރުފިޔާއިން 25 ރުފިޔާއަށް ސަރުކާރުން ބޮޑުކުރީ މިދިޔަ ސެޕްޓެމްބަރު މަހުގައެވެ. މިގޮތަށް ސަރުކާރުން ނިންމީ ޔޫރަޕުގެ މާކެޓަށް ވިއްކާ މަހުން ނަގާ 22 އިންސައްތައިގެ ޑިއުޓީ ކަނޑާލަން ދިވެހި ސަރުކާރާއި ޔޫރަޕިއަން ޔޫނިއަނާއެކު ކުރެވުނު މަޝްވަރާތައް ޕޮޒިޓިވްކޮށް ކުރިއަށްގޮސްފައިވާތީއެވެ. އަގު ބޮޑުކުރަން ސަރުކާރުން ނިންމި ދުވަހުން ފެށިގެން މިފްކޯއިން މަސް ގަންނަމުން ދަނީ ކިލޯއެއް 25 ރުފިޔާއަށެވެ.
އެ ކުންފުނިން މަހުގެ އަގު ކުޑަކުރުމުގެ ވިސްނުމެއް ނުގެންގުޅޭ ކަމަށާއި އެ އަގު ރިވިއު ކުރަން ފިނޭންސް މިނިސްޓްރީ އާއި ސަރުކާރުގެ އިދާރާތަކާއެކު ސީދާ މަޝްވަރާތަކެއް ވެސް ކުރިއަށް ނުދާ ކަމަށެވެ. އަދި މަސްކިރުމަށްފަހު އަގު ނުދެވި ހުރި ފަރާތްތަކަށް ފައިސާ ދައްކައި ޚަލާސް ކުރުމަށް މަައްކަތް ކުރަމުން އަންނަ ކަމަށް ވެސް މިފްކޯއިން ބުންޏެވެ.
މީގެ އިތުރުން މިފްކޯއިން ވަނީ މަަސްވެރިން އަތުން ގަނެފައިވާ މަހަށް ބަރާބަރަށް ފައިސާ ދައްކަމުން ދާނެ ކަމުގެ ޔަގީންކަން ދިވެހި މަސްވެރިންނަށް ދީފައެވެ.
މިފްކޯއިން ބުނީ މި ދުވަސްވަރު ރާއްޖޭގެ އެކި ކަންކޮޅުތަކަށް ވިއްސާރަ ކުރިނަމަވެސް މުޅި ރާއްޖޭގައި ވެސް މަސްވެރިކަން ރަނގަޅު ކަމަށެވެ. އެގޮތުން، ދުވާލަކަށް އެވްރެޖުކޮށް 450 ޓަނަށްވުރެ ގިނަ މަސް މިފްކޯގެ ސެންޓަރުތަކާއި ބޯޓުތަކުން ގަންނަމުންދާ ކަމަށް ވެސް ބުންޏެވެ.
