މި ސީޒަންގެ ޔުއެފާ ޗެމްޕިއަންސް ލީގުގައި ސްޕެއިންގެ ބާސެލޯނާގެ ނަތީޖާ ރަނގަޅު ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފި އެވެ.

ޒަވީ މިހެން ބުނީ ޗެމްޕިއަންސް ލީގު ގްރޫޕް ސްޓޭޖުގެ ހަތަރު ވަނަ މެޗުގައި ރަށުން ބޭރުގައި، ޝަޚްތަރު ޑޮނެސްކާ ދެކޮޅަށް އަންގާރަ ދުވަހުގެ ރޭ ނުކުންނަ މެޗުގެ ކުރިން ވާހަކަ ދައްކަމުންނެވެ. އޭނާ ބުނީ ގްރޫޕް ސްޓޭޖުގައި މިހާތަނަށް ކުޅުނު ތިން މެޗުން ވެސް މޮޅުވެ، ނުވަ ޕޮއިންޓާއެކު އެއް ވަނައިގައި އޮތުމަކީ ބާސެލޯނާ އަށް ހިތްހަމަ ޖެހުމެއް ކަމަށެވެ. އެހެން ނަމަވެސް، ކުރިއަށް އޮތް މެޗުން މޮޅުވެ، ބާސެލޯނާ އިން މުޅިން ހަމަޖެހިލަން ޖެހޭ ކަމަށް ޒަވީ ވަނީ ބުނެފަ އެވެ. ޒަވީ ބުނި ގޮތުގައި މި ސީޒަންގެ މުބާރާތް ފެށިއިރު ވެސް، އެންމެ ފުރަތަމަ ބާސެލޯނާގެ އަމާޒަކީ މުބާރާތުގެ ގަދަ 16 ވަނަ ބުރުން ޖާގަ ހޯދުމެވެ. ކުރިއަށް އޮތް މެޗަކީ އެކަމަށް ބާސެލޯނާ އަށް ލިބޭނެ ފަހު ފުރުސަތެއްކަން ފާހަގަކޮށް ޒަވީ ބުނީ، އެ ފުރުސަތު ދޫކޮށްލައިގެން ނުވާނެ ކަމަށެވެ.

އަނިޔާ އަށް ފަހު ބައެއް ކުޅުންތެރިން ޓީމާ ގުޅުނުކަން ފާހަގަކޮށް ޒަވީ ބުނީ، މިހާރު އެ ކުޅުންތެރިން ތިބީ ރަނގަޅު ފެންވަރެއްގައި ކަމަށެވެ. ބާސެލޯނާ އިން އެ ޓީމުގެ އަސްލު ފެންވަރުގައި ކުޅެން، އަދި ވެސް ގިނަ ކަންތައްތަކެއް ކުރަން ޖެހޭ ކަމަށް ޒަވީ ދެކެ އެވެ. އޭނާ ބުނީ އެކަންކަމަށް ވަގުތު ވެސް ނަގާނެ ކަމަށާއި، ކުރެވޭ މަސައްކަތާ މެދު އޭނާ ހިތްހަމަ ޖެހޭ ކަމަށެވެ. ސްޕެނިޝް ލީގުގައި އެންމެ ފަހުން ކުޅުނު މެޗުގެ ނަތީޖާ އަކީ، ކުރިއަށް އޮތް މެޗަށް ނިކުންނައިރު އޮތް ހިތްހަމަ ޖެހުމެއް ކަމަށް ވެސް އޭނާ ދެކެ އެވެ. އެހެންކަމުން ޓީމުގެ ކުޅުންތެރިންނާ މެދު ފުރިހަމަ އަށް އިތުބާރު އޮތްކަން ފާހަގަކޮށް ޒަވީ ބުނީ، ތިން ޕޮއިންޓު ނޫން އެއްޗެއް ބޭނުންނުވާ ކަމަށެވެ.

ބާސެލޯނާ އިން ޝަޚްތަރު ޑޮނެސްކާ ދެކޮޅަށް ނިކުންނާނީ އަންގާރަ ދުވަހުގެ ރޭ ރާއްޖެ ގަޑިން 22:45 ގައެވެ.