ނިއުގެ ބިދޭސީ ދެ ކުޅުންތެރިން ޓީމާ ގުޅިއްޖެ
7 ނޮވެމްބަރު 2023 | އަންގާރަ 07:19ތިން ކުޅުންތެރިން ބުދަ ދުވަހު ޓީމާ ގުޅޭނެ
ނިއުރޭޑިއަންޓާ ގުޅުނު ގާނާގެ ދެ ކުޅުންތެރިން
ދެވަނަ ޑިވިޝަންގައި ވާދަކުރަން ތައްޔާރުވާ ރާއްޖޭގެ އެންމެ ބޮޑު އެއް ކްލަބް ނިއުރޭޑިއަންޓަށް ގެންނަ ބިދޭސީ ހަ ކުޅުންތެރިންގެ ތެރެއިން ދެ ކުޅުންތެރިން ޓީމާ ގުޅިއްޖެއެވެ.
ޓީމާ ގުޅުނީ ގާނާގެ ދެ ކުޅުންތެރިން ކަމަށްވާ އަބުދުލް ފަތާވޫ ސާފިއުއާއި އަބޫ ސަނޫނު އެވެ. މީގެތެރެއިން ސާފިއު އަކީ ފޯވާޑެކެވެ. ސަނޫނު ގިނަ މަގާމްތަކަކަށް ކުޅެވޭ ކުޅުންތެރިއެއް ކަމަށް ކްލަބުން ބުންޏެވެ. އެގޮތުން އޭނާއަކީ ވައަތު ފަޅިން, ޑިފެންސިވް މިޑްފީލްޑަރަކަށް އަދި އެޓޭކިންގ މިޑްފީލްޑަރަކަށްވެސް ކޯޗު ބޭނުންވެއްޖެ ނަމަ ކުޅުވޭނެ ކުޅުންތެރިއެކެވެ. މިދެ ކުޅުންތެރިންވެސް ވަނީ ހޯމަ ދުވަހުގެރޭ އޮތް ޕްރެކްޓިސްގައި ބައިވެރިވެފައެވެ.
ޓީމަށް ދެން ގެންނަ ބިދޭސީ ތިން ކުޅުންތެރިންގެ އެއް ކުޅުންތެރިއަކީ އުޒުބެކިސްތާނުގެ ޑިފެންޑަރެކެވެ. އަދި މިދިޔަ އަހަރުވެސް ނިއުގައި މޮޅަށް ކުޅުނު ކޯފީވެސް ޓީމާ ގުޅޭނެއެވެ. އެ ކުޅުންތެރިން ބުދަ ދުވަހުގެރޭ ޓީމާ ގުޅޭނެކަމަށް ކްލަބުން މައުލޫމާތު ދެއެވެ. ޓީމް ޕްރެކްޓިސް ފެށިއިއިރު ޕާކިސްތާން ކީޕަރު އަބުދުލް ބާސިތު ވަނީ ޓީމާ ގުޅިފައެވެ. ނިއުރޭޑިއަންޓާ ވާދަވެރި ވިކްޓްރީން މިހާރު ޕްރެކްޓިސް ކުރަމުންދަނީ ބިދޭސީ ކުޅުންތެރިންނާއެކު ސްކޮޑް ހަމަކޮށްގެންނެވެ.
ނިއުރޭޑިއަންޓާ ވިކްޓްރީން ވެސް މަސައްކަތް ކުރަނީ އަލުން ފުރަތަމަ ޑިވިޝަންގެ ޖާގަ ހޯދުމަށެވެ. ދެވަނަ ޑިވިޝަން ފަށަން މިހާރު އެފްއޭއެމްއިން ތާވަލްކޮށްފައިވަނީ އަންނަ ޑިސެމްބަރު މަހުގެ 10 ވަނަ ދުވަހެވެ.
