"އިންޓަރނޭޝަނަލް ޑޮކްޔާޑެއް ހެދުމަށް މަސައްކަތް ކުރިން، އެކަން އެދެވޭ ގޮތުގައި ނުކުރެވުނީ ބިމުގެ ދަތިކަމުގެ ސަބަބުން"

އެމްޓީސީސީން އިންޓަރނޭޝަނަލް ޑޮކްޔާޑެއް ހެދުމަށް މަސައްކަތް ކޮށްފައިވާނެ ކަމަށާއި އެކަން އެންމެ އެދެވޭ ގޮތުގައި ނުކުރެވުނީ ބިމުގެ ދަތިކަމުގެ ސަބަބުން ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.

އާޒިމް އެފަދައިން ވިދާޅުވީ ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަފުޅު ދައްކަވަމުންނެވެ. އިތުރަށް ބިން ހޯދައިގެން އެ މަސައްކަތް ކުރުމަށް ގިނަ މަސައްކަތްތަކެއް ކުރެވުނު ކަމަށް އާޒިމް ވިދާޅުވިއެވެ. އަދި މިހާރު އޮތް ޑޮކްޔާޑުގައި ބޮޑު ޕްލޭނަކާއެކު މަސައްކަތް އިމްޕްލިމެންޓް ކޮށްފައިވާނެ ކަމަށް އާޒިމް ވިދާޅުވިއެވެ. އުންމީދަކީ ކުރިއަށް އޮތް އަހަރެއްހާ ދުވަހުގެ ތެރޭގައި އިންޓަރނޭޝަނަލް ފެންވަރުގެ ޑޮކްޔާޑެއް އެމްޓީސީސީގެ ބެލުމުގެ ދަށުން އުފެއްދުން ކަމަށް ވެސް އާޒިމް ވަނީ ވިދާޅުވެފައެވެ. މުވައްޒަފުންނަށް އެއްބާރުލުން ލިބޭ ނަމަ އެކަން އެމަގުން ވާނެކަމުގެ ޔަޤީންކަން އޮތް ކަމަށް އާޒިމް ވަނީ ވިދާޅުވެފައެވެ.

މިހާރު ތިލަފުށީގައި ހިންގަމުންދާ އެމްޓީސީސީ ބޯޓުޔާޑަކީ އެއްފަހަރާ 20 އުޅަނދު އެހެލުމުގެ ޖާގަ އޮތް ބޯޓް ޔާޑެއްކަން ފާހަގަކޮށްލެވެއެވެ. މީގެ އިތުރުން އެ ޔާޑުގައި ބޭނުންކުރާ 200 ޓަނުގެ ބޯޓް ހޮއިސްޓެއް ހިމެނެއެވެ. އެހެންކަމުން އެމްޓީސީސީ ބޯޓު ޔާޑަކީ ޑޮކްކުރުމަށް އެންމެ ޖާގަ ތަނަވަސް ޑޮކްޔާޑެވެ. ހަމައެހެންމެ އިންޓަރނޭޝަނަލް އެސޯސިއޭޝަން އޮފް ކްލެސިފިކޭޝަން ސޮސައިޓީޒް (އައި.އޭ.ސީ.އެސް) ސަޓިފައިޑް ވެލްޑަރުން މިހާރު އެމްޓީސީސީ ބޯޓު ޔާޑުގައި މަސައްކަތް ކުރަމުންދާކަން ފާހަގަކޮށްލެވެއެވެ.