2019 ވަނަ އަހަރުގެ ރައްޔިތުންގެ މަޖިލީހުގެ އިންތިޚާބުގައި ވޯޓުދިނުމުގެ ހައްގު ލިބިގެންވާ މީހުންގެ ތެރެއިން ވޯޓު ދިން މީހުންނާއި ވޯޓު ނުދޭ މީހުންގެ އިންސައްތަ ފެންނާނެ ފަދަ ތަފާސްހިސާބުތައް ހިމެނޭ ޗާޓެއް އިލެކްޝަންސް ކޮމިޝަންގެ ނާއިބު ރައީސް އިސްމާއީލް ހަބީބް ވަނީ މީސްމީޑިއާގައި ހިއްސާކުރައްވާފައެވެ.

އެ އިންތިޚާބުގައި 87 ދާއިރާ އަށް 264،442 މީހުންނަށް ވޯޓު ލުމުގެ ހައްގު ލިބުނެވެ.

މި ތަފާސްހިސާބުތަކަށް ބަލާއިރު، އުމުރުން 75 އަހަރުން މަތީގެ މީހުންގެ ތެރެއިން 70.62 އިންސައްތަ މީހުން ވަނީ ވޯޓުލާފައެވެ. މި އުމުރުފުރާގެ މީހުންގެ ތެރެއިން ވޯޓު ނުދޭ މީހުންގެ އިންސައްތަ އަކީ 29.38 އެވެ. މިއީ ވޯޓުލުމުގެ ހައްގު ލިބިގެންވާ މީހުންގެ ނިސްބަތަށް ބަލާ ނަމަ އެންމެ ގިނަ އަދަދެއްގެ މީހުން ވޯޓު ނުލާ އުމުރުފުރައެވެ. މި ތަފާސްހިސާބުތައް ހާމަކޮށްފައި ވަނީ 7 އުމުރުފުރާ ހިމެނޭ ގޮތަށެވެ. އެއީ 18-24 އަހަރާއި ދެމެދުގެ އުމުރުފުރާ، 25-34 އަހަރާއި ދެމެދުގެ އުމުރުފުރާ، 35-44 އަހަރާއި ދެމެދުގެ އުމުރުފުރާ، 55-64 އަހަރާއި ދެމެދުގެ އުމުރުފުރާ، 65-74 އަހަރާއި ދެމެދުގެ އުމުރުފުރާ އަދި 75 އަހަރުން މަތީގެ އުމުރުފުރައެވެ.

މި ތަފާސްހިސާބުތަކުން އެނގޭ ގޮތުން 75 އަހަރުން މަތީގެ އުމުރުފުރާ ފިޔަވައި ދެން އެންމެ ގިނައިން ވޯޓު ނުލާ މީހުން ގިނައީ 18-24 އަހަރާއި ދެމެދުގެ އުމުރުފުރާގެ މީހުންނެވެ. މި އުމުރުފުރައަށް ނިސްބަތްވާ މީހުންގެ ތެރެއިން ވޯޓުލާފައި ވަނީ 75.34 އިންސައްތަ މީހުންނެވެ. ވޯޓު ނުލާ 24.66 އިންސައްތަ މީހުން ތިއްބެވެ. ދެން އެންމެ މަދުން ވޯޓުލާފައި ވަނީ 25-34 އަހަރާއި ދެމެދުގެ އުމުރުފުރާގެ މީހުންނެވެ. މި އުމުރުފުރާގެ މީހުންގެ ތެރެއިން ވޯޓުލާފައި ވަނީ 79.05 އިންސައްތަ މީހުންނެވެ. ވޯޓު ނުލާ 20.95 އިންސައްތަ މީހުން ތިއްބެވެ.

ވޯޓުލީ މީހުންގެ ނިސްބަތުން ބަލާނަމަ އެ އަހަރު އެންމެ ގިނައިން ވޯޓުލާފައި ވަނީ 55-64 އަހަރާއި ދެމެދުގެ އުމުރުފުރާގެ މީހުންނެވެ. އެ އުމުރުފުރާގެ 88.76 އިންސައްތަ މީހުން ވަނީ ވޯޓުލާފައެވެ. އެ އުމުރުފުރާގެ މީހުންގެ ތެރެއިން ވޯޓު ނުލާ 11.24 އިންސައްތަ މީހުން ތިއްބެވެ. ދެން އެންމެ ގިނައިން ވޯޓުލީ 45-54 އަހަރާއި ދެމެދުގެ އުމުރުފުރާގެ މީހުންނެވެ. އެ އުމުރުފުރާގެ 87.07 އިންސައްތަ މީހުން ވޯޓުލާފައިވާއިރު ބާކީ 12.94 އިންސައްތަ މީހުން ވޯޓުލާފައެއް ނުވެއެވެ. އަދި 35-44 އަހަރާއި ދެމެދުގެ 82.67 އިންސައްތަ މީހުން ވޯޓުލާފައިވާއިރު ވޯޓު ލާފައިނުވަނީ 17.33 އިންސައްތަ މީހުންނެވެ. 65-74 ދެމެދުގެ އުމުރުފުރާގެ 85.76 އިންސައްތަ މީހުން ވަނީ ވޯޓުލާފައެވެ. މި އުމުރުފުރައަށް ނިސްބަތްވާ މީހުންގެ ތެރެއިން ވޯޓު ނުލަނީ 14.19 އިންސައްތަ މީހުންނެވެ.

2019 ވަނަ އަހަރުގެ މަޖިލިސް އިންތިޚާބުގައި 3،059 މީހުންނަށް އަލަށް ވޯޓުލެވުނެވެ. އަދި ރާއްޖޭގެ ވޯޓުލާ އާބާދީގެ ބޮޑުބައެއް ހިއްސާކުރަނީ ޒުވާނުން ކަމަށްވުމާ އެކު، އަދަދުގެ ގޮތުން ބަލާނަމަ ވޯޓު ނުލާ ޒުވާނުންގެ އަދަދު މަދެއް ނޫނެވެ. ނަމަވެސް އެންމެ ގިނައިން ވޯޓު ނުދޭ މީހުން ތިބީ 75 އަހަރުން މަތީގެ އުމުރުފުރާގައެވެ. އެހެންކަމުން ވޯޓުލާން ނުދަނީ ހަމައެކަނި ޒުވާން އުމުރުފުރާގެ މީހުންކަމަށް ބުނެވޭކަށް ނެތެވެ. ނަމަވެސް 18-24 އަހަރާއި ދެމެދުގެ އުމުރުފުރައަށް ނިސްބަތްވާ ވޯޓު ނުލާ ގިނަ މީހުން އެ އިންތިޚާބުގައި ތިބިކަން ފާހަގަކުރެވެއެވެ.

އިންތިޚާބުތަކުގައި ޒުވާނުން އަދި އެހެނިހެން އާއްމުން ވެސް ވޯޓުލާން ނުދާ ސަބަބުތަކުގެ ތެރޭގައި ނިޒާމަށް އޮތް އިތުބާރު ކުޑަވުމާއި، ވޯޓުލުމަކީ ސިޔާސީ ކަމެއްގެ ގޮތުގައި އެކަނި ދެކުން ހިމެނޭ ކަމަށް ޓްރާންސްޕޭރެންސީ މޯލްޑިވްސް އިން ބުނެފައިވެއެވެ. އެފަދަ ކަންކަމަށް ހައްލު ލިބޭނީ ފުޅާ ދާއިރާއެއްގައި ދިރާސާތަކެއްކޮށް އުމުރުފުރާތަކަށް ފޯކަސްކޮށްގެން ރަނގަޅު މަސައްކަތްތަކެއް ކުރެވިގެން ކަމަށް ވެސް ޓްރާންސްޕޭރެންސީ މޯލްޑިވްސް އިން ބުނެފައިވެއެވެ.