އެންޓި ކޮރަޕްޝަން ކޮމިޝަނުން ކުރަމުންދާ އެއްވެސް މަސައްކަތަކާއި ގުޅިގެން ރައްޔިތުންގެ މަޖިލީހުގެ އެއްވެސް މެންބަރަކު ނުވަތަ ސަރުކާރުގެ އިދާރާއަކުންވެސް އެ ކޮމިޝަނަށް ނުފޫޒެއް ފޯރުވާފައިނުވާކަމަށް އެ ކޮމިޝަނުން ބުނެފިއެވެ.
“އިންތިޤާލީ މަރުހަލާގައި އޭސީސީން ބައެއް ކަންކަންހުއްޓުވާތީ ކޮމިޝަނުގެ މެންބަރުންނަށް ރޮޒައިނާ އިންޒާރުދެއްވައިފި” މި ސުރުޚީގެ ދަށުން ދިޔަރެސް ނޫހުގައި ލިޔެފައިވާ ޚަބަރަކާއި ގުޅިގެންނެވެ.
އޭސީސީން ބުނީ، އެ ޚަބަރުގައި ކޮމިޝަނުގެ މެންބަރަކާ ހަވާލާދީފައިވާ ކަމަށް ބުނެ ލިޔެފައިވަނީ އެ ކޮމިޝަނުގެ އެއްވެސް މެންބަރަކު ދީފައިވާ މައުލޫމާތެއް ނޫންކަމާއި، އެއީ އެއްވެސް އަސްލެއްނެތް ހަޤީގަތާ ޚިލާފު ދޮގުވާހަކަތަކެއް ކަމަށެވެ.
އަދި އެ ކޮމިޝަނުގެ އެއްވެސް ކަމާކާއި ގުޅިގެން ރައްޔިތުންގެ މަޖިލީހުގެ އެއްވެސް މެންބަރަކު، ސަރުކާރުގެ އެއްވެސް ވަޒީރަކު، އަދި އިންތިގާލީ ރައީސް ގެ އޮފީހުގެ އެއްވެސް ފަރާތަކުންވެސް ކޮމިޝަނުގެ އެއްވެސް މެންބަރަކަށް ގުޅައި އިންޒާރުދީފައި ނުވަތަ ވަކި ކަމެއް ވަކި ގޮތަކަށް ކުރުމަށް އިރުޝާދު ދީފައިނުވާކަމަށްވެސް އޭސީސީން ބުނެފައިވެއެވެ.
އޭސީސީން ވަނީ އެ ކޮމިޝަނުން ތަހުޤީގުކުރަމުންދާ މައްސަލަތަކާ ގުޅޭގޮތުން އެ ފަދަ ހަޤީގަތެއް ނެތް އަދި ކޮމިޝަނުގެ މުސްތަޤިއްލުކަމާއި، މަސައްކަތްތަކާމެދު އިތުބާރުގެއްލޭފަދަ، ހަޤީގަތާ ޚިލާފު ވާހަކަތައް ނުފެތުރުމަށް ނަސޭހަތްތެރި ވެފައެވެ.
