ބަންދުގައި ހުރި މީހަކު އަތޮޅުވެއްސަށް ގެނައި ވަގުތު މޫދަށް ފުންމާލުމުން އަލުން ހައްޔަރުކޮށްފި
3 ނޮވެމްބަރު 2023 | ހުކުރު 13:51އޭނާ އެންމެ ފުރަތަމަ ހައްޔަރު ކުރި ސަބަބު ފުލުހުން ހާމަކޮށްފައެއް ނުވޭ
ފުލުހުން މޫދަށް ފުންމާލައިގެން ފިލަން އުޅެނިކޮށް ހައްޔަރު ކުރި މީހާ
ކުށެއްގެ ތުހުމަތުގައި ހައްޔަރުކޮށްފައިވާ މީހަކު އަތޮޅުވެއްސަށް ގެންދިޔަ މަގުމަތީގައި ފިލަންވެގެން މޫދަށް ފުންމާލުމުން، އޭނާ އަނެއްކާ ވެސް ހައްޔަރުކޮށްފިއެވެ.
ފުލުހުން ބުނީ ހުކުރު ދުވަހު 16:00 އެހާއިރު ފުލުހުންގެ ބަންދުގައި ހުރި މީހަކު އަތޮޅުވެއްސަށް ގެނައި ވަގުތު ފިލަން މަސައްކަތްކޮށް މޫދަށް ފުންމާލާފައިވާ ކަމަށެވެ. އެ މީހާ މޫދުން ނަގާ ފުލުހުންގެ ބެލުމުގެ ދަށަށް ގެންގޮސްފައިވާ ކަމަށާއި އެއީ 42 އަހަރުގެ ދިވެހި ފިރިހެނެއް ކަމަށް ފުލުހުން ވަނީ ބުނެފައެވެ.
މީސްމީޑިއާގައި ފެންނަ މަންޒަރުތަކުން އޭނާ ފަޅުތެރޭގައި ފަތާފައި ގޮސް ކަނޑާ ހަމައަށް ދިޔަކަން އެނގެއެވެ. އަދި ފުލުހުން ވަނީ ދެ ލޯންޗެއްގައި ގޮސް އޭނާ ކަނޑުން ނަގައިފައެވެ. އޭނާ ނެގުމަށް ބައެއް ފުލުހުން ވަނީ ކަނޑަށް ވެސް ފުންމާލާފައެވެ. އަދި އެމީހާ އަލުން ހައްޔަރުކޮށްގެން ގެންދިޔަ އިރު، ހުރީ ބިޑި ވެސް އަޅުވާފައެވެ.
އޭނާ އެންމެ ފުރަތަމަ ހައްޔަރު ކުރި ސަބަބު ފުލުހުން ހާމަކޮށްފައެއް ނުވެއެވެ.
