އޮންލައިން އަދަބީ އީދު 2021 ބޭއްވުމަށް ނިންމައިފި

ދިވެހި އަދަބު ކުރިއެރުވުމާއި އަދަބީ އުފެއްދުންތައް ހުށަހެޅުމުގެ ހުނަރު ތަރައްގީކޮށް ދެމެހެއްޓުމަށްޓަކައި ތަފާތު އަދަބީ މުބާރާތްތަކެއް ހިމެނޭ ގޮތަށް އޮންލައިން އަދަބީ އީދެއް ބާއްވަން ނިންމައިފިއެވެ.

ދިވެހިބަހުގެ އެކެޑަމީން ބުނީ މިއީ އާންމުކޮށް ހުޅުވައިލައިގެން ބާއްވާ އަދަބީ އީދެއް ކަމަށާއި، މި އަދަބީ އީދު ޚާއްސަ ކޮށްފައިވާނީ މައިގަނޑު 3 އުމުރު ފުރައަކަށް ކަމަށެވެ. އެއީ 10 އަހަރާއި 13 އަހަރާ ދެމެދުގެ އުމުރުފުރާ، 13 އަހަރާއި 17 އަހަރާ ދެމެދުގެ އުމުރުފުރާ، 17 އަހަރާއި 20 އަހަރާ ދެމެދުގެ އުމުރުފުރާއެވެ.

ކުރިއަށް ގެންދިޔުމަށް ހަމަޖެހިފައިވާ މުބާރާތްތަކަކީ ބަނދި ކިޔުން، ޅެން ކިޔުން، ވާހަކަ ހުށަހެޅުން އަދި ރައިވަރު ކިޔުން ކަމަށް އެކެޑަމީން ބުނެއެވެ.

އެކެޑަމީން ބުނީ އޮންލައިން އަދަބީ އީދުގެ މުބާރާތްތަކުގައި ބައިވެރިވެވޭނީ އެކަމަށް ތައްޔާރުކޮށްފައިވާ ގޫގުލްފޯމު މެދުވެރިކޮށް ކަމަށާއި، މުބާރާތަށް ހުށަހަޅާ އަދަބީ އުފެއްދުންތައް ހުށަހަޅާނީ އެކެޑަމީގެ 7986230 ނަންބަރުގެ ޓެލެގުރާމަށް ކަމަށެވެ. ހުށަހަޅާ އަދަބީ އުފެއްދުންތައް ހުންނަން ވާނީ އެމް.ޕީ 4 ފޯމެޓުގައި ލޭންޑްސްކޭޕްކޮށް ކަމަށާއި، ޓެލެގުރާމަށް ފޮނުވާ އަދަބީ އުފެއްދުމުގައި ކޮންމެ ބައިވެރިއެއްގެ ނަމާއި އެޑްރެހާއި އުމުރުފުރާ އަދި ދިވެހި ރައްޔިތެއްކަން އަންގައިދޭ ކާޑު ނަންބަރު ޖަހައި ވީޑިއޯއާ އެކު މެސެޖެއް ފޮނުވަން ވާނެ ކަމަށެވެ.

އޮންލައިން އަދަބީ އީދުގައި ބައިވެރިވާން އެދޭ ފޯމާއި ތަކެތި ހުށަހެޅުމަށް 10 އަހަރާއި 13 އަހަރާ ދެމެދުގެ އުމުރުފުރާގެ ކުދިން 28 ޖޫންގެ ކުރިން، 13 އަހަރާއި 17 އަހަރާ ދެމެދުގެ އުމުރުފުރާ ކުދިން 29 ޖޫންގެ ކުރިން، 17 އަހަރާއި 20 އަހަރާ ދެމެދުގެ އުމުރުފުރާގެ ކުދިން 30 ޖޫންގެ ކުރިން ފޯމު ހުށަހަޅަން ޖެހެއެވެ. އަދި ފޯމް ހުށަހަޅާއިރު، ކޮންމެ ދުވަހެއްގެ މެންދުރުފަހު 2:00ށް ކުރިން ފޯމް ހުށަހެޅުމަށް އެކެޑަމީން އެދިފައިވެއެވެ.

ކޮންމެ ބައިވެރިއަކަށް ވެސް ބައިވެރިވެވޭނީ ގިނަވެގެން 2 މުބާރާތުގައެވެ.