ދިވެހިބަސް ދަސްކޮށްދޭ ކޯހެއް ޗައިނާގެ ބެއިޖިން ފޮރިން ސްޓަޑީޒް ޔުނިވަރސިޓީގައި ފަށައިފި
9 ސެޕްޓެމްބަރު 2021 | ބުރާސްފަތި 18:15މި ކޯހުގައި ކިޔަވައިދެއްވާނީ އެ ޔުނިވަރސިޓީގެ ސްކޫލް އޮފް އޭޝިއަން ސްޓަޑީޒްގައި ދިވެހި ކިޔަވައިދެއްވާ ޓީޗަރު ޝޫ ފަންގްފަންގ
ކޯސް ފެށުމުގެ ރަސްމިއްޔާތުގެ ތެރެއިން
ދިވެހިބަސް ދަސްކޮށްދޭ ކޯހެއް ޗައިނާގެ ބެއިޖިން ފޮރިން ސްޓަޑީޒް ޔުނިވަރސިޓީގައި ފަށައިފިއެވެ.
ދިވެހިބަހުގެ އެކަޑަމީން ބުނީ މި ކޯސް ފަށައިފައިވަނީ ބުދަ ދުވަހު އެކަމަށްޓަކައި އެ ޔުނިވަރސިޓީގައި ބޭއްވި ޚާއްސަ ރަސްމިއްޔާތަށްފަހު ކަމަށެވެ.
މި ރަސްމިއްޔާތުގައި ރާއްޖެއިން ޗައިނާއަށް ކަނޑައަޅުއްވައިފައި ހުންނަވާ ސަފީރުގެ ނައިބު ޞަބާޙު ރަޝީދު ވަނީ ބައިވެރިވެވަޑައިގެންފައެވެ. ހަމަ އެއާއެކު ބެއިޖިން ފޮރިން ސްޓަޑީޒް ޔުނިވަރސިޓީގެ ނައިބު ރައީސް، ޕްރޮފެސަރ ޝާއޯ ގަންގް ވެސް ބައިވެރިވެވަޑައިގެންފައިވެއެވެ.
މި ކޯހުގައި ކިޔަވައިދެއްވާނީ އެ ޔުނިވަރސިޓީގެ ސްކޫލް އޮފް އޭޝިއަން ސްޓަޑީޒްގައި ދިވެހި ކިޔަވައިދެއްވާ ޓީޗަރު ޝޫ ފަންގްފަންގެވެ. މިއީ ދިވެހި ބަހަށް ލިބުނު ވަރަށް ބޮޑު ޝަރަފެއް ކަމަށާއި, އަދި ދިވެހި ބަސް ތަރައްގީކޮށް ދެމެހެއްޓުމަށްޓަކައި ކުރާ މަސައްކަތަށް ލިބުނު އިތުރު ކާމިޔާބެއް ކަމަށް އެކަޑަމީން ބުނެއެވެ.
