އިރުފާން ތަޤިއްޔު ޝަރުތުތަކާއެކު ބަންދުން ދޫކޮށްލުމަށް ނިންމީ ރަނގަޅަކަށް ނޫން

72 ކިލޯ މަސްތުވާތަކެތި ދިވެހިރާއްޖެއަށް އެތެރެކޮށް އެތަކެތި ޓްރެފިކްކުރަން އުޅުނު މައްސަލައިގައި އެންމެ އިސްކޮށް ހުރި ކަމަށް ތުހުމަތު ކުރާ އިރުފާން ތަގިއްޔު ޝަރީއަތް ނިމެންދެން ބަންދުކޮށްފައި ހުއްޓައި އޭނާ ބަންދުން ދޫކޮށްލި މައްސަލައިގެ އަޑުއެހުމެއް ހައިކޯޓުގައި ކުރިއަށް ގެންގޮސްފިއެވެ.

ބުރާސްފަތި ދުވަހު ކުރިއަށްދިޔަ އަޑުއެހުމަކީ މި މައްސަލައިގެ ޙުކުމް ކުރެއްވުމަށް ބޭއްވި އަޑުއެހުމެކެވެ. މައްސަލަ ބެއްލެވީ ފަނޑިޔާރު ފާތިމަތު ފަރުހީޒާ، ފަނޑިޔާރު މުޙައްމަދު ނިޔާޒު އަދި ފަނޑިޔާރު މުޙައްމަދު ސަލީމެވެ.

Advertisement

ކްރިމިނަކް ކޯޓުގައި މި މައްސަލަ ކުރިއަށްދަނިކޮށް މުޖުތަމައުގެ ސަލާމަތާއި ރައްކާތެރިކަމަށްޓަކައި އަދި ހެއްކަށް ނުފޫޒު ފޯރުވާނެކަމަށް ބަލައި އޭނާ ޝަރީއަތް ނިމެންދެން ބަންދުކުރިއެވެ. ނަމަވެސް ބަންދު މުރާޖައާ ކުރުމަށްފަހު، އޭނާ އިތުރަށް ބަންދުގައި ބަހައްޓަންޖެހޭ ސަބަބެއް ނެތްކަމަށް ބަޔާންކޮށް، ޝަރުތުތަކާއެކު ބަންދުން ދޫކޮށްލުމަށް ފަހުން ބޭއްވި އަޑުއެހުމެއްގައި ވަނީ ނިންމާފައެވެ.

އެގޮތަށް ނިންމާފައިވަނީ މުޖުތަމައުގެ ސަލާމަތާއި ރައްކާތެރިކަމަށް ނުރައްކަލެއް އަދި ހެކިންނަށް ނުފޫޒެއް ފޯރުވާނެ ކަމުގެ އިހްތިމާލެއް މިހާރު އޮތްކަމަށް ނުފެންނަކަމަށް ބަޔާންކޮށް އެކަމުގެ ސަބަބުތައް ބަޔާންކޮށްފައެވެ.

އަދި ބަންދުން ދޫކޮށްލުމުގައި ބަލި ޙާލަތަށްވެސް ރިއާޔަތް ކޮށްފައިވާނެކަމަށް ދަށު ކޯޓުން ބަންދު މުރާޖައާއާގުޅޭގޮތުން ނިންމި ނިންމުމުގައި ބަޔާންކޮށްފައިވެއެވެ.

ހައިކޯޓުގެ ފަނޑިޔާރުންގެ އިއްތިފާޤުން ވަނީ ބަންދު މުރާޖައާކޮށް ނިންމި ގޮތާއި، ކޯޓު އަމުރު ބާތިލުކޮށް، ބަންދާމެދު ގޮތެއް ކަނޑައެޅުމަށް 7 ދުވަހުގެ ތެރޭގައި ދަށު ކޯޓަށް ހުށައަޅައިފިނަމަ ހައިކޯޓުގެ ޙުކުމުގައި ބަޔާންކޮށްފައިވާ ކަންކަމުގެ އަލީގައި އޭނާގެ ބަންދާމެދު އަލުން ގޮތެއް ކަނޑައަޅަންޖެހޭކަމަށް ނިންމަވާފައެވެ.

މި މައްސަލައިގައި ޑައިމޯފިން ޓްރެފިކް ކުރުމުގެ ދައުވާ ދައުލަތުން 10 މީހެއްގެ މައްޗަށް އުފުލިއެވެ. ނަމަވެސް އޭގެ ތެރެއިން 7 މީހަކަށް ކުރާ ޓްރެފިކިންގ ދައުވާ ފަހުން ދައުލަތުން ވަނީ އަނބުރާ ގެންގޮސްފައެވެ. އޭރު ދައުވާ ހުށައެޅިތާ އަހަރަކަށްވުރެ ގިނަ ދުވަސް ވަނީ ވެފައެވެ.

މިހާރު މި މައްސަލައިގައި ދައުވާ އުފުލާފައިވަނީ ޢިރުފާން ތަގިއްޔުއާއި، މުހައްމަދު އަކްރަމްގެ އިތުރުން، އަހުމަދު ނަސީރުގެ މައްޗަށެވެ. ދައުލަތުން ބުނާ ގޮތުގައި މަސްތުވާތަކެތި އުުފުލާފައިވާ ކާރަކީ އަކްރަމްގެ ހިޔާޒަތުގެ ދަށުގައިވާ ކާރެކެވެ. އަދި މަސްތުވާތަކެތި ގެނައި ލޯންޗަކީ ނަސީރު ދުއްވި ލޯންޗެއްކަމަށް ދައުލަތުން ބުނެއެވެ.

ކްރިމިނަލް ކޯޓުގައި މިހާރު ކުރިއަށްދަނީ މި މައްސަލައިގެ ހެކިބަސް ނެގުމުގެ މަރުޙަލާއެވެ.