ވެރިކަމުގެ ނިޒާމު ގަޑުބަޑު ކުރުމަކީ ގާނޫނު އަސާސީ ދުށް ކަމެއް ނޫން: މާރިޔާ

ރާއްޖޭގެ ވެރިކަމުގެ ނިޒާމު ގަޑުބަޑު ކުރުމަކީ ގާނޫނު އަސާސީ ދުށް ކަމެއް ނޫން ކަމަށާއި ރައްޔިތުން މިއަދު މަގުމައްޗަށް ނުނިކުމެއްޖެ ނަމަ، މުސްތަގްބަލް މާ ބޮޑަށް ބަނަވާނެ ކަމަށް ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާގެ މެންބަރު މާރިޔާ އަހްމަދު ދީދީ ވިދާޅުވެއްޖެ އެވެ.

މ. ކުނޫޒްގައި ބޭއްވި ޖަލްސާގައި ވާހަކަދައްކަަވަމުން، މެންބަރު މާރިޔާ ވިދާޅުވީ، ގައުމު މިއަދު ފެނިގެންދަނީ، ހުރިހާ ނިންމުންތަކެއް ގާނޫނު އަސާސީއާއި ހިލާފަށް ނިންމަމުންދާ މަންޒަރު ކަމަށެވެ. މިއީ ރައްޔިތުންގެ މައްޗަށް އަނިޔާވެރިވުން ކަމަށް މާރިޔާ ވިދާޅުވި އެވެ.

"އަޚުގަނޑުމެންގެ ގާނޫނު އަސާސީއެއް ހަދާ އިސްލާހުކޮށް، މި ގާނޫނު އަސާސީއަށް ކިޔަމަންވެ ގަތުމަށް އެންމެންގެ މައްޗަށް ލާޒިމްކުރޭ. ވަރިހަމަ ރައީސުލްޖުމްހޫރިއްޔާ ވިޔަސް. ރައްޔިތުންގެ މަޖިލީހުގެ މެންބަރުން ވިޔަސް، މިނިވަން މުއައްސަސާއެއްގެ މެންބަރެއް ވިޔަސް، ދިވެހި ރާއްޖޭގެ ކޯޓުތަކުގެ ބޭފުޅުން ވިޔަސް، ގާނޫނު އަސާސީގެ 299 ވަނަ މާއްދާގައި ވަނީ ބަޔާންކޮށްފައި. މިއީ އަޅުގަނޑުމެންގެ ރައްޔިތުންގެ ގާނޫނުގެ އަސާސީ. މިއީ ދިވެހި ރައްޔިތުންގެ ބަސް. މިރާއްޖޭގެ އެއްވެސް ރައްޔިތަކަށް މިއަށް އަމަލުނުކޮށް ނޫޅެވޭނެ." މާރިޔާ ވިދާޅުވި އެވެ.

ރައީސް ޔާމީން ދުރުން ގާތަށް އަނިޔާވެރިވަމުން އައިސް މިއަދު ފެނިގެންދަނީ މުނި ނިޒާމު ފުނޑު ފުނޑު ކުރަމުންދާ މަންޒަރު ކަމަށް އޭނާ ވިދާޅުވި އެވެ.

މާރިޔާ ވިދާޅުވީ، ހަގީގީ ވެރިންނަކީ ރައްޔިތުން ކަމަށާއި މިގައުމު އިސްލާހު ކުރުމަށް އަތާ އަތް ގުޅާ ހުރިހާ ރައްޔިތުން އެކީގައި ނިކުންނަންޖެހޭ ކަމަށެވެ.

"މުއައްސަސާތަކުން ވަނީ ބާރުކަނޑުވާލާފައި. މިހާރު މި އަަމަލުކުރަނީ ގާނޫނު އަސާސީ ދުށް ގޮތެއް ނޫން. ރައްޔިތުންނާ މެދު އަނިޔާވެރިވެއްޖެ. މިއަދު ރައްޔިތުން ނިކުމެވަޑާއި ނުގަނެފި ނަމަ، ނުވަތަ މިކަމާ އަޅާނުލައްވައިފި ނަމަ، ނުވަތަ ގޭގަ ތިއްބަވައިފި ނަމަ، ތިޔަބޭފުޅުންގެ ދަރީންގެ ދަރީން މިއަށްވުރެ ނިކަމެތި ހާލުގައި އުޅެންޖެހޭނީ. މިއަދު ނިކުންނަނީ މަސްތަގްބަލް ސަލާމަތް ކުރުމަށް." މާރިޔާ ވިދާޅުވި އެވެ.