ވަގަށް ނަގާފައިވާ ބައިސްކަލެއް ވިއްކަން ފިހާރައަކަށް ވަދެ، ބައިސްކަލު ނުގަތުމުން މާރާމާރީ ހިންގައިފި

މާލޭގައި ވަގަށް ނަގާފައިވާ ބައިސްކަލެއް ގަތުމަށް ފިހާރައިގައި ތިބި މީހުން ދެކޮޅު ހެދުމުން މާރާމާރީ ހިންގި މައްސަލައެއް ފެންމަތިވެއްޖެއެވެ.

މި މައްސަލައާ ގުޅިގެން ހައްޔަރު ކޮށްފައިވަނީ 34 އަހަރުގެ ފިރިހެނެކެވެ. އޭނާގެ މައްޗަށް ކޮށްފައިވަނީ މުދަލަަށް ގެއްލުންދީ މާރާމާރީ ހިންގުމުގެ ކުށުގެ ތުހުމަތެވެ.

ކޯޓު އަމުރުގައި ބަޔާންކޮށްފައިވާ ގޮތުގައި އޭނާ ކުށް ކުރިކަމަށް ތުހުމަތު ކުރެވޭ މިންވަރަށް ހެކި ހުށައެޅިފައިވެއެވެ. އެގޮތުން އޭނާ ފިހާރައިގެ މުދަލަށް ގެއްލުންދީ މާރާމާރީ ހިންގިކަމަށް ތުހުމަތު ކުރެވޭއިރު، އޭނާ ފިހާރައަށް ވަނީ ބައިސްކަލެއް ވަގަށް ނަގައިގެން އެ ބައިސްކަލު ވިއްކުމަށްކަން ހާދިސާ ރިޕޯޓުން އެނގޭކަމަށް ކޯޓު އަމުރުގައި ބުނެއެވެ.

އަދި ފިހާރައިގެ މީހުން ބައިސްކަލު ނުގަތުމުން، އޭނާ އެތަނުގައި މާރާމާރީ ހިންގައި މުދަލަށް ގެއްލުންދީފައިވާއިރު، އޭނާއަށްވެސް އެތަނުގައި ތިބި މީހުން އަނިޔާކުރިކަމަށް އޭނާ ބުނެއެވެ.

ކްރިމިނަލް ކޯޓުން ވަނީ މުޖުތަމައުގެ ސަލާމަތާއި ރައްކާތެރިކަމަށްޓަކައި އޭނާ ބަންދު ކުރުމަށް އަމުުރުކޮށްފައެވެ. އެގޮތުން އޭނާ 30 ދުވަހަށް ބަންދު ކުރުމަށް އަމުރުކޮށްފައިވާއިރު، އޭނާގެ ބަންދުގެ މުއްދަތު ހަމަވާނީ 30 ނޮވެމްބަރު 2023 ގައެވެ.

އޭނާއަކީ ހައްޔަރާއި ބަންދު ރެކޯޑު ގިނަ މީހެކެވެ. އެގޮތުން މީގެ ކުރިންވެސް ބައިސްކަލު ވަގަށް ނެގުމުގެ މައްސަލަތަކެއް އޭނާއާ ގުޅިގެން ބަލާފައިވާކަމަށް ކޯޓު އަމުރުގައި ބުނެއެވެ.