އެސްޓީއޯގެ އާމްދަނީ 9 ޕަސެންޓު އިތުރުވެއްޖެ
އާމްދަނީ އިތުރުވިނަމަވެސް، އެ ކުންފުނީގެ ޖުމްލަ ފައިދާ ވަނީ ދަށަށްގޮސްފައި
އެސްޓީއޯގެ އަހަރީ އާންމު ޖަލްސާ
ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)އަށް ނިމިދިޔަ މުއްދަތުގައި ލިބުނު ޖުމްލަ އާމްދަނީ، ނިމިދިޔަ ކުއާޓަރާ އަޅާބަލާއިރު 9 ޕަސެންޓު އިތުރުވެއްޖެކަމަށް އެ ކުންފުނީގެ ތަފާސް ހިސާބުތަކުން ދައްކައިފިއެވެ.
އެސްޓީއޯއިން އާންމުކުރި ކުންފުނީގެ މާލީ ތަފާސް ހިސާބުތަކުން ދައްކާގޮތުން، އެސްޓީއޯއަށް މި އަހަރުގެ ދެވަނަ ކުއާޓަރުގައި އާމްދަނީގެގޮތުގައި ލިބުނީ 3.7 ބިލިއަން ރުފިޔާ ލިބުނުނަމަވެސް، އެ ކުންފުނިން ވަނީ އާމްދަނީ ރަނގަޅުކޮށް، ނިމިިދިޔަ ތިންވަނަ ކުއާޓަރުގައި 4.1 ބިލިއަން ރުފިޔާ ހޯދާފައެވެ.
އެހެންނަމަވެސް މިއީ އެ ކުންފުނިން މިދިޔަ އަހަރުގެ ތިންވަނަ ކުއާޓަރުގައި ހޯދި 4.6 ބިލިއަނަށްވުރެ މަދު އަދަދެކެވެ.
އެސްޓީއޯގެ އާމްދަނީ ނިމިދިޔަ ކުއާޓަރުގައި އިތުރުވިނަމަވެސް، އެ ކުންފުންޏަށް ޖުމްލަ ފައިދާގެގޮތުގައި ނިމިދިޔަ ކުއާޓަރުގައި ލިބުނީ 271 މިލިއަން ރުފިޔާއެވެ. މިއީ މި އަހަރުގެ ދެވަނަ ކުއާޓަރުގައި ލިބުނު 303 މިލިއަން ރުފިޔާއަށްވުރެ މަދު އަދަދެކެވެ.
އެހެން ނަމަވެސް މިއީ މިދިޔަ އަހަރުގެ ތިންވަނަ ކުއާޓަރުގައި އެކުންފުންޏަށް ލިބުނު ޖުމްލަ ފައިދާކަމަށްވާ 168 މިލިއަން ރުފިޔާއަށްވުރެ ގާތްގަޑަކަށް 61 ޕަސެންޓުގެ ކުރިއެރުމެކެވެ.
މިއާއެކު، އެކުންފުންޏަށް ނިމިދިޔަ ކުއާޓަރުގައި ލިބުނު ހިންގުމުގެ ފައިދާވެސް ވަނީ ދަށަށްގޮސްފައެވެ. އެގޮތުން، ހިންގުމުގެ ފައިދާގެގޮތުގައި އެކުންފުންޏަށް 390 މިލިއަން ރުފިޔާ ލިބިފައިވާއިރު، މިއީ އޭގެ ކުރީގެ ކުއާޓަރާ އަޅާބަލާއިރު 38 މިލިއަން ރުފިޔާގެ ދަށްވުމެކެވެ.
އެސްޓީއޯގެ ފައިދާ ދަށްވެފައިވަނީ، ދުނިޔޭގެ ބާޒާރުގައި ތެލުގެ އަގު މަތިވިނަމަވެސް، އެސްޓީއޯއިން ވިއްކަމުންދިޔަ ތެލުގެ އަގު އެ ނިސްބަތުން ބޮޑުކޮށްފައި ނުވުމުންނެވެ.
