ނަޝީދު ވަކިކުރުމުގެ މައްސަލަ މާދަމާއަށް ވެސް އެޖެންޑާކޮށްފި

ރައްޔިތުންގެ މަޖިލީހުގެ ރައީސް މުހައްމަދު ނަޝީދު، މަޖިލީހުގެ ރައީސްކަމުގެ މަގާމުން ވަކިކުރުމުގެ މައްސަލަ މާދަމާއަށް ވެސް އެޖެންޑާ ކޮށްފިއެވެ.

ރައްޔިތުންގެ މަޖިލީހުގެ ރައީސް ކަމުގެ މަގާމުން، ނަޝީދު ވަކިކުރުމަށް އާދީއްތަ ދުވަހުގެ ޖަލްސާއަށް ވެސް އެޖެންޑާ ކުރިއެވެ. ނަމަވެސް މަޖިލީހުގެ ރައީސްކަމުގެ މަގާމުން ނަޝީދު ވަކިކުރުމުގެ މައްސަލަ އެޖެންޑާކޮށްފައިވަނިކޮށް ނާއިބު ރައީސް އީވާ އަބްދުﷲ ވަނީ ސަލާމް ފޮނުއްވާފައެވެ. މަޖިލީހަށް ފޮނުއްވި ސިޓީގައި އީވާ ވިދާޅުވެފައިވަނީ ޑެންގީ ހުމަށް ޕޮޒިޓިވްވެވަޑައިގެންފައިވާ ކަމަށެވެ. ނަމަވެސް ނަޝީދު ވަކިކުރުމުގެ މައްސަލަ އެޖެންޑާ ކުރި ދުވަހަށް އީވާ ސަލާމް ހުށަހަޅުއްވާފައި މިވަނީ ޑެންގީ ހުމަށް ޕޮސިޓިވްވެ ވަޑައިގެން ހުންނަވާ ވެސް އޮކްޓޯބަރު މަހުގެ 24 ވަނަ ދުވަހުގެ ރިޔާސަތު ބެލެހެއްޓެވުމަށް ފަހުގައެވެ.

Advertisement

މިއާއެކު މަޖިލީހުގެ ޖަލްސާ ހޫނުވެ، މެންބަރުން ގެންދަވަނީ އިޖްތިޖާޖު ކުރަމުންނެވެ. އަދި މި މައްސަލަ ސުޕްރީމް ކޯޓަށް ހުށަހަޅާނެކަމަށް އެމްޑީޕީގެ މެންބަރުން ވަނީ ބުނެފައެވެ.

މަޖިލީހުގެ ހޯމަ ދުވަހުގެ ޖަލްސާގެ އެޖެންޑާ އާންމުކޮށްފައިވާ އިރު، ހޯމަ ދުވަހުގެ ޖަލްސާގައި ވެސް ވަނީ ނަޝީދުގެ އިތުބާރު ނެތްކަމުގެ މައްސަލަ ހިމަނާފައެވެ. އެގޮތުން މި އަހަރުގެ ތިންވަނަ ދައުރުގެ 15 ވަނަ ޖަލްސާގައި މި މަސައްކަތުގެ އިތުރުން ދެން އޮތީ ވޯޓަށް އެހުމަށް ހުރި ކަންކަމުގައި ވޯޓަށް އެހުމެވެ. ޖަލްސާ ފަށާނީ ހެނދުނު 9:00 ގައެވެ.

ނަޝީދު މަޖިލީހުގެ ރައީސްކަމުން ވަކިކުރުމަށް، އެމަނިކުފާނަށް ނޯޓިސް ފޮނުވާފައިވަނީ 12 އޮކްޓޯބަރުގައެވެ. 49 މެންބަރުންގެ ސޮޔާއެކު، ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ހުށަހަޅާފައިވަނީ ވެސް މި މަހުއެވެ.