ވަގުތާއި ހާލަތަށް ބަލާފައި ނިންމުންތައް ނިންމާނެ
ނަޝީދުގެ އިތުބާރު ނެތްކަމުގެ މައްސަލަ ކުރިއަށް ނުގެންގޮސް ހުއްޓުވާތީ މެންބަރުން އިހުތިޖާޖު ކުރަނީ
ރައްޔިތުންގެ މަޖިލީހުގެ ޖަލްސާތައް ކުރިއަށް ގެންދެވޭނެ މަގެއް ހޯދުމަށް އާދިއްތަ ދުވަހު ސުޕްރީމްކޯޓަށް މައްސަލަ ހުށަހަޅާނެ ކަމަށް އެމްޑީޕީގެ ޕާލަމެންޓްރީ ގްރޫޕުން ބުނެފިއެވެ.
ރައްޔިތުން މަޖިލީހުގެ ރައީސްގެ އިތުބާރު ނެތްކަމުގެ މައްސަލައާ ގުޅިގެން ރާއްޖެޓީވީގެ ގެނެސްދޭ ކަވަރޭޖަށް ދެއްވި ޚާއްސަ އިންޓަވިޔުއެއްގައި ރައްޔިތުންގެ މަޖިލީހުގެ އަލިފުށީ ދާއިރާގެ މެންބަރު މުހައްމަދު ރަޝީދު ހުސައިން ވިދާޅުވީ ވަގުތާއި ހާލަތަށް ބައްލަވާފައި ނިންމުންތައް ނިންމަވާނެ ކަމަށާއި، އާދިއްތަ ދުވަހު މި މައްސަލަ ސުޕްރީމްކޯޓަށް ހުށަހަޅުއްވާނެ ކަމަށެވެ.
އޭނާ ވިދާޅުވީ މައްސަލަ ހުށަހެޅުމަށް ލީގަލް ޓީމުން މަސައްކަތް ކުރަމުންދާ ކަމަށާއި، މިހާރު ކުރިއަށްދަނީ އެންމެފަހުގެ މަރުހަލާގައި ކުރަންޖެހޭ މަސައްކަތްތައް ކަމަށެވެ.
މެންބަރު މުހައްމަދު ރަޝީދު ވިދާޅުވީ މަޖިލިސް ހިންގާނީ ގާނޫނީ އިމުގެ ތެރެއިން ކަމަށާއި، އުސޫލުން ބޭރުން އެއްވެސް ކަމެއް ކުރުމުގެ ޖާގަ ނުދެއްވާނެ ކަމަށެވެ. އަދި ވިދާޅުވީ ދައުލަތަށް ނުހުއްޓި ކުރިއަށްދާނެ ހުރިހާ ގޮތެއް ހޯއްދަވާދެއްވާނެ ކަމަށެވެ.
މީގެ އިތުރުން އޭނާ ވިދާޅުވީ މަޖިލީހުގައި ރައްޔިތުންނާއި ގުޅުންހުރި ގިނަ މަސައްކަތްތައް އެބަހުރި ކަމަށެވެ. އަދި ވިދާޅުވީ މިހާލަތުގައި އިންތިޚާބީ ރައީސް ޑރ.މުހައްމަދު މުއިއްޒު ހުވާކުރެއްވުމުގެ ރަސްމިއްޔާތުގެ ބާއްވައިފިނަމަ ސުވާލު އުފެއްދުމުގެ ޖާގަ އޮންނާނެ ކަމުން، އޭގެކުރީގައި މިކަމަށް އިންސާފުވެރި ހައްލެއް ހޯދަންޖެހޭ ކަމަށާއި، އެގޮތަށް މަސައްކަތް ކުރައްވާނެ ކަމަށެވެ.
