ބައިޑެންއާއި ޝީ، ނޮވެމްބަރު މަހު ބައްދަލުކުރައްވަނީ

އެމެރިކާގެ ރައީސް ޖޯ ބައިޑެން، އަންނަ މަހު ސެން ފްރެންސިސްކޯގައި ބާއްވާ އޭޝިއާ ޕެސިފިކް އިކޮނޮމިކް ކޯޕަރޭޝަން (އޭޕެކް) ސަމިޓުގައި ޗައިނާގެ ރައީސް ޝީ ޖިންޕިންއާ ބައްދަލުކުރައްވާނެ ކަމަށް، ދެ ގައުމުގެ ދެމެދުގައި ދާދި ފަހުން ބޭއްވި މަތީ ފެންވަރުގެ މަޝްވަރާތަކުގެ ރީޑްއައުޓްތަކުން ދައްކައިފިއެވެ.

ބައިޑެންއާއި ޝީ ބައްދަލުކުރައްވަން ހަމަޖެހިފައި މި ވަނީ ޗައިނާގެ ޚާރިޖީ ވަޒީރު ވަންގް ޔީ ވޮޝިންޓަނަށް ކުރެއްވި ދަތުރުފުޅާ ގުޅިގެންނެވެ. ތިން ދުވަހުގެ ތެރޭގައި ވަންގް ވަނީ އެމެރިކާގެ ނޭޝަނަލް ސެކިއުރިޓީ އެޑްވައިޒަރު، ޖޭކް ސުލިވަންއާއި ސެކްރެޓަރީ އޮފް ސްޓޭޓް އެންޓަނީ ބްލިންކެންފަދަ އެމެރިކާގެ އިސް އޮފިޝަލުންނާ ބައްދަލުކުރައްވާފައެވެ.

ޗައިނާގެ ދައުލަތުގެ މީޑިއާއިން ބުނިގޮތުގައި، ވަންގް ވަނީ، ދެ ގައުމުގެ ދެމެދުގައި އޮތް އިހުތިރާމާއި ސުލްހަވެރި އެކުވެރިކަމާއި ވިން- ކޯޕަރޭޝަންގެ މައްޗަށް ބިނާކޮށް ދެ ގައުމުގެ ގުޅުން އިތުރަށް ބަދަހިކުރަން ޗައިނާއިން ބޭނުންވާކަން ފާހަގަކުރައްވާފައެވެ. އިސްރާއީލު-ހަމާސް ހަނގުރާމައާއި، ރަޝިޔާއިން ޔޫކްރެއިންއަށް އަރައިގަތުމާއި، ޓައިވާނާމެދު އުފެދިފައިވާ ނުތަނަވަސްކަންފަދަ ޖިއޮޕޮލިޓިކަލް އެކި މައްސަލަތަކާ ބެހޭގޮތުން ދެ ފަރާތުން ވަނީ މަޝްވަރާ ކުރައްވާފައެވެ.

ބައެއް އޮބްޒަރވަރުން ލަފާކުރާގޮތުގައި އިސްރާއީލާއި އަރަބި ގައުމުތަކާ އޮންނަ ގުޅުމަށް ބަލާއިރު، ޣައްޒާގައި ޗައިނާއަށް ބިނާކުރަނިވި ދައުރެއް އަދާކުރެވިދާނެއެވެ. ބައިޑެން ވަނީ މެދުއިރުމަތީގެ މައްސަލަފަދަ، ދުނިޔެއަށް ކުރިމަތިވެފައިވާ ގޮންޖެހުންތަކުން އަރައިގަތުމަށް އެމެރިކާއާއި ޗައިނާ ގުޅިގެން މަސައްކަތް ކުރަންޖެހޭކަން ވަންގްއަށް އަރިހުގައި ވިދާޅުވެފައެވެ. ނަމަވެސް ޓައިވާނާއި ދެކުނު ޗައިނާ ކަނޑުފަދަ މައުލޫތަކުގައި ނުތަނަވަސްކަން އަދިވެސް އެބަހުއްޓެވެ.

ބައިޑެންއާއި ޝީގެ ބައްދަލުވުމަކީ 2021 ވަނަ އަހަރުގެ ނޮވެމްބަރު މަހު ބޭއްވި ޖީ-20 ސަމިޓަށްފަހު، ދެ ބޭފުޅުން އަމިއްލަފުޅަށް ބައްދަލުކުރައްވާ ފުރަތަމަ ފަހަރެވެ. މިއީ އެމެރިކާއާއި ޗައިނާއާ ދެމެދު އޮންނަ ގުޅުން ހަމައަކަށް އެޅުވުމަށް ދެ ގައުމުގެ މަސްލަހަތު އޮތްކަމުގެ އިޝާރާތެކެވެ. ނަމަވެސް ސަރަހައްދީ ފްލޭޝްޕޮއިންޓުތަކާއި ދުނިޔޭގެ ނުފޫޒާމެދު ބޮޑެތި ޚިޔާލު ތަފާތުވުންތައް އަދިވެސް އެބަހުއްޓެވެ.

އޭޕެކް ސަމިޓަށް މަހެއްހާ ދުވަސް ވެފައި ވަނިކޮށް، ދެ ލީޑަރުން ކުރިމަތިލައްވަން ތައްޔާރުވެވަޑައިގަންނަވާ ކަމަށް ބެލެވެއެވެ. ނަމަވެސް މަޝްވަރާތައް އިތުރަށް އެއްބާރުލުން ދެއްވައިގެން ކުރިއަށް ގެންދެވުމަށް އޮތް އެންމެ ބޮޑު ގޮންޖެހުމަކީ ދެ ގައުމުގެ ގުޅުން އަދިވެސް އޮތީ ނުތަނަވަސް ކަމެއްގެ ތެރޭގައި ކަމަށް ވުމެވެ.