ޤާނޫނު ތަންފީޒުކުރުމަށް ހުރަސްއެޅުމުން ޝާބިލްގެ މައްޗަށް ކުރި ޙުކުމް، 21600 ރުފިޔާގެ ޖޫރިމަނާއަކަށް ބަދަލުކޮށްދީފި
ޝާބިލްގެ ފޯނު ހުޅުވޭނެ ލޮކް ކޯޑް ޖަހާ ފޯނު ހުޅުވާ ދީފައި ނުވާކަން ސާބިތުކުރުމަށް ވަނީ ހުށަހަޅާފައި
ކްރިމިނަލް ކޯޓް
ޤާނޫނު ތަންފީޒުކުރުމަށް ހުރަސްއެޅި މީހެއްގެ ޖަލުހުކުމް 21600 ރުފިޔާގެ ޖޫރިމަނާ އަށް ބަދަލުކޮށްދީފިއެވެ.
ބުދަ ދުވަހު ޤާނޫނު ތަންފީޒުކުރާ މުވައްޒަފެއްގެ މަސައްކަތަށް ގަސްތުގައި ހުރަސްއެޅުމުގެ ކުށް ސާބިތުވެ 21600 ރުފިޔާ އިން ޖޫރިމަނާކޮށްފައިވަނީ ކ.މާލެ، ގ. ކެރަފާާގެ މުޙައްމަދު ޝާބިލް އިސްމާޢީލެވެ.
މި މައްސަލަ އަކީ 20 މެއި 2018ގައި 13:30 އެހާކަށް ހާއިރު، ޝާބިލްގެ މައްޗަށް ތުހުމަތު ކުރާ ޖިނާއީ މައްސަލައެއްގެ ތަހުގީގަށް ކްރިމިނަލް ކޯޓުގެ އަމުރެއްގެ ދަށުން އޭނާގެ ފޯނު ފުލުހުންގެ ބެލުމުގެ ދަށަށް ގެންގޮސް، އޭގައިވާ މައުލޫމާތު ސާފުކުރުމުގެ ބޭނުމަށް، ފޯނުގެ ލޮކް ކޯޑް ޖަހާ ފޯނު ހުޅުވާދިނުމަށް އެދުމުން، ފޯނު ހުޅުވޭނެ ލޮކް ކޯޑް ޖަހާ ފޯނު ހުޅުވާ ދީފައި ނުވާކަން ސާބިތުކުރުމަށް ހުށަހަޅާފައިވާ މައްސަލައެކެވެ. މި މައްސަލަ އަށް ޝާބިލް އިންކާރު ކުރި ނަމަވެސް އޭނާގެ ފަރާތުން ދިފާއީ ހެތްކެއް ހުށަހަޅާފައެއް ނުވެއެވެ.
ޝާބިލްގެ ފޯނުގައިވާ މައުލޫމާތު ހޯދަން މަސައްކަތް ކުރީ 2018 ވަނަ އަހަރުގެ އޭޕްރިލް މަހުގެ 25 ވަނަ ދުވަހު ހިނގާފައިވާ ފޭރުމުގެ މައްސަލައެއްގައި އޭނާގެ ބައިވެރިވުން އޮތް ކަމަށް ތުހުމަތު ކުރެވިގެންނެވެ. އެ މައްސަލަ ދައުލަތުން ހުށަހެޅި ހެތްކާއި ގަރީނާގެ މައްޗަށް ބަލާއިރު ޝައްކެއް ނެތް މިންވަރަށް ސާބިތުވާ ކަމަށް މައްސަލައިގެ ޙުކުމްގައި ވަނީ ބަޔާންކޮށްފައެވެ. އެހެންކަމުން އެ ކުށުގެ އުޤޫބާތެއްގެ ގޮތުން ޝާބިލް އިސްމާއީލް 3 މަހާއި 18 ދުވަހަށް ޖަލަށްލުމަށް ވަނީ ޙުކުމްކޮށްފައެވެ.
އޭނާ ވަނީ އަދަބު ވީހާވެސް ލުއިކޮށްދިނުމަށް ޝަރީއަތުގައި އެދިފައެވެ. މި މައްސަލަ އަކީ ޖިނާއީ ބޮޑު ކުށަކަށް ދައުވާ ކުރާ މައްސަލައަކަށް ނުވާތީ އާއި މިފަދަ ކުށްތަކުގައި ޖަލަށް ލުމުގެ އަދަބު ކަނޑައެޅުމުން ދައުލަތުގެ މައްޗަށް އޮންނަ މާލީ އަދި އިދާރީ ބުރައަށާއި ކުށުގެ ވެށިން ދުރުވުމަށް ބާރު އެޅޭ މިންވަރަށް ރިއާޔަތްކުރާއިރު ޖަލު އަދަބު ކަނޑައެޅުމަށް ވުރެ އެހެން އަދަބެއް ކަނޑައެޅުމުގެ މަސްލަހަތު ބޮޑު ކަމަށް މައްސަލަ ބެއްލެވި ގާޒީ ވަނީ ވިދާޅުވެފައެވެ.
އަދަބު ކަނޑައެޅުމުގައި ކުށްވެރިޔާގެ މައްޗަށް ޖަލަށް ލުމަށް ކަނޑައެޅޭ އަދަބު ފިޔަވައި އެހެން ބާވަތެއްގެ އަދަބެއް ކަނޑައެޅުމުގެ އިޚްތިޔާރު ފަނޑިޔާރަށް ލިބިގެންވެއެވެ. މި މައްސަލަ ބައްލަވާފައި ވަނީ ކްރިމިނަލް ކޯޓުގެ ގާޒީ ސަފްއަތު ހަބީބެވެ. އެހެންކަމުން ފަނޑިޔާރަށް ލިބޭ އިޚްތިޔާރުގެ ދަށުން ޝާބިލްގެ މައްޗަށް ކަނޑައެޅި 3 މަހާއި 18 ދުވަހުގެ ޖަލު ހުކުމް ޖޫރިމަނާގެ އަދަބަކަށް ވަނީ ބަދަލުކޮށްދީފައެވެ. އެފަދައިން ޖޫރިމަނާކުރުމުގެ އަދަބަކަށް ބަދަލުކުރުމުން 21600 ރުފިޔާގެ ޖޫރިމަނާ އެއް ކުރުމަށް ވަނީ ކަނޑައަޅާފައެވެ. އެ ފައިސާ 25 އޮކްޓޯބަރު އިން ފެށިގެން 4 މަސްދުވަހުގެ ތެރޭގައި މީރާ އަށް ދެއްކުމަށް ވެސް ވަނީ ޙުކުމްކޮށްފައެވެ.
ގ. ކެރަފާގެ މުހައްމަދު ޝާބިލް އިސްމާއީލް އަކީ ކުރީގެ ހޯމް މިިނިސްޓަރު އުމަރު ނަސީރުގެ ވަޒީރުކަމުގައި ގޭންގުތަކުގައި ހަރަކާތްތެރިވާތީ މޮނިކޮން އަމުރު ހައިކޯޓުން ނެރެދީފައިވާ މީހުންގެ ތެރޭގައި ހިމެނުނު މީހެކެވެ.
