ފަތުރުވެރިކަން ކުޑަކޮށް ތަރައްގީވެފައި ހުރި ސަރަހައްދުތަކުން ޓެކްސްގެ ލުއިތަކެއް ދިނުމަށް މެންބަރު ސަލީމް ހުށަހަޅުއްވައިފި
ގެސްޓްހައުސް ވިޔަފާރި ފުޅާވެގެން ގޮސްފައި އޮތީ މާލެއާއި ކައިރި ސަަރަހައްދުތައް
މެންބަރު އަހުމަދު ސަލީމް
ރާއްޖޭގައި އެންމެ ކުޑަކޮށް ފަތުރުވެރިކަން ތަރައްގީވެފައި ހުރި ސަރަހައްދުތަކުން ޓެކްސްގެ ލުއިތަކެއް ދިނުމަށާއި، އިމްޕޯޓު ޑިއުޓީ 10 އަހަރުގެ މުއްދަތަކަށް މައާފުކުރަން ރައްޔިތުންގެ މަޖިލީހުގެ ހޯރަފުށީ ދާއިރާގެ މެންބަރު އަހުމަދު ސަލީމް އިސްލާހެއް ހުށަހަޅުއްވައިފިއެވެ.
ސަރުކާރުގެ ފަރާތުން، ކެނދިކުޅުދޫ ދާއިރާގެ މެންބަރު އަހުމަދު އީސާ ހުށަހަޅުއްވާފައިވާ ދިވެހިރާއްޖޭގެ ޓޫރިޒަމާބެހޭ ގާނޫނަށް އިސްލާހު ގެނައުމުގެ ބިލުގެ އިބްތިދާއީ ބަހުސްގައި ވާހަކަފުޅުދައްކަވަމުން މެންބަރު ސަލީމް ވިދާޅުވީ ދިވެހިރާއްޖޭގައި ޖުމްލަ 59896 ފަތުރުވެރިކަމުގެ އެނދު އެބަހުރި ކަމަށާއި، މީގެ ތެރެއިން މީހުން ދިރިއުޅޭ ރަށްރަށުގައި ގެސްޓްހައުސްގެ ގޮތުގައި 14254 އެނދު ކަމަށެވެ. ރާއްޖޭގެ ފަތުރުވެރިކަމުގެ ޖުމްލަ 23 އިންސައްތަ ހިއްސާކުރަނީ ގެސްޓްހައުސް އެނދުތައް ކަމަށާއި، 23 އިންސައްތަ އެނދުގެ ތެރެއިން 79 އިންސައްތަ އެނދު ހުރީ މާލެއިން ފުރައިގެން ލޯންޗެއްގައި ގިނަވެގެން ދެ ގަޑިއިރުގެ ރާސްތާއިން ދެވޭ ހިސާބުތަކުގައި ކަމަށް މެންބަރު ސަލީމް ވިދާޅުވިއެވެ. އެއީ ކ، އއ، އދ، އަދި ވ އަތޮޅުކަން މެންބަރު ސަލީމް ފާހަގަކުރެއްވިއެވެ.
މެންބަރު ސަލީމް ވިދާޅުވީ ގެސްޓްހައުސް ވިޔަފާރި ފުޅާވެގެން ގޮސްފައި އޮތީ މާލެއާއި ކައިރި ސަަރަހައްދުތައް ކަމަށާއި، ރާއްޖޭގެ ރިސޯޓުތަކުން ވެސް ތޮއްޖެހިފައިވަނީ މާލެ ސަރަހައްދުގައި ހުރި ރިސޯޓުތައް ކަމަށެވެ. މިހެންމިކަން ދިމާވާން މެދުވެރިވާ ސަބަބުތަކަށް އިޝާރާތް ކުރައްވައި މެންބަރު ސަލީމް ވިދާޅުވީ ދަތުރުފަތުގެ އަގު ބޮޑުވުމުން އެސަރަހައްދުތަކަށް ފަތުރުވެރިން ދިއުމަށް ފަސްޖެހޭ ކަމަށެވެ. ރާއްޖޭގެ އެކި ސަރަހައްދުތަކުގައި ޑޮމެސްޓިކް އެއާޕޯޓުތައް ހުޅުވަނީ ފަތުރުވެރިކަމަށް މަގުތަނަވަސް ކޮށްދިނުމަށް ކަމަށާއި، ނަމަވެސް އެއާލައިންގެ ދަތުރުގެ އަގު ކުޑަނުވާނަމަ އެސަރަހައްދުތަކުގައި ފަތުރުވެރިކަން ކުރިއަރައިގެން ހިނގައިދާނެކަމާއިމެދު މެންބަރު ސަލީމް ވަނީ ސުވާލު އުފައްދަވާފައެވެ.
ޓެކްސްގެ މައްސަލައަށް އިޝާރާތް ކުރައްވައި މެންބަރު ސަލީމް ވިދާޅުވީ މާލެ ސަރަހައްދާ އެއްވަރަށް ދުރު ހިސާބުތަކުން ޓެކްސް ދައްކަން ޖެހުމުން ފަތުރުވެރިކަން ކުރިއަށް ގެންދިއުމަށް އިންވެސްޓަރުން ޝައުގުވެރިނުވާ ކަމަށެވެ. އެހެންކަމުން ރާއްޖޭގައި އެންމެ ކުޑަކޮށް ފަތުރުވެރިކަން ތަރައްގީވެފައި ހުރި އެންމެ އުތުރުގެ އަތޮޅުތަކާއި އެންމެ ދެކުނުގެ ހިސާބުތަކުން އިމްޕޯޓު ޑިއުޓީ 10 އަހަރަށް ކަނޑާލަންޖެހޭ ކަމަށެވެ. އަދި، އެ މުއްދަތުގައި ފަތުރުވެރިކަމުގެ އެހެން ޓެކްސްތަކުން ވެސް އެ ސަރަހައްދުތަކުގެ ރިސޯޓުތަކަށް 50 އިންސައްތައިގެ ލުޔެއް ދިނުމަށް މެންބަރު ސަލީމް ހުށަހެޅުއްވިއެވެ.
މެންބަރު ސަލީމް ވިދާޅުވީ ދުނިޔޭގެ ގައުމުތަކުގައި ބައެއް ސަރަހައްދުތައް ވަކި ކަންކަމަށް އިގްތިސާދީ ގޮތުން ތަރައްގީ ގެނައުމަށް އެ ވިސްނުމުގައި މަސައްކަތްކޮށްފައިވާ ކަމަށާއި، ޓެކްސްއަށް ލުއި ދީފައިވާ ކަމަށެވެ. މެންބަރު ސަލީމްގެ މިހުށަހެޅުއްވުމަށް ކެނދިކުޅުދޫ ދާއިރާގެ މެމްބަރު އަހުމަދު އީސާ، ހުޅުދޫ ދާއިރާގެ މެމްބަރު އިލްޔާސް ލަބީބު އަދި އެހެން މެންބަރުން ވެސް ވަނީ ތާއީދުކުރައްވާ ވާހަކަފުޅުދައްކަވާފައެވެ.
